ކޯލޯ މުއާނީ ހޯދުމަށް ކުލަބުތަކުގެ ޝައުޤުވެރިކަން، ފްރޭންކްފާޓުން ބޭނުންވަނީ އޭނާ ބަހައްޓަން

ޖަރުމަނުގެ އެއިންޓްރަކްޓް ފްރޭންކްފާޓް އަށް ކުޅެމުން އަންނަ ފްރާންސްގެ ޒުވާން ފޯވާޑް ރަންޑަލް ކޯލޯ މުއާނީ ހޯދުމަށް ގިނަ ކުލަބުތަކުން ޝައުޤުވެރިވީ ނަމަވެސް، އޭނާ ދޫކޮށްލަން ބޭނުންނުވާ ކަމަށް އެ ކުލަބު ބުނެފި އެވެ.

މިދިޔަ އަހަރު ޤަތަރުގައި ނިމުނު ފީފާ ވޯލްޑް ކަޕްގައި ކޯލޯ މުއާނީ ދެއްކި މޮޅު ކުޅުމުގެ ސަބަބުން އޭނާ ހޯދުމަށް ގިނަ ކުލަބުތަކުން މަސައްކަތް ކުރާ ކަމަށް ބޭރުގެ މީޑިއާ ރިޕޯޓުތައް ވަނީ ބުނެފަ އެެވެ. އެގޮތުން މީގެ ކުރިން ޗެލްސީން ވެސް ވަނީ އޭނާ ހޯދުމުގެ މަސައްކަތް ކޮށްފައި ކަމަށާއި، ޖަރުމަނު ލީގުގެ ބަޔާން މިއުނިކުން މިހާރު ވެސް އެ މަސައްކަތް ކުރާ ކަމަށް ރިޕޯޓުތައް ބުނެ އެވެ. އެކަމާ ގުޅިގެން ފްރޭންކްފާޓްގެ ޑިރެކްޓަރު ވިދާޅުވީ، މިހާތަނަށް އައިއިރު ބަޔާނުން އެ ޓީމާ އެ ކަހަލަ މަޝްވަރާއެއް ނުވަތަ ޝައުޤުވެރިކަމެއް ފާޅުކޮށްފައި ނުވާ ކަމަށެވެ. ނަމަވެސް އޭނާ ވިދާޅުވި ގޮތުގައި ބަޔާން ކަހަލަ ޓީމަކުން ކޯލޯ މުއާނީ ހޯދުމަށް މަސައްކަތް ކުރުމަކީ އާދައިގެ ކަމެއް ކަމަށެވެ. އޭނާ ފާހަގަ ކުރެއްވި ގޮތުގައި ބޮޑެތި ކުލަބުތަކުން ފާރަލާ ވަަރުގެ ކުޅުމެއް ކޯލޯ މުއާނީ ދައްކަ އެވެ.

މީގެ އިތުރުން އޭނާ ވިދާޅުވީ، ކޯލޯ މުއާނީ ފްރޭންކްފާޓްގައި ހުރީ ވަރަށް ހިތްހަމަޖެހިގެން ކަމަށާއި، ކުލަބުން ވެސް ބޭނުންވަނީ އޭނާ ބަހައްޓަން ކަމަށެވެ. އޭނާ ވިދާޅުވީ ކޯލޯ މުއާނީ ހޯދުމަށް ގިނަ ކުލަބުތަކުން ޝައުޤުވެރިވާ ވާހަކަ މީޑިއާ އިން ފެންނަ ކަމަށެވެ. ނަމަވެސް ކޯލޯ މުއާނީ ހޯދުމުގެ ޝައުޤެވެރިކަން ގެންގުޅެނީ ބަޔާނުން އެކަނި ނޫން ކަމަށާއި، އެހެން ގިނަ ކުލަބުތަކުން ވެސް އެ ޝައުޤުވެރިކަން ގެންގުޅޭ ކަމަށެވެ. އެހެންކަމުން ފްރޭންކްފާޓް އިން އެކަމާމެދު ސަމާލުވާނެ ކަމަށް ވެސް އޭނާ ވިދާޅުވި އެވެ.

ފްރާންސް ލީގުގެ ނަންޓެސް ދޫކޮށް ކޯލޯ މުއާނީ ފްރޭންކްފާޓަށް ބަދަލުވީ މިދިޔަ އަހަރު އެވެ. އޭނާ ވަނީ މިހާތަނަށް އެ ޓީމަށް ކުޅެދީފައިވާ 39 މެޗުން 20 ލަނޑު ޖަހައިފަ އެވެ. މި ސީޒަނުގައި އޭނާ އަންނަނީ ވެސް މޮޅު ކުޅުމެއް ދައްކަމުންނެވެ.