ސައުދީ ޕްރިންސް އާއި ޕޫޓިން އާއި ދެމެދު އޯޕެކް ޑީލް އާއި ތެލާއި ގުޅުން ހުރި މަޝްވަރާތަކެއް

ސައުދީ އަމީރު މުހައްމަދު ބިން ސަލްމާން އާލް ސައުދު އާއި ރަޝިއާގެ ރައީސް ވްލަޑިމިއާ ޕޫޓިން އާއި ދެމެދު އޯޕެކް ޑީލް އާއި ތެލާއި ގުޅުން ހުރި މަޝްވަރާތަކެއް ކުރައްވައިފިއެވެ.

އޯޕެކް އާއި ތެޔޮ އުފައްދާ ކުންފުނިތަކުން ވަނީ މި މަހުގެ ކުރީކޮޅު ތެޔޮ އުފައްދާ މިންވަރު މަދުކުރަން ނިންމާ އެކަން އިޢުލާންކޮށްފައެވެ. މިހާރު ތެޔޮ އުފައްދާ މިންވަރަކީ ކުރިއާއި އަޅާ ބަލާ ނަމަ ދުވާލެއްގެ މައްޗަށްދަނީ ގާތްގަނޑަކަށް 1.6 މިލިއަން ފީފާ މަދު އަދަދެކެވެ.

މީޑިއާތަކުން ރިޕޯޓްކޮށްފައިވާ ގޮތުން މި މަޝްވަރާތައް ކުރައްވާފައި ވަނީ ހުކުރު ދުވަހު އެ ދެބޭފުޅުންގެ މެދުގައި ކުރެއްވި ފޯންކޯލެއްގައެވެ. އެ ދެ ބޭފުޅުންގެ މެދުގައި ކުރެއްވި މަޝްވަރާތަކުގެ ތެރޭގައި މެދުއިރުމަތީގެ މައްސަލަތައް ހައްލުކުރެވިދާނެ ގޮތާއި ގުޅޭގޮތުން މަޝްވަރާކުރައްވާފައިވެއެވެ. މި ފަދަ މަޝްވަރާތަކެއް ކުރައްވާފައި މި ވަނީ ފާއިތުވި ދިހަ އަހަރުގެ ތެރޭގައި ފުރަތަމަ ފަހަރަށް ސައުދީގެ ޚާރިޖީ ވަޒީރަކު ސީރިއާ އަށް ދަތުރުކުރެއްވިތާ ދުވަސްކޮޅެއް ފަހުންނެވެ.

އެ ދެބޭފުޅުން ވަނީ އިގްތިސާދީ ގުޅުންތަކާއި ބެހޭގޮތުން މަޝްވަރާކުރައްވާފައެވެ. އެގޮތުން ދެ ޤައުމުގެ ދެމެދުގައި އޮތް ވިޔަފާރީގެ ގުޅުންތައް ވަރުގަދަކޮށް ގުޅުން ބަދަހިކުރުމާއި މެދު މަޝްވަރާކުރައްވާފައިވެއެވެ. އަދި އޯޕެކް އާއި ތެލުގެ އަގު އެއް މިންވަރެއްގައި ހިފެހެއްޓުމާއި މެދު ދެ ބޭފުޅުން ވަނީ މަޝްވަރާކުރައްވާފައެވެ. ތެލުގެ ބާޒާރު އެއްގޮތެއްގައި ދެމެހެއްޓުމަށް ދެ ގައުމުން ކުރާ މަސައްކަތާއި މެދު ހިތްހަމަޖެހޭ ކަމަށް މި މަޝްވަރާތަކުގައި ދެ ބޭފުޅުން ވިދާޅުވެފައިވެއެވެ. '

މީގެ އިތުރުން އެ މަޝްވަރާތަކުގެ ތެރެއިން ސައުދީ ސަރުކާރާއި، ބްރެޒިލް، ޗައިނާ، އިންޑިއާ، ރަޝިއާ އަދި ދެކުނު އެފްރިކާ އާއި އޮތް ގުޅުމާއި މެދު ވެސް ވާހަކަދެކެވުނު ކަމަށް ރިޕޯޓްތައް ބުނެއެވެ. ނަމަވެސް އެކަމުގެ ތަފްސީލްތައް ދެ ގައުމުން ހިއްސާކުރައްވާފައެއް ނުވެއެވެ. އެ ފޯންކޯލުގައި ޕޫޓިން ވަނީ ފިތުރު ޢީދުގެ ތަހުނިޔާ ސައުދީ އަމީރަށް ދަންނަވާފައެވެ.

މީޑިއާތަކުން ބުނާގޮތުން މި ފޯނުކޯލް ކުރިއަށް ދިޔައީ ވަރަށް ރަހުމަތްތެރި ބަދަހި މާހައުލެއްގައެވެ. އަދި އެ މަޝްވަރާތަކުގައި މުހިންމު މައުލޫމާތުތަކެއް ދެ ބޭފުޅުންގެ މެދުގައި ބަދަލުކުރިއެވެ.

މީގެ ކުރިން ރަޝިއާ ޔޫކްރެއިން ހަނގުރާމައާ ގުޅިގެން ރަޝިއާ އާއި ދެކޮޅަށް އަޅާ ފިޔަވަޅުތަކުގެ ތެރެއިން ރަޝިއާ އިން ތެޔޮ ގަންނަ އަގު ކޮންޓްރޯލުކުރުމަށް އީޔޫ އާއި ޖީ7ގެ އިތުރުން ހުޅަނގުގެ ބައެއް ގައުމުތަކުން ނިންމި ނަމަވެސް އެ ނިންމުން ބަލައިނުގަންނަ ކަން ރަޝިއާ އިން ވަނީ ހާމަކޮށް ފައެވެ.