މާބަނޑު އިރު މަސްތުވުން: އަލަށް އުފަންވާ މައުސޫމު ދަރިފުޅު "ޑިޓޮކްސް" ސެންޓަރަށް!

ތަފާތު އެކި ކަހަލަ މައްސަލަތަކުގެ ހާއްޔަކަށް ވެފައި ވާ އެމެރިކާގައި މިހާރު އެންމެ ބޮޑުވަމުން އަންނަ އެއް މައްސަލައަކީ ސިންތެޓިކް އޯޕިއޮއިޑްސް ނުވަތަ ތަދުކެނޑުވުމަށާއި އައްސިކޮށް ހިއްސު ކަނޑުވާލުން ކަހަލަ ކަންކަމަށް ދެމުން އަންނަ ޑޮކްޓަރީ ބޭސްތަކުގެ ބޭނުން، ނަހަމަ ގޮތުގައި ކުރުމުގެ މައްސަލައެވެ. މި ބާރުގަދަ ބޭސްތަކުގެ އެންމެ ބޮޑު ޝިކާރައަކަށް ވެފައި ވަނީ މި ދުނިޔެއަށް އަލަށް އުފަންވާ ތުއްތު ކުދިންނެވެ. އެރިޒޯނާގެ ފީނިކްސްގައި ހިންގާ ނަރސަރީއެއް ގުގުމަމުން ދަނީ، މިފަދަ އެތައް ކުދިންނެއްގެ ރުއިމުގެ އަޑުފަށްގަނޑުންނެވެ. މި ކުދިންނަކީ ބާރުގަދަ ބޭސްތަކާއި، މަސްތުވާތަކެތީގެ ނަހަމަ ބޭނުން ކުރި މައިންގެ ޝިކާރައަކަށް ވެ، ނާޒުކު ހާލަތެއްގައި ތިބި، މައުސޫމު ކުދިންތަކެކެވެ.

ހަޝަބައި ނަރސަރީގައި ފަރުވާ ދެމުންދާ ކުދިންނަކީ ނިއޯނޭޓަލް އެބްސްޓިނެންސް ސިންޑްރޯމް (ނަސް)ގެ ތަކުލީފުތައް އުފުލަމުންދާ، ތުއްތު ތުއްތު ކުދިންތަކެކެވެ. މި ބަލީގެ ޢަލާމާތްތަކަކީ، މާބަނޑު ދުވަސްވަރު މަސްތުވާތަކެތީގެ ނަހަމަ ބޭނުން ކުރި މައިންގެ ދަރިންގެ ކިބައިން ފެންނަ ފަދަ އަލާމާތްތަކެކެވެ. އެފަދަ ބައެއް އަލާމާތްތަކުގެ ތެރޭގައި ކޮންޓްރޯލް ކުރަން ދަތިވާ މިންވަރަށް ތުރުތުރެއް އެޅުމާ، މަސްގަނޑުތަކަށް ބާރު ކުރުމާއި، ފުންކޮށް މާނޭވާލާ އުސޫލުން ދަތި ހާލުގައި ނޭވާލުން ފަދަ އަލާމާތްތައް ހިމެނެއެވެ.

ހަޝަބައި ނަރސަރީގެ އެގްޒެކެޓިވް ޑައިރެކްޓަރ ޓޭރާ ސަންޑެމް ވިދާޅުވީ، ތުއްތު ކުއްޖެއްގެ ހަށިގަނޑުން މިފަދަ އަލާމާތްތަކެއް ފެނިގެންދާ މަންޒަރަކީ ދުވަހަކުވެސް ހަނދާން ނެތޭނެ ފަދަ މަންޒަރެއް ނޫން ކަމަށެވެ.

ނިއޯނޭޓަލް އެބްސްޓިނެންސް ސިންޑްރޯމް ހުންނަ ކުދިންނަކީ އަނދިރިކަމަށް ލޯބި ކުރާ ބައެކެވެ. އަދި މައިމީހާގެ ބަނޑުތެރޭގައި އޮތް އަރާމުވެއްޓަށް އިންތިހާއަށް ބޭނުންވާ ކުދި ބައެކެވެ. އެހެން ކަމުން، ހަޝަބައިގެ ކޮޓަރިތައް ހުންނަނީ، އަލިކަން ނުވަންނާނެހެން އަނދިރިކޮށްފައެވެ. އާންމު ދިރިއުޅުމުގެ ހަލަބޮލިކަމުންވެސް އެ ކޮޓަރިތައް ވަނީ ހިމާޔަތް ކޮށްދީފައެވެ.

ހަޝަބައި ނަރސަރީ ފަރުމާކޮށްފައި ވަނީ 12 ޕްރައިވެޓް ރޫމް ހިމެނޭ ގޮތަށެވެ. މި ކޮޓަރިތަކުގައި، ބެލެނިވެރިންނަށްވެސް ތިބެވޭނެ އިންތިޒާމު ވަނީ ހަމަޖައްސާފައެވެ. އެއީ ތުއްތު ދަރިފުޅުގެ ޑިޓޮކްސް މަރުހަލާ ނިމެންދެކަށެވެ. ނިއޯނޭޓަލް އެބްސްޓިނެންސް ސިންޑްރޯމްއަށް އާންމު ހޮސްޕިޓަލުތަކުން ފަރުވާ ހޯދާ ކުދިން، ހޮސްޕިޓަލުތަކުގައި 21 ވަރަކަށް ދުވަސް ހޭދަ ކުރި ނަމަވެސް، ހަޝަބައި ނަރސަރީގައި ކުދިން ހޭދަ ކުރަނީ އެންމެ 8 ވަރަކަށް ދުވަހެވެ. އަލަށް އުފަންވާ ތުއްތު ކުދިންގެ ތެރެއިން ހާއްސަ ސިއްހީ ފަރުވާ ބޭނުންވާ ކުދިންނަށް އަމާޒުކޮށްގެން ފަރުމާކޮށްފައި ހުންނަ ނިއޯނޭޓަލް އިންޓެންސިވް ކެއަރ ޔުނިޓް (ނިކޫ)އާ ޚިލާފަށް، ހަޝަބައި ނަރސަރީއަކީ، މުޅި ޢާއިލާއަށް އެއް ފުރާޅެއްގެ ދަށުން ފަރުވާ ދެވޭ ގޮތަށް ފަރުމާކޮށްފައިވާ ތަނެކެވެ. އަދި ވަކިވަކި ޕޭޝަންޓުންނަށްވެސް ފަރުވާ ދިނުމުގެ އިންތިޒާމް، އެތަނުގައި ވަނީ ހަމަޖައްސާފައެވެ.

ހަޝަބައި ނަރސަރީއިން ފަރުވާ ހޯދި އެކަކީ ކްލެރިސާ ކޮލިންސްއެވެ. އޭނާގެ އަންހެން ދަރިފުޅަށް އެ ފަރުވާ ހޯދީ އޭޕްރިލް 2019ގައެވެ. އޭރު ހަޝަބައި ނަރސަރީ ނެތެއް ކަމަކު، ސަންޑެމް ޚިދުމަތް ދެމުން ދިޔައީ އެކިއެކި ފަރާތްތަކާ ގުޅިގެންނެވެ.

ކޮލިންސްއަކީ މިހާރު، އޭނާ ފަދަ ތަކުލީފުތައް އުފުލަމުންދާ އެހެން މައިންނަށް އެހީ ފޯރުކޮށްދިނުމުގައި ދެމިހުރި މައެކެވެ.

ފީނިކްސްގައި ހިންގާ ބޭނަރ ޔޫނިވަރސިޓީ މެޑިކަލް ސެންޓަރ ނިކޫގައި މަސައްކަތް ކުރައްވާ ނިއޯނޭޓޮލޮޖިސްޓް އަދި މެޑިކަލް ޑައިރެކްޓަރ، ޑރ ސުމާ ރާއޯ ވިދާޅުވީ، ނިއޯނޭޓަލް އެބްސްޓިނެންސް ސިންޑްރޯމްއާއެކު އުފަންވާ ކުދިންގެ ޢަދަދު އިތުރު ވަމުން އަންނަ ކަމަށެވެ. ޙަޤީޤީ ޢަދަދުތައް އިތުރުވުން އެކަށީގެންވާ ކަމަށާ، އެއީ ހުރިހާ ކުދިންނަކީ ހޮސްޕިޓަލް ނިޒާމުގެ ތެރެއަށް އުފަންވާ ކުދިންނަށް ނުވުންކަންވެސް ޑރ ރާއޯ ވަނީ ފާހަގަ ކުރައްވާފައެވެ.

އެމެރިކާގެ ސެންޓަރ ފޮރ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ)އިން އާންމު ކޮށްފައިވާ ތަފާސް ހިސާބުތަކަށް ބަލާއިރު، ނިއޯނޭޓަލް އެބްސްޓިނެންސް ސިންޑްރޯމްއަށް ޕޮޒިޓިވްވެފައިވާ ތުއްތު ކުދިންގެ ޢަދަދު، 2010 ވަނަ އަހަރާއި 2017 ވަނަ އަހަރާ ދެމެދު ވަނީ 82 ޕަސެންޓް އިތުރު ވެފައެވެ. 2020 ވަނަ އަހަރު، ވިހައިގެން ހޮސްޕިޓަލުގައި ތިބި ކޮންމެ 1000 ކުއްޖަކުން 6 ކުއްޖަކީ، ނިއޯނޭޓަލް އެބްސްޓިނެންސް ސިންޑްރޯމްގެ ތަކުލީފުތައް އުފުލި ކުއްޖެއް ކަމަށް މައުލޫމާތު ލިބެއެވެ.

ސިންތެޓިކް އޯޕިއޮއިޑްސްގެ ތެރޭގައި ހިމެނޭ ފެންޓަނީލް އެތެރެ ކުރުމަށް ޣައިރު ޤާނޫނީ ގޮތެއްގައި ކުރަމުންދާ މަސައްކަތްތައް ހުއްޓުވުމަކީ އެމެރިކާގެ ކަމާ ބެހޭ އިދާރާތަކުން މިވަގުތު އެންމެ އިސްކަމެއް ދޭ އެއް ކަންތަކެވެ. އެމެރިކާއާއި މެކްސިކޯގެ ކަމާ ބެހޭ ފަރާތްތަކުން ދަނީ، ފެންޓަނީލް ސަޕްލައިކުރާ ޗޭނުތައް ބުރިބުރިކޮށް، މަސްތުވާތަކެތީގެ ވިޔަފާރި ކުރާ ވަރުގަދަ ކަރޓެލްތަކުގެ ބާރު ކަނޑުވާލުމަށް، ދަތިކުރުމުގެ ފިޔަވަޅުތައް އިންތިހާއަށް ވަރުގަދަ ކުރަމުންނެވެ.