އައިސަމްގެ ދެ ލަނޑުން ޕްރެޒިޑެންޓްސް ކަޕް މާޒިޔާ އަށް

ޕްރެޒިޑެންޓްސް ކަޕް ފުޓުބޯޅަ މުބާރާތުގެ ފައިނަލްގައި ކުލަބު އީގަލްސް 2-0w ބަލިކޮށް، މާޒިޔާ ސްޕޯޓްސް އެންޑް ރެކްރިއޭޝަނުން މުބާރާތުގެ ޗެމްޕިއަންކަން ހޯދައިފި އެވެ.

އަންގާރަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު ފައިނަލް މެޗު ޝަރަފުވެރިކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އެވެ. މެޗު ފަށައިގެން މާޒިޔާ އިން ވަނީ އީގަލްސްގެ އޭރިޔާ ތެރޭގައި ބޯޅަ ގެންގުޅެ، ލަނޑު ޖެހުމަށް މަސައްކަތް ކޮށްފަ އެވެ. އީގަލްސް އިން ވެސް ދިޔައީ މަދު މަދުން ލިބުނު ފުރުސަތުގައި މާޒިޔާގެ ގޯލަށް ނުރައްކާ ކުރުމަށް މަސައްކަތް ކުރަމުންނެވެ. އީގަލްސްގެ ގޯލް ކުރިމަތިން މާޒިޔާގެ ޙުސެއިން ނިހާން އަށް ލިބުނު ފުރުސަތުގައި އޭނާ ފޮނުވާލި ބޯޅަ ދިޔައީ ގޯލުގެ ހުރަސް ދަނޑި މަތިން ބޭރަށެވެ. އޭގެ ފަހުން އީގަލްސްގެ އަޙުމަދު ރިޒުވާން (ރިޒޭ) އަށް ވެސް ވަނީ ފުރުސަތުތަކެއް ލިބި ބޭކާރުވެފަ އެވެ. ރިޒޭ ފޮނުވާލުމަށް މަސައްކަތް ކުރި ދެ ބޯޅައެއް މާޒިޔާގެ ގޯލް ކީޕަރު މުޙައްމަދު ފައިސަލް ވަނީ މަތަކޮށްފަ އެވެ. އޭގެ ފަހުން މާޒިޔާ އަށް ލިބުނު ކޯނަރެއްގައި ހުރަސްވި ބޯޅަ ނިހާން ބޮލުން ފޮނުވާލި ނަމަވެސް، އީގަލްސްގެ ގޯލް ކީޕަރު މުޙައްމަދު ޝަފީއު ވަނީ މަތަކޮށްފަ އެވެ. އޭގެ އިރުކޮޅެއް ފަހުން މާޒިޔާގެ އިބްރާހީމް އައިސަމް ފޮނުވާލި ނުރައްކާތެރި ބޯޅަ ވެސް ޝަފީއު ވަނީ މަތަކޮށްފަ އެވެ.

މެޗުގެ 30 ވަނަ މިނެޓުގައި އީގަލްސްގެ ބިދޭސީ ކުޅުންތެރިޔާ އިވާން ކާލޮސް މާޒިޔާގެ އޭރިޔާ ތެރެއިން ފޮނުވާލި ބޯޅަ ފައިސަލް ވަނީ ކޯނަރަަކަށް ބޭރުކޮށްލައިފަ އެވެ. ފުރަތަމަ ހާފުގެ 45 ވަނަ މިނެޓުގައި މާޒިޔާ އިން ވަނީ ލަނޑު ޖަހައި ލީޑު ނަގައިފަ އެވެ. އެއީ އީގަލްސްގެ އޭރިޔާ ތެރެއިން ނާއިޒް ޙަސަން ހުރަސްކޮށްދިން ބޯޅައެއް އެއް ފަހަރު ޖަހައި ގޯލަށް ފޮނުވާލައިގެން އިބްރާހީމް އައިސަމް ޖެހި ލަނޑެކެވެ. އެ ލަނޑާއެކު މާޒިޔާ އިން ފުރަތަމަ ހާފު ނިންމާލީ އެއް ލަނޑުން ކުރީގައި އޮވެގެންނެވެ.

ދެ ވަނަ ހާފު ފަށައިގެން މާޒިޔާ އަށް ލީޑު ފުޅާ ކުރުމަށް ރަނގަޅު ފުރުސަތުތަކެއް ލިބުނުއިރު، އީގަލްސް އަށް ވަނީ ނަތީޖާ ހަމަަހަމަ ކުރުމަށް ވެސް ފުރުސަތު ލިބިފަ އެވެ. އީގަލްސްގެ އިބްރާހީމް މަހުދީ ޙުސެއިން ހުރަސްކޮށްދިން ބޯޅަ އިވާން ކާލޮސް ބޮލުން ފޮނުވާލި ނަމަވެސް، ފައިސަލް ވަނީ ބޯޅަ މަތަކޮށްފަ އެވެ. މެޗުގެ ފަހު ވަގުތު އީގަލްސް އަށް ވަނީ ނަތީޖާ ހަމަހަމަ ކުރުމަށް ފުރުސަތު ލިބިފަ އެވެ. ނަމަވެސް އިއްބެ ފޮނުވާލި ބޯޅަ ބްލޮކް ކުރީ މާޒިޔާގެ ހައިޝަން ޙަސަން އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި މާޒިޔާ އިން ވަނީ ދެ ވަނަ ލަނޑު ޖަހައިފަ އެވެ. މާޒިޔާގެ ދެ ވަނަ ލަނޑު ޖަހައި އެ ޓީމަށް ފުރިހަމަ މޮޅެއް ހޯދައިދިނީ ވެސް އައިސަމް އެވެ. އީގަލްސްގެ އޭރިޔާ ތެރެއިން ލިބުނު ފުރުސަތުގައި އޭނާ ފޮނުވާލި ބޯޅަ ކީޕަރު ޝަފީއު އަށް ހުއްޓުވޭނެ ގޮތެއް ނުވި އެވެ.

މިއީ މާޒިޔާ އިން ޕްރެޒިޑެންޓްސް ކަޕްގެ ފައިނަލް ކުޅުނު ހަތަރު ވަނަ ފަހަރެވެ. އަނެއްކޮޅު މިއީ އެ ޓީމުން މުބާރާތް ކާމިޔާބު ކުރި ދެ ވަނަ ފަހަރެވެ. މާޒިޔާ އިން ވަނީ 2015 ވަނަ އަހަރު ވެސް ޕްރެޒިޑެންޓްސް ކަޕް ކާމިޔާބުކޮށްފަ އެވެ.