މެޗު ކުޅެން ހުއްޓާ ކޫންޑޭ ދިރިއުޅޭ ގެ ފަޅާލައި ވައްކަންކޮށްފި

ސްޕެއިންގެ ބާސެލޯނާ އަށް ކުޅެމުން އަންނަ ފްރާންސްގެ ޑިފެންޑަރު ޖޫލްސް ކޫންޑޭ ދިރިއުޅޭ ގެ ފަޅާލައި ވައްކަންކޮށްފި އެވެ.

މި ހާދިސާ ހިނގާފައި ވަނީ މިދިޔަ ހޮނިހިރު ދުވަހުގެ ރޭ ކަމަށް މީޑިއާތަކުގައި ވަނީ ރިޕޯޓުކޮށްފަ އެވެ. އަދި އެ ހާދިސާ ހިނގި ވަގުތު ކޫންޑޭ ހުރީ ބާސެލޯނާ އިން ސްޕެނިޝް ލީގުގައި ރެއާލް ބެޓިސްއާ ދެކޮޅަށް ކުޅުނު މެޗުގަ އެވެ. މީގެ އިތުރުން ގެ ފަޅާލައި، ވައްކަން ކޮށްފައިވާކަން ކޫންޑޭ އަށް އެނގުމާއެކު އޭނާ ވަނީ އެކަން ކަމާ ގުޅޭ ތަހުގީގީ އިދާރާކަށް އަންގައިފަ އެވެ. ނަމަވެސް އެކަމާ ގުޅޭ އިތުރު ތަފްސީލެއް ހާމަކޮށްފައެއް ނުވެ އެވެ. މީޑިއާތަކުގައި ބުނެފައިވާ ގޮތުން ކޫންޑޭގެ ގެ ފަޅާލައި، ވަގުން ވަނީ ބައެއް ސާމާނު ވަގަށް ގެންގޮސްފަ އެވެ. ނަމަވެސް މިހާތަނަށް އެއީ ކޮންކޮން ސާމާނުތަކެއްކަން އެނގިފައެއް ނެތެވެ.

އެ ސަރަހައްދުގެ ފުލުހުން ވަނީ ބައެއް މީޑިއާތަކަށް އެކަން ކަށްވަރުކޮށްދީފަ އެވެ. ފުލުހުންނާ ހަވާލާދީ މީޑިއާތަކުގައި ބުނެފައި ވަނީ، ހޮނިހިރު ދުވަހުގެ ރޭ ގެޔެއް ފަޅާލައި، އެ ގެއިން ވައްކަން ކޮށްފައިވާ ކަމުގެ މައުލޫމާތު ފުލުހުންނަށް ލިބިފައިވާ ކަމަށެވެ. ހަމައެއާއެކު ފުލުހުން އެކަމުގެ ތަހުގީގު ކުރިއަށްގެންދާ ކަމަށާއި، އިތުރު މައުލޫމާތު ތަހުގީގަށްފަހު ފުލުހުން ހާމަ ކުރާނެ ކަމަށެވެ.

މީގެ ކުރިން ވެސް ބާސެލޯނާގައި ބައެއް ކުޅުންތެރިން ދިރިއުޅެމުން އައި ގެ ވަނީ ވަގުން ފަޅާލައިފަ އެވެ. އޭގެ ތެރޭގައި ޕިއޭ-އެމެރިކް އޮބާމަޔަން، ސަމުއެލް އުމްޓިޓީ، އާތޫރް މެލޯ، ލުއިސް ސުއަރޭޒް، އަންސޫ ފާޓީ، ޖޯޑީ އަލްބާ، ފިލިޕޭ ކުޓީނިއޯ އަދި ކެވިން ޕްރިސް ބޯޓެންގް ހިމެނެ އެވެ. އެފަހަރުތަކުގައި އޭގެ ތެރެއިން ބައެއް ކުޅުންތެރިންގެ ގެތަކުން ވަނީ އަގު ބޮޑު ސާމާނު ވެސް ވަގަށް ނަގައިފަ އެވެ.

ސެވިއްޔާ ދޫކޮށް ކޫންޑޭ ބާސެލޯނާ އަށް ބަދަލުވީ މިދިޔަ އަހަރުގެ ޖުލައި މަހު އެވެ. އޭގެ ފަހުން އޭނާ ވަނީ މިހާތަނަށް އެކުލަބަށް 35 މެޗު ކުޅެދީފަ އެވެ.