އަރިދަފުސް ރޯގާއާއި ކޮވިޑް އިތުރުވަނީ، ދަތުރުކުރާއިރު ސަމާލުވޭ!

އަނެއްކާވެސް ކޮވިޑް-19އާއި އަރިދަފުސް ރޯގާ މިވަނީ އިތުރުވާން ފަށާފައެވެ. މިގޮތުން ދުވަސްތަކަކަށްފަހު، މި އަހަރުގެ މާޗް މަހުގެ ފަހުކޮޅުން ފެށިގެން ރާއްޖޭގައި ކޮވިޑްގެ ކޭސްތައްވެސް ވަނީ އިތުރުވާން ފަށާފައެވެ. މިއާއެކު ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ވަނީ މިކަމަށް ސަމާލުވުމަށް އިލްތިމާސްކޮށްފައެވެ.

މިދުވަސްވަރަކީ ޗުއްޓީ ދުވަސްވަރަށްވުމާއެކު ގިނަ ބަޔަކު ދަނީ އެއްތަނުން އަނެއްތަނަށް ދަތުރުކުރަމުންނެވެ. އެހެންކަމުން އަރިދަފުސް ރޯގާއާއި ކޮވިޑް-19ގެ އަލާމަތްތައް ހުންނަ މީހުން ދަތުރުފަތުރުކުރާއިރު އެހެން މީހުން ސަލާމަތަށް ރައްކާތެރިވުމަށް އެޗްޕީއޭއިން އިލްތިމާސްކުރެއެވެ. ރައްކާތެރިކަމުގެ ގޮތުން، ބަލީގެ އަލާމާތެއް ހުރިނަމަ ނޭފަތާއި އަނގަ ރަނގަޅަށް ނިވާވާނެހެން މާސްކު އެޅުމާއި ގައިދުރުކަން ބެހެއްޓުމަށާއި، އަދި ދަތުރުކުރުމަށްފަހު ސެނިޓައިޒަރ ބޭނުންކޮށްގެން އަތް ސާފުކުރުމަށްވެސް ވަނީ އިލްތިމާސްކޮށްފައެވެ.

ދަތުރުފަތުރުކުރާ ފަރާތްތަކުގެ އިތުރުން ދަތުރުފަތުރުގެ ޚިދުމަތްދޭ ފަރާތްތަކުންވެސް ސަމާލުކަންދޭންޖެހޭ ކަންތައްތަކެއް ހުރެއެވެ. އެގޮތުން އަތް ސާފުކުރެވޭނެހެން ސެނިޓައިޒަރ ބެހެއްޓުމަށާއި، ފަސިންޖަރުން ފޭބުމުން، އަތްލާ ތަންތަން ސާފުކުރުމަށާއި، އަމިއްލަ ރައްކާތެރިކަމަށްޓަކައި ޑްރައިވަރުން މާސްކު އެޅުމަށް އެޗްޕީއޭއިން ވަނީ އިލްތިމާސްކޮށްފައެވެ.

މީގެއިތުރުން އަރިދަފުސް ރޯގާއާއި ކޮވިޑް ފެތުރުން ކޮންޓްރޯލްކުރުމަށް، އާންމުކޮށް އަތްލާ ތަންތަން ޑިސްއިންފެކްޓްކޮށް ސާފުކޮށް ބަލަހައްޓަންވެސްޖެހެއެވެ.

ކޮވިޑް-19ން ދިފާއުވުމުގެ ގޮތުން ވެކްސިން ޖެހުމަކީ މުހިންމު ކަމަކަށްވާއިރު، ވެކްސިން ފުރިހަމަކޮށްފައިވާ ފަރާތްތަކުން ބޫސްޓަރ ޑޯޒް ފުރިހަމަކުރުމަށް އެޗްޕީއޭއިން ވަނީ އިލްތިމާސްކޮށްފައެވެ.

އެޗްޕީއޭއިން ވަނީ، ރޯގާ ޖެހި ދިގުލާނަމަ އަދި ބަލީގެ ހާލަތު ގޯސްވެދާނެ ފަރާތްތަކުން ވީހާވެސް އަވަހަށް ސިއްހީ އެހީތެރިއެއްގެ ލަފާ ހޯދުމަށް އިލްތިމާސްކޮށްފައެވެ. އަދި އަރިދަފުސް ރޯގާގެ އެއްވެސް އަލާމާތެއް ހުރިނަމަ ނޭފަތާއި އަނގަ ނިވާވާނެހެން ރަނގަޅަށް މާސް އެޅުމަށާއި، އާއްމު ތަންތަނުގައި އުޅޭއިރު ގައިދުރުކަން ބެހެއްޓުމަށާއި، ރޯގާގެ އެއްވެސް އަލާމާތެއް އުޅޭނަމަ މީހުން އެއްވެ އުޅޭ ތަންތަނަށް ނުދިއުމަށް ވަނީ އިލްތިމާސްކޮށްފައެވެ.

ޗުއްޓީ ދުވަސްވަރުކަމަށް ވުމާއެކު، ތިމާއާއި އަނެކާގެ ސަލާމަތާއި ރައްކާތެރިކަމަށްޓަކައި، ބަލި ޖެހުމުން ރައްކާތެރިވުމުގެ ގޮތުން އަޅަންޖެހޭ ފިޔަވަޅުތައް އެޅުމަށް ސަމާލުކަން ދިނުމަކީ މުހިންމު ކަމެކެވެ. އެހެން ނޫންކަމަށްވާނަމަ ގިނަ ބަޔަކަށް ބަލި ފެތުރި، ބަލި ކޮންޓްރޯލްކުރުމަށް ދަތިވާނެއެވެ.