ނަޝީދަށް 55 ވަރަކަށް މިލިއަން ރުފިޔާ ޚަރަދުކުރަން އެކަށީގެންނުވާ ކަމަށް ޝަހީމް ވިދާޅުވުމުން މެންބަރުންގެ ނުރުހުން
19 އެޕްރީލު 2023 | ބުދަ 07:51މަޖިލީހުގައި ވަރަށް ހޫނު ބަހުގެ ހަމަލާތަކެއް ވަނީ މެންބަރުންގެ މެދުގައި ބަދަލުކޮށްފައި
މެންބަރު ހުސެއިން ޝަހީމް، އިމްތިޔާޒް އަދި އިބްރާހީމް ރަޝީދު
ދެ އަހަރާއި ބައި ވެރިކަންކުރައްވާ އިސްތިއުފާދެއްވި ބޭފުޅަކަށް 55 ވަރަކަށް މިލިއަން ރުފިޔާ ހޭދަކުރުމަކީ ރާއްޖެ ފަދަ ކުޑަ ބަޖެޓެއް އޮތް ޤައުމަކަށް އެކަށީގެންވާ ކަމެއް ނޫން ކަަމަށް ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން) ވިދާޅުވެއްޖެއެވެ.
ބުދަ ދުވަހު އޭނާ އެފަދައިން ވިދާޅުވީ ދިވެހިރާއްޖޭގެ ފަތުރުވެރިކަމުގެ ސިނާއަތުގެ ވަޒީފާތަކުގެ ތެރޭގައި ހިމެނޭ ރިސޯޓު މެނޭޖަރުކަމާއި، އެޗް.އާރް މެނޭޖަރުކަމާއި، ޗީފް އެކައުންޓެންޓުގެ މަޤާމަށް ހަމައެކަނި ދިވެހިންނަށް އަދާކުރެވޭ މަޤާމެއްކަމަށް ކަނޑައެޅުމާބެހޭ ގޮތުން ބަހުސްކުރައްވަމުންނެވެ. އެ ބަހުސްގައި ޝަހީމް ވަނީ ރާއްޖޭގެ ޚަރަދުތައް ބޮޑުކަމަށް ވިދާޅުވެ ޚަރަދުތައް ކުޑަކުރެވިދާނެ ގޮތާމެދު ވާހަކަދައްކަވާފައެވެ. ޝަހީމްގެ ވާހަކައިގައި ދައުލަތުގެ އިސް މަޤާމުތަކުގައި ތިއްބަވާ ފަރާތްތަކަށް ކުރާ ޚަރަދު ބޮޑު ކަމަށް ވެސް ވިދާޅުވިއެވެ. އަދި ރާއްޖޭގެ ބަޖެޓު އެކުލަވާލާއިރު އިގްތިސާދުކުރަން ޖެހޭ ކަމަށް ވިދާޅުވިއެވެ. އެ ހިސާބުން މަޖިލީހުގައި ތިއްބެވި ކުރީގެ ރައީސް މުހައްމަދު ނަޝީދަށް ތާއީދުކުރާ މެމްބަރުން ވަނީ ޝަހީމްގެ ވާހަކަ ކުރިއަށް ގެންދިއުމަށް ހުރަސް އަޅުއްވާ ނިޒާމީ ނުކުތާ ނަންގަވައިގެން ޝަހީމް އަށް ރައްދު ދެއްވާފައެވެ.
އެގޮތުން މާފަންނު މެދު ދާއިރާގެ މަޖިލިސް މެންބަރު އިބްރާހީމް ރަޝީދު (ބޮންޑެ) އާއި މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި) އާއި ދެ ބޭފުޅުން ވަނީ ސެކިއުރިޓީ އަށް ކުރާ ޚަރަދު ކުޑަ ކުރަނީ ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދަށް ދިން ޓެރަރިސްޓް ހަމަލާ ފަދަ ކަންކަމަށް ފުރުސަތު ދިނުމަށްތޯ ސުވާލުކުރައްވާފައެވެ. އަދި އެއީ ނަޝީދަށް އޮތް ނުރައްކާ ބޮޑުވާ ކަމެއް ކަަމަށް ވިދާޅުވެ ބައެއް މެންބަރުން ވަނީ ވަރަށް ބޮޑަަށް ފާޑު ވިދާޅުވެފައެވެ. މީގެއިތުރުން ނަޝީދު މަރާލަން އުޅޭ ކަމަށް ތުހުމަތުކޮށް އެ މެންބަރުން ވަނީ ވާހަކަދައްކަވާފައެވެ.
މެންބަރުންގެ އެ ވާހަކަތަކަށް ރައްދު ދެއްވަމުން ޝަހީމް ވިދާޅުވީ ސެކިއުރިޓީ އަށް ކުރާ ޚަރަދު ކުޑަ ކުރަން ވަކާލާތު ނުކުރައްވާ ކަަމަށެވެ. އޭނާ ދެއްކެވީ މަޖިލީހުގެ ރައީސަށް ކުރާ ޖުމުލަ ޚަރަދު ބޮޑުވުމުގެ ވާހަކަ ކަމަށް ޝަހީމް ވިދާޅުވިއެވެ. އަދި ސެކިއުރިޓީ އަކަށްޓަކައި 23 މިލިއަން ރުފިޔާގެ ބަޖެޓެއް ފާސްކޮށްދީފައިވާނެ ކަމަށް އޭނާ ވިދާޅުވިއެވެ.
ޝަހީމް ވިދާޅުވީ ރައްޔިތުންގެ ފައިސާ ހޭދަކުރާ އިރު ވިސްނާލަން ޖެހޭ ކަމަށެވެ. ކުޑަ ޤައުމެއްގައި 55 މިލިއަން ރުފިޔާ ދެ އަހަރާއި ބައި ވެރިކަން ކުރެއްވި ބޭފުޅަކަށް ހޭދަކުރުމަކީ ވިސްނަން ޖެހޭ ކަމެއް ކަަމަށާއި އެކަން ރީސްޓްރަކްޗަރ ކުރަން ޖެހޭ ކަމަށް ޝަހީމް ވަނީ ވިދާޅުވެފައެވެ. މި ވާހަކަތަކާއި ގުޅިގެން މެންބަރުންގެ މެދުގައި ވަރަށް ހޫނު ބަހުސެއް ކުރިއަށް ދިޔައެވެ. އަދި މެންބަރު އިމްތިޔާޒް އާއި އިބްރާހީމް ރަޝީދު އަދި ޝަހީމުގެ މެދުގައި ބަހުގެ ހަމަލާތައް ބަދަލުކުރިއެވެ.
މީގެ އިތުރުން ނަޝީދަށް އަމާޒުކޮށް ޒާތީވެގެން ވާހަކަދައްކާ ކަމަށް ފާހަގަކުރެއްވޭ ކަމަށާއި އެ ވާހަކަތައް މަޖިލީހުގައި ނުދެއްކޭނެ ކަަމަށް މެންބަރު އިމްތިޔާޒް ވިދާޅުވިއެވެ. އެ ނިޒާމީ ނުކުތާއާ ގުޅިގެން މަޖިލީހުގެ ނައިބު ރައީސް އީވާ ވިދާޅުވީ ނަފްރަތު އުފެދޭ ގޮތަށް ވާހަކަދެއްކުމަކީ މަޖިލީހުގައި ނިޒާމީ މައްސަލައިގެ ތެރޭގައި އޮންނަ ކަމެއް ނޫން ކަމަށެވެ. މެންބަރު ޝަހީމް ވިދާޅުވީ ނަޝީދާއި ޒާތީ ކަމެއް ނެތް ކަމަށާއި އެގޮތަށް ދެކެނީ ސިކުނޑީގެ އުނިކަމެއް ހުރުމުން ކަމަށެވެ.
