ޖަރުމަނު ލީގުގައި މައިންޒާ ދެކޮޅަށް ކުޅުނު މެޗުން ބަލިވެ ޗެމްޕިއަން ބަޔާން މިއުނިކަށް ނުތަނަވަސްކަން ކުރިމަތިވީއިރު، ކޯޗު ތޯމަސްް ޓުޗެލްއަށް ޕްރެޝަރު ބޮޑުވެއްޖެ އެވެ.

މައިންޒު އަތުން ބަލިވެ ބަޔާނަށް ވަނީ ލީގު ތާވަލްގެ އެއް ވަނަ މަގާމު ގެއްލިފަ އެވެ. އަނެއްކޮޅުން ބަޔާން މި ވަނީ ޖެހިޖެހިގެން ހަތަރު މެޗުން މޮޅުނުވެ ނިންމާލަން ޖެހިފަ އެވެ. އެންމެ ފަހުން ޓުޗެލްގެ އިރުޝާދުގެ ދަށުން ބަޔާން މޮޅުވީ ޖަރުމަނު ލީގުގައި ފްރެއިބާގާ ދެކޮޅަށް ކުޅުނު މެޗުންނެވެ. އޭގެ ފަހުން ހަތަރު މެޗު ކުޅުނުއިރު، ތިން މެޗުން ވަނީ ބަލިވެފަ އެވެ. އެއް މެޗު ނިމުނީ އެއްވަރުވެގެންނެވެ.

މައިންޒުގެ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ބަޔާން އެވެ. އެއީ 29 ވަނަ މިނެޓުގައި ޔާއޯ ކަންސޭލޯ ތަނަވަސްކޮށްދިން ފުރުސަތެއްގައި ސެނެގާލް ފޯވާޑް ސަޑިއޯ މާނޭ ޖެހި ލަނޑުންނެވެ. ދެ ވަނަ ހާފަށް ނުކުމެ މައިންޒުން ވަނީ ތިން ލަނޑު ޖަހައިގެން މެޗުން މޮޅުވެފަ އެވެ. މެޗުގެ 65 ވަނަ މިނެޓުގައި މައިންޒަށް ނަތީޖާ ހަމަހަމަކޮށްދިނީ ލުޑޮވިޗް އަޖޯކޭ އެވެ. އޭގެ ފަހުން ގާތްގާތުގައި އުފެއްދި ހަމަލާތަކުން މައިންޒު ވަނީ ލީޑު ނަގައިފަ އެވެ. މައިންޒަށް މެޗުގައި ލީޑު ނަގައިދިނީ 73 ވަނަ މިނެޓުގައި ލިއަންޑްރޯ ބާރެއިރޯ މާޓިންސް އެވެ. އޭގެ ހަ މިނެޓު ފަހުން މައިންޒަށް މެޗުން ފުރިހަމަ މޮޅެއް ހޯދައިދިނީ އާރޮން މާޓިން ކެރިކޯލް އެވެ.

މޮޅާއެކު މައިންޒު ވަނީ ލީގު ތާވަލްގެ ހަ ވަނަ އަށް ޖެހިލައިފަ އެވެ. އެއީ މިހާތަނަށް އެ ޓީމު ކުޅުނު 29 މެޗުން 45 ޕޮއިންޓާއެކު އެވެ. މެޗުން ބަލިވި ބަޔާން އޮތީ 29 މެޗުން 59 ޕޮއިންޓާއެކު ދެ ވަނައިގަ އެވެ. މިއީ ލީގުގެ ފަހު ކޮޅުގައި ބަޔާނަށް ކުރިމަތިވާނެ ޕްރެޝަރެކެވެ. މި ސީޒަނުގައި ބަޔާނުން ވަނީ ޖަރުމަނު ކަޕުންނާއި ޔުއެފާ ޗެމްޕިއަންސް ލީގުން ވެސް ކަޓައިފަ އެވެ.