އިޓާލިއަން ލީގުގައި އެންމެ ފަހުގެ ޗެމްޕިއަން އޭސީ މިލާނާއި ރޯމާ ވާދަ ކުރި މެޗު އެއްވަރުވެގެން ނިމިއްޖެ އެވެ.
ރޯމާގެ ދަނޑުގައި ހޮނިހިރު ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. އެއާއެކު ގަދަ ހަތަރަކަށް ވާދަކުރާ ދެ ޓީމުގެ ވާދާވެރިކަން އިތުރަށް ބޮޑު ވާނެ އެވެ. މެޗު އެއްވަރުވުމުން ދެ ޓީމަށް ވެސް ޕޮއިންޓު ލިބެނީ އެއް އަދަދަކަށެވެ. މިހާތަނަށް ދެ ޓީމު ވެސް 32 މެޗު ކުޅެފައިވާއިރު، ލިބެނީ 57 ޕޮއިންޓެވެ. ލަނޑުގެ އަދަދުން ކުރި ހޯދައިގެން ހަތަރު ވަނައިގައި މިލާން އޮތްއިރު، ރޯމާ އޮތީ ފަސް ވަނައިގަ އެވެ. ތިން ވަނައިގައި އޮތް ޔުވެންޓަސްއާ ދެމެދު އޮތީ ތިން ޕޮއިންޓުގެ ފަރަގެކެވެ. ނަމަވެސް ޔުވެންޓަސް މެޗު ކުޅެފައި ވަނީ މަދުންނެވެ.
މެޗުގައި ދެ ޓީމުން ވެސް ލަނޑު ޖެހުމަށް ރަނގަޅު ފުރުސަތު ލިބި ވަނީ ބޭކާރުވެފަ އެވެ. މެޗުގައި ދެ ޓީމުން ވެސް ލަނޑު ޖެހީ ނުވަ ދިހަ މިނެޓު ހަމަވެ އިތުރަށް ދެއްކި ވަގުތުގަ އެވެ. އިތުރަށް ދެއްކި ވަގުުތުގެ ހަތަރު ވަނަ މިނެޓުގައި ފުރަތަމަ ލަނޑު ޖަހައި ކުރި ހޯދީ ރޯމާ އިންނެވެ. އެއީ ޒެކީ ސެލިކް ތަނަވަސްކޮށްދިން ފުރުސަތެއްގައި ޓަމީ އަބްރަހަމް ޖެހި ލަނޑުންނެވެ. ނަމަވެސް އޭގެ ތިން މިނެޓު ފަހުން މިލާނުން ވަނީ ލަނޑު ޖަހައި ނަތީޖާ ހަމަހަމަކޮށްފަ އެވެ. މިލާންގައި މޮޅު ކުޅުމެއް ދައްކަމުން އަންނަ ރަފައެލް ލެއާއޯ ތަނަވަސްކޮށްދިން ފުރުސަތެއްގައި އެ ޓީމަށް ނަތީޖާ ހަމަހަމަ ކޮށްދިނީ އެލެކްސިސް ސައެލެމައެކާސް އެވެ.
