ޗެލްސީ އަށް ކުޅެމުން އަންނަ ޕިއޭ-އެމެރިކް އޮބާމަޔަން އަލުން އެ ކުލަބަށް ގެނައުމުގެ ޝައުޤުވެރިކަން ސްޕެއިންގެ ބާސެލޯނާ އިން ގެންގުޅޭ ކަމަށް ބޭރުގެ މީޑިއާ ރިޕޯޓުތައް ބުނެފި އެވެ.
އޮބާމަޔަން ވަނީ މީގެ ކުރިން ވެސް ބާސެލޯނާ އަށް ކުޅެފަ އެވެ. އާސެނަލް ދޫކޮށް އޭނާ ބާސެލޯނާ އަށް ބަދަލުވީ މިދިޔަ އަހަރު އެވެ. އާސެނަލުން އޭނާއާއެކު ހަދާފައިވާ އެއްބަސްވުން އުވާލީ ހިލޭ ޓްރާންސްފާއެއްގަ އެވެ. އޭރު އޭނާ ބާސެލޯނާ އަށް ބަދަލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. ނަމަވެސް ބާސެލޯނާގައި ދިމާވި މާލީ މައްސަލަތަކުގެ ސަބަބުން އެ ކުލަބުން ވަނީ އޮބާމަޔަން ދޫކޮށްލައިފަ އެވެ. ބާސެލޯނާ ދޫކޮށް އޮބާމަޔަން ޗެލްސީ އަށް ބަދަލުވީ ދެ އަހަރު ދުވަހުގެ އެއްބަސްވުމެއްގެ ދަށުން މިދިޔަ އަހަރުގެ ސެޕްޓެމްބަރު މަހު އެވެ.
ބޭރުގެ މީޑިއާ ރިޕޯޓުތައް ބުނާ ގޮތުގައި އޮބާމަޔަން މިހާރު ބޭނުން ވަނީ ޗެލްސީ ދޫކޮށްލުމަށެވެ. އޭނާ އެ ކުލަބު ދޫކޮށްލަން ބޭނުންވަނީ އެންމެ އެދެވޭ ގޮތުގައި ފުރުސަތު ނުލިބޭތީ އެވެ. އަނެއްކޮޅުން އޮބާމަޔަން ދޫކޮށްލުމަށް ޗެލްސީން ވެސް އެއްބަސްވާނެ ކަމަށް ބޭރުގެ މީޑިއާތަކުގައި ވަނީ ބުނެފަ އެވެ. ބާސެލޯނާ ދޫކޮށް ޗެލްސީ އަށް ބަދަލުވި ފަހުން އޮބާމަަޔަން އެ ކުލަބަށް ކުޅެދީފައި ވަނީ 19 މެޗެވެ. އޭނާ ވަނީ ތިން ލަނޑު ޖަހައިފަ އެވެ. އޭގެ ތެރެއިން އިނގިރޭސި ޕްރިމިއާ ލީގުގައި އޮބާމަޔަން ކުޅެފައި ވަނީ އެންމެ 13 މެޗެވެ. އެހެންކަމުން އޮބާމަޔަން ބޭނުންވަނީ ޗެލްސީ ދޫކޮށް އަނެއްކާ ވެސް ބާސެލޯނާ އަށް އައުމަށް ކަމަށް ރިޕޯޓުތައް ބުނެ އެވެ. އެކަމުގެ ތެރެއިން ބާސެލޯނާގެ މާލީ ހާލަތު އޮތް ގޮތުން، ކުޑަ މުސާރައެއްގައި އަންނަން ވެސް އޭނާ ތައްޔާރަށް ހުރި ކަމަށް ރިޕޯޓުތައް ބުނެ އެވެ.
އަނެއްކޮޅުން، ބާސެލޯނާ އިން ވެސް އޭނާ ހޯދަން ބޭނުންވާ ކަމަށާއި، އެކަމުގެ މަޝްވަރާތައް ވެސް ކުރިއަށްދާ ކަމަށް ރިޕޯޓުތައް ބުނެ އެވެ. އޮބާމަޔަން ބާސެލޯނާ އަށް ގެނައުމަށް ބިނާވެގެންދާނީ ފައިނޭންޝަލް ފެއާ ޕްލޭގެ މައްޗަށެވެ. ބާސެލޯނާ އިން ކުރިއަށް އޮތް ސީޒަނަށް އައު ކުޅުންތެރިން ހޯދުމަށް ކުރާ މަސައްކަތުގައި އެކަމަށް ވަރަށް ބޮޑަށް ވިސްނަން ޖެހޭނެ އެވެ. މީގެ އިތުރުން ކުރީގެ ކެޕްޓަން ލިއޮނަލް މެސީ ގެންނަން މަސައްކަތް ކުރާ އިރު، ސްޕެނިޝް ލީގުން ބުނަނީ ބާސެލޯނާ އަށް މިވަގުތު މެސީ ގެންނަން ބޭނުންވާނަމަ ބާސެލޯނާ އިން އެ ކުލަބުގެ އެތައް ކަމެއް މާލީ ޤަވާއިދަށް ފައްތަން ޖެހޭނެ ކަމަށެވެ.
