ދެ ވަނަ މެޗުން ޖީހާން އާއި ޝާޒު ވެސް މޮޅުވެއްޖެ

ރާއްޖޭގައި މިހާރު ކުރިއަށްދާ މޯލްޑިވްސް އޯޕަން 10 ބޯލް ބިލިއާޑް މުބާރާތުގައި އާދިއްތަ ދުވަހު ކުޅުނު މެޗުން ރާއްޖޭގެ އިސްމާއީލް ޖީހާން އާއި ޙަސަން ޝާޒު މުޙައްމަދު ވެސް މޮޅުވެއްޖެ އެވެ.

ޖީހާން މޮޅުވީ އިންޑިއާގެ ލަކްޝް ޝަރްމާއާ ވާދަކޮށެވެ. އެ މެޗުގައި ޖީހާން ވަނީ 7-0 ގެ ފްރޭމަކުން ލަކްޝް ޝަރުމާގެ މައްޗަށް ކުރި ހޯދައިފަ އެވެ. ޝާޒުގެ މެޗުގައި އޭނާ ނިކުތީ އިންޑިއާގެ ރަޔާން ރަޒްމީއާ ދެކޮޅަށެވެ. އެ މެޗުން ޝާޒު މޮޅުވީ 7-4 ގެ ފްރޭމަކުންނެވެ. އެއީ ރަޔާން ރަޒްމީ ކުރީގައި އޮއްވާ، ފަހަތުން އަރައި އެއްވަރުކޮށް، ކުރި ހޯދައިގެންނެވެ. މި ދެ ކުޅުންތެރިން ވެސް ވަނީ ކުޅުނު ފުރަތަމަ މެޗުގައި ރަނގަޅު ވާދައެއްކޮށް، ބަލިވެފަ އެވެ. މި މުބާރާތުގައި މީގެ ކުރިން ވެސް ރާއްޖޭގެ ތިން ކުޅުންތެރިން ވަނީ ކުޅުނު މެޗުތައް ކާމިޔާބުކޮށްފަ އެވެ. އެއީ ޙުސެއިން ފަޔާޒް، މުޙައްމަދު ޝަރީފް އަދި އަޙުމަދު ޝިހާދު އެވެ. އެ ތިން ކުޅުންތެރިން ވެސް ވަނީ ގަދަ 32 ގެ ޕްލޭ އޮފް މެޗުގައި ވާދަކޮށް ބަލިވެ، މުބާރާތުން ކަޓައިފަ އެވެ.

ޑަބަލް އެލިމިނޭޝަން އުސޫލުން ކުރިއަށްދާ ގްރޫޕް ސްޓޭޖުގައި ޖީހާން އާއި ޝާޒު އަށް އާދިއްތަ ދުވަހުގެ ރޭ މެޗެއް އޮންނާނެ އެވެ. އެ މެޗުން މޮޅުވެގެން ދެ ކުޅުންތެރިންނަށް ވެސް އަނެއް ބުރަށް ދިޔުމުގެ ފުރުސަތު އޮންނާނެ އެވެ. މިއީ ރާއްޖޭގައި ބާއްވާ ބިލިއާޑުގެ ބައިނަލްއަޤުވާމީ ފުރަތަމަ މުބާރާތެވެ. ދުނިޔޭގެ ރޭންކިންގެ އެންމެ ކުރީގައި އުޅޭ އެތުލީޓުންނާއެކު ރާއްޖޭގައި މުބާރާތް ކުރިއަށް ދާނީ ހޮނިހިރު ދުވަހުން ފެށިގެން ބުދަ ދުވަހުގެ ނިޔަލަށެވެ. މުބާރާތުގައި ރާއްޖެއިން ވާދަ ކުރަނީ 16 ކުޅުންތެރިންނެވެ.