ކ.ކާށިދޫގައި ހުންނަ ކ. އަތޮޅު މަދަރުސާގައި މިއަހަރުގެ އޭލެވެލްއަށް ކިޔަވައިދޭން ފެށޭނެ ކަމަށް އެޑިޔުކޭޝަން މިނިސްޓަރީން ބުނެފިއެވެ.
މިމަހުގެ 10 ވަނަ ދުވަހު ރައްޔިތުންގެ މަޖިލީހުގައި ވާހަކަދައްކަވަމުން އެޑިޔުކޭޝަން މިނިސްޓަރު ޑރ.އައިޝަތު އަލީ ވިދާޅުވީ ކާށިދޫ ސްކޫލުގައި ގްރޭޑް 12 އުފެއްދުމަށް އެސެސްމެންޓްތައް ހަދަމުންދާ ކަމަށާއި، މިއަހަރު އޭލެވެލް ތައާރަފް ކުރާ ސްކޫލުތަކުގެ ތެރޭގައި ކާށިދޫ ސްކޫލު ހިމެނޭ ކަމަށެވެ. އަދި ވިދާޅުވީ މިހާރު ވެސް 15 ކުދިން އެބަތިބި ކަމަށާއި، މިއަހަރުގެ އޮގަސްޓް މަހާއި ހަމައަށް އެކުދިން ސްކޫލުގައި ތިބޭ ކަމަށްވާނަމަ އޭލެވެލް ތައާރަފް ކުރެވޭނެ ކަމަށެވެ.
މިނިސްޓަރު ވިދާޅުވީ އަތޮޅުތެރޭގެ ސްކޫލުތަކުގައި އޭލެވެލް ތައާރަފް ކުރުމުގެ މަސައްކަތްތައް ކުރިއަށްދާ ކަމަށެވެ. އަދި އޭލެވެލް ފެށުމަށް ބަލާ ކަންކަން ފުރިހަމަވާނަމަ ނުވަތަ ޝަރުތު ހަމަވާނަމަ އެފުރުސަތު ދޭނެ ކަމަށް މިނިސްޓަރު ވިދާޅުވިއެވެ.
ކާށިދޫ ދާއިރާގައި ގްރޭޑް 12 އުފެއްދުމަށް އަޅުގަނޑުމެން މިދަނީ އެސެސްމެންޓްތައް ހަދަމުން. އަޅުގަނޑުމެންނަށް 15 ކުދިން ލިބޭ ކަމަށްވާނަމަ ކާށިދޫގައި ފެށޭނެ. ދެން މިއަހަރު ކ.އަތޮޅުގައި ފެށޭ ރަށްތަކުގައި ކާށިދޫ ހިމެނިފައިވާނީ. އެއީ މިހާރު 15 ކުދިން އެބަތިބި. އެކުދިން އޮގަސްޓާ ހަމައަށް ތި ރަށުގައި ތިބޭ ކަމަށްވާނަމަ އިރާދަކުރެއްވިއްޔާ ފޭށޭނެއެޑިޔުކޭޝަން މިނިސްޓަރު ޑރ.އައިޝަތު އަލީ
ކާށިދޫ ސްކޫލުގައި މިހާރު ވެސް ގިނަ އަދަދެއްގެ ދަރިވަރުން ތައުލީމް ހާސިލް ކުރަމުން ދެއެވެ. ފައުންޑޭޝަން ސްޓޭޖުން ފެށިގެން ގްރޭޑު 10 އަށް ކިޔަވައިދޭ ސްކޫލުގައި 500 އެއްހާ ދަރިވަރުން ކިޔަވަ އެވެ. އެރަށުގައި އޭލެވެލްއަށް ނުކިޔެވުމަކީ ދަރިވަރުންނާއި ޓީޗަރުން އަދި ބެލެނިވެރިންގެ ވަރަށް ބޮޑު ކަންބޮޑުވުމެކެވެ. އަދި އޭލެވެލްއަށް މާލެއަށް ނުވަތަ އެހެން ވެސް ރަށަކަށް ދާން ނުޖެހި އެރަށުގެ ސްކޫލުގައި އޭލެވެލް ފެށިގެން ދިއުމަކީ ދަރިވަރުންނާއި ޓީޗަރުން އަދި ބެލެނިވެރިނަށް ލިބޭނެ ވަރަށް ބޮޑު އުފަލަކެވެ.
މިސަރުކާރުން ތައުލީމީ ސިޔާސަތު ހަރުދަނާ ކުރުމަށް ގިނަ މަސައްކަތްތައް ދަނީ ކުރަމުންނެވެ. އެގޮތުން ކޮންމެ އަތޮޅެއްގައި ވެސް މަދުވެގެން އެއް ސުކޫލުގައި އޭލެވެލްއަށް ކިޔަވައި ދޭން ނިންމި ނިންމުމަކީ ތައުލީމީ ސިޔާސަތަށް ގެންނަމުންދާ ހެޔޮ ބަދަލުތަކުގެ ތެރެއިން އެއް ބަދަލެވެ.
