މިހާރު ކުރިއަށްދާ އިންޓަރ އޮފީސް ވޮލީބޯޅަ މުބާރާތުގައި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އާއި މޯލްޑިވްސް ޕޮލިސް ސާވިސް ކުޅުނު ފުރަތަމަ މެޗު ވެސް ކާމިޔާބުކޮށްފި އެވެ.

އަންގާރަ ދުވަހުގެ ހަވީރު ހުޅުމާލޭ ވޮލީ ކޯޓުގައި ކުޅުނު މެޗުގައި އެމްއެންޑީއެފް އިން ނުކުތީ ފިއުލް ސަޕްލައި މޯލްޑިވްސް (އެފްއެސްއެމް)އާ ދެކޮޅަށެވެ. އެމްއެންޑީއެފް އިން އެ މެޗު ކާމިޔާބު ކުރީ ފަސޭހަކަމާއެކު ސީދާ ތިން ސެޓުންނެވެ. މެޗުގެ ސެޓުތައް އެމްއެންޑީއެފް އިން ކާމިޔާބު ކުރީ 25-20، 25-20 އަދި 25-18 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެމްއެންޑީއެފްގެ ސެޓަރު ޙުސެއިން ޝާހިދު (ޝާޑު) އެވެ.

އަންގާރަ ދުވަހުގެ ރޭ ޕޮލިހުން ނުކުތީ ސްޓެލްކޯއާ ދެކޮޅަށެވެ. މިއީ މުބާރާތުގައި ޕޮލިހުންގެ ފުރަތަމަ މެޗެވެ. ސްޓެލްކޯ އިން ވަނީ ކުޅުނު ފުރަތަމަ މެޗުގައި މޯލްޑިވްސް އެއާޕޯޓް ކޮމްޕެނީ ލިމިޓެޑު (އެމްއޭސީއެލް)ގެ މައްޗަށް ކުރި ހޯދައިފަ އެވެ. ޕޮލިހުން ސްޓެލްކޯ ބަލިކޮށްފަައި ވަނީ ތިން ސެޓު އެއް ސެޓުންނެވެ. މެޗުގެ ފުރަތަމަ ދެ ސެޓު ކާމިޔާބު ކުރީ ޕޮލިހުންނެވެ. އެއީ ފުރަތަމަ ސެޓު 25-17 އަދި ދެ ވަނަ ސެޓު 25-18 އިންނެވެ. ނަމަވެސް ތިން ވަނަ ސެޓު 24-26 އިން ހޯދައި ސްޓެލްކޯ އިން އުންމީދެއް ހޯދި އެވެ. ހަތަރު ވަނަ ސެޓު ޕޮލިހުން ކާމިޔާބު ކުރީ ލީޑުގައި އޮވެގެން، 25-16 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ޕޮލިހުގެ ބިދޭސީ ކުޅުންތެރިޔާ ޓްޔާގީ ހިމަންޝޫ އެވެ.

މުބާރާތުގައި ބުދަ ދުވަހުގެ ހަވީރު ބައްދަލު ކުރާނީ އެމްއޭސީއެލް އާއި އާބަންކޯ އެވެ. ބުދަ ދުވަހުގެ ރޭ އޮންނާނީ ވެމްކޯ އާއި ކަރެކްޝަން ބައްދަލު ކުރާ މެޗެވެ.