33 އަހަރަށްފަހު ފުރަތަމަ ފަހަރަށް އިޓާލިއަން ސެރީ އޭ ހޯދުމާ ގާތުގައިވާ ނަޕޯލީން އިތުރު އިންތިޒާރެއް ކުރަން ޖެހިއްޖެއެވެ.

ނަޕޯލީގެ އިންތިޒާރު ދިގުވީ ލީގުގައި ސެލަނިޓާނާ އަތުން މޮޅު ނުވެވުމުންނެވެ. އަމިއްލަ ދަނޑުގައި ކުޅުނު މެޗު ނިމުނީ 1-1ން އެއްވަރުވެގެންނެވެ. މެޗު އެއްވަރުވީ އޮލިވޭރާގެ ލަނޑުން ނަޕޯލީން ކުރިހޯދާފައި ވަނިކޮށެވެ. ސެލަނިޓާނާއިން ނަތީޖާ ހަމަހަމަކޮށް, ނަޕޯލީގެ އިންތިޒާރު ދިގުކޮށްލީ މެޗު ނިމެން ހަ މިނިޓަށް ވެފައިވަނިކޮށް ޑިއާ ޖެހި ލަނޑުންނެވެ. ނަޕޯލީން އެންމެ ފަހުން ލީގު ހޯދީ 1990 ވަނަ އަހަރުއެވެ.

ލީގު ކަށަވަރުކުރަން ކުރިއަށް އޮތް ހަ މެޗުން ނަޕޯލީއަށް ބޭނުންވަނީ އެންމެ ދެ ޕޮއިންޓެވެ. ލީގުގައި ނަޕޯލީއަށް ކުރިއަށް އޮތީ ބުރާސްފަތި ދުވަހު އުދިނޭސީއާ ވާދަކުރާ މެޗެވެ. ނަޕޯލީ އެއްވަނާގައި އޮތީ 18 ޕޮއިންޓްގެ ބޮޑު ލީޑަކާއެކުއެވެ. 61 ޕޮއިންޓާއެކު ދެވަނާގައި އޮތް ލާޒިއޯ ވަނީ 3-1ން އިންޓަރ މިލާން އަތުން ބަލިވެފައެވެ. އިންޓަރ މިލާން އޮތީ ހަތަރު ވަނާގައެވެ. ތިންވަނާގައި އޮތީ ޔުވެންޓަސްއެވެ.