ޗެލްސީ އޮތީ އޮންނަން ބޭނުންވާ ހިސާބުގައެއް ނޫން: ލަމްޕާޑު

ޗެލްސީ އޮތީ ކުލަބު އޮންނަން ބޭނުންވާ ހިސާބުގައި ނޫން ކަމަށް އެ ޓީމުގެ ވަގުތީ ކޯޗު ފްރޭންކް ލަމްޕާޑު ބުނެފި އެވެ.

ލަމްޕާޑު މިހެން ބުނީ ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ދެ ވަނަ ލެގުގައި އެންމެ ފަހުގެ ޗެމްޕިއަން ރެއާލް މެޑްރިޑާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައެވެ. އޭނާ ބުނީ، ޗެލްސީ އޮތީ އެމީހުން އޮންނަން ބޭނުންވާ ހިސާބުގައި ނޫން ކަމަށެވެ. އެގޮތުން ޗެލްސީ އޮތީ "ފުނޑިފަ" އޭ ބުނާތީ ވެސް ކަންބޮޑުވާ ކަމަށާއި، ކުލަބު އޮތް ހިސާބަކީ އެއްވެސް ވަރަކަށް ބޭނުންވާ ހިސާބެއް ނޫން ކަމަށެވެ. އޭނާ ބުނީ މިއަދު ޕްރިމިއާ ލީގުގައި ޗެލްސީ އޮތީ މި ހާލަތުގައި އޮންނަން ޖެހުނު ހިސާބުގައި ކަމަށާއި، އެ ހަގީގަތާ ދުރަށް ނުދެވޭނެ ކަމަށެވެ. އަދި ޗެމްޕިއަންސް ލީގުގައި ދެ ލަނޑުން ބަލިވެފައި އޮތުމަކީ އެ ހުރިހާ ކަމަކާ ދެކޮޅަށް މަސައްކަތް ކުރަން ޖެހޭ ސަބަބު ކަމަށެވެ. އޭނާ ބުނީ އެ މަސައްކަތްކޮށް، ޗެލްސީ އަށް ކޮންމެ ޙާލަތަކުން ވެސް އަރައިގަނެވޭނެކަން ދައްކައިދޭން ޖެހޭ ކަމަށާއި، މިހާރު އޮތީ އެ ހިސާބުގައި ކަމަށެވެ.

މީގެ އިތުރުން ލަމްޕާޑު ބުނީ މިވަގުތު ފޯކަސް ކުރަންވީ ކުރިއަށް އޮތް މެޗަށް އެކަނި ކަމަށެވެ. އެ މެޗުގައި ރަނގަޅު ކަންތައްތަކެއްކޮށް، ބުރަ މަސައްކަތްކޮށްފި ނަމަ ކޮންމެ ކަމަކީ ވެސް ވެދާނެ ކަމެއް ކަމަށެވެ. އޭނާ ބުނީ ޗެލްސީގެ ދަނޑުގައި އެ މެޗަށް ނުކުންނައިރު، މާހައުލު ރަނގަޅުވާނެ ކަން ވެސް އެނގޭ ކަމަށެވެ. ލަމްޕާޑު ބުނީ މީގެ ކުރިން ވެސް އޭނާ ވާނީ ޗެލްސީގައި އެކަހަލަ މެޗުތަކާ ކުރިމަތިލާފައި ކަމަށެވެ. އަދި ޗެލްސީ އަކީ ނަތީޖާ އަނބުރާލެވޭނެ ފެންވަރުގެ ޓީމެއް ކަަމަށާއި، ޗެލްސީ އަށް އެކަން ނުވާންވީ އެއްވެސް ސަބަބެއް ނެތް ކަމަށެވެ.

މީގެ އިތުރުން ލަމްޕާޑު ބުނީ، މެޗުތަކަށް ފަހު ކުލަބުގެ ވެރިން އައިސް ކުޅުންތެރިންނާ ބައްދަލުކޮށް ވާހަކަ ދެއްކުމުގައި އޭނާގެ އެއްވެސް މައްސަލައެއް ނެތް ކަމަށެވެ. އޭނާ ބުނީ މެޗަށްފަހު އޭނާ ވެސް ދައްކަން ބޭނުންވާ ބައިވަރު ވާހަކަ ހުންނާނެ ކަމަށެވެ. ނަމަވެސް އެއާ ޚިލާފަށް ކުލަބުގެ ވެރިން އައިސް ކުޅުންތެރިންނާ ވާހަކަ ދެއްކުމަކީ، އެމީހުންނަށް ވެސް ކުރެވޭނެ ކަމެއް ކަމަށެވެ. އޭނާ ބުނީ ޗެލްސީގެ ވެރިން އެކަން ކުރަނީ ޕޮޒިޓިވް ގޮތެއްގައި ކަމަށެވެ.

ސްޓެމްފޯޑް ބްރިޖުގައި ޗެލްސީން ރެއާލާ ދެކޮޅަށް ކުޅޭނީ އަންގާރަ ދުވަހުގެ ރޭ ދަންވަރު ރާއްޖެ ގަޑިން 12 ޖަހާއިރު އެވެ.