ޕްރެޒިޑެންޓްސް ކަޕްގައި ކުލަބު އީގަލްސް އިން ކުޅުނު ފުރަތަމަ މެޗުގެ ކުރީކޮޅު މާ ބޮޑަށް އުނދަގޫވީ ކުޅުންތެރިން މެޗު ފަސޭހަކޮށްލުމުން ކަމަށް އެ ޓީމުގެ ކޯޗު އިޙުސާން ޢަބްދުލް ޣަނީ (ސާންތީ) ބުނެފި އެވެ.

އީގަލްސްގެ ފުރަތަމަ މެޗުގައި އެ ޓީމުން ވަނީ 4-2 އިން ސުޕަ ޔުނައިޓެޑު ސްޕޯޓްސް (ސަސް) ބަލިކޮށްފަ އެވެ. އެއީ ފުރަތަމަ ހާފުގައި ސަސް އިން ދެ ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައު ހަތަރު ލަނޑު ޖަހައިގެންނެވެ. މެޗަށް ފަހު ވާހަކަ ދައްކަމުން ސާންތީ ބުނީ، އީގަލްސް އަށް ލިބުނީ ކުޅުންތެރިން ކުރި ބުރަ މަސައްކަތުގެ ނަތީޖާ ކަމަށެވެ. އޭނާ ފާހަގަ ކުރި ގޮތުގައި މެޗުގެ ކުރީކޮޅު އީގަލްސްގެ ކުޅުންތެރިން ފަސޭހަކޮށްލި ނަމަވެސް، ފަހުން ކުޅުންތެރިން ވަނީ އެމީހުންގެ ސަތޭކަ އިންސަތައް ދައްކައިފަ އެވެ. ސާންތީ ބުނި ގޮތުގައި ގިނަ ފަރިތަކުރުންތަކެއް ކުރި ނަމަވެސް، މެޗެއް ނުކުޅެ ގިނަ ދުވަހު ތިބެން ޖެހުމުން އެކަމުގެ އަސަރު ވެސް ކުރާނެ ކަމަށެވެ.

ސާންތީ ބުނީ ދެ ލަނޑުގެ ލީޑަކުން ފަހަތުގައި އޮއްވާ މެޗުން އަލުން ހޯދުނީ އެ ޓީމުގެ އިސް ކުޅުންތެރިންގެ ބުރަ މަސައްކަތުން ކަމަށެވެ. ޚާއްސަކޮށް އީގަލްސްގެ އަޙުމަދު ރިޒުވާން (ރިޒޭ)، އިމްރާން ނަޝީދު (އިއްމަ) އަދި އިބްރާހީމް މުބީން އަޙުމަދު ރަޝީދު (މުއްކި)ގެ ނަންނ ސާންތީ ވަނީ ފާހަގަކޮށްފަ އެވެ. އެ ކުޅުންތެރިންނަކީ އީގަލްސް އަށް ކޮންމެ ކޮންމެ ގޮތެއް ވާން ބަލަހައްޓައިގެން ތިބޭނެ ކުޅުންތެރިން ނޫން ކަމަށް ފާހަގަކުރަމުން ސާންތީ ބުނީ، މެޗުގެ ނަތީޖާ އަނބުރާލެވުނީ އެ ކުޅުންތެރިންގެ "ނުފޫޒުން" ކަމަށެވެ. އެހެންކަމުން އެއީ ކުލަބެއް ބިނާ ކުރުމުން އޮންނަ ފައިދާއެއް ކަމަށާއި، ތަންތަނުން ކުޅުންތެރިން ގެނައުމަށްވުރެ ފައިދާ ބޮޑީ ވެސް އެ ގޮތް ކަމަށެވެ.

މީގެ އިތުރުން ސާންތީ ބުނީ މެޗުގައި ރިޒޭ ބޭނުން ކުރީ މެޑިކަލް ޓީމުގެ ލަޔަފާއެކު ކަމަށެވެ. އެގޮތުން ނުވަ ދިހަ މިނެޓު ނުކުޅެވުނު ނަމަވެސް، މެޗުގެ ކޮންމެ ވެސް ހިސާބެއްގައި ކުޅެވޭނެ ވަރު ވާނެ ކަމަށް މެޑިކަލް ޓީމުން ބުނި ކަމަށެވެ. އެހެންކަމުން މެޗުގައި ރިޒޭ ބޭނުން ކުރުމަށް ނިންމި ނިންމުމަކީ ރަނގަޅު ނިންމުމެއް ކަމަށް ވެސް ސާންތީ ބުންޏެވެ.

އީގަލްސް އަށް ދެން އޮންނާނީ އަންނަ ހޯމަ ދުވަހުގެ ރޭ ކުލަބު ވެލެންސިއާއާ ދެކޮޅަށް ކުޅޭ މެޗެވެ.