ރ ފުއްގިރި ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނުގެ މައްޗަށް ކުރާ ދައުވާގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި ޔާމީނުގެ އިތުރުން، އަހުމަދު ކްރިކް ރިޒާ އަދި ސަން ކޮންސްޓްރަކްޝަން އެންޑް އިންޖިނިޔަރިންގ ޕްރައިވެޓް ލިމިޓެޑާއި ސަން އިންވެސްޓްމަންޓް ޕްރައިވެޓް ލިމިޓެޑުގެ މައްޗަށް ވަނީ ދައުވާ އުފުލާފައެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.

މި މައްސަލައިގެ ޝަރީއަތުގެ ކުރީގެ ހުށައެޅުންތަކަށް ގޮތް ނިންމާފައިވަނީ 21 ފެބްރުއަރީ 2023 ގައެވެ. ނަމަވެސް ޝަރީއަތުގެ ކުރީގެ ހުށައެޅުންތަކާމެދު ނިންމި ނިންމުންތައް ދައުވާލިބޭ ފަރާތްތަކުން ދިވެހިރާއްޖޭގެ ހައިކޯޓުގައި އިސްތިއުނާފު ކުރުމުން އެ މައްސަލަތައް ނިމިފައިވަނީ ދައުލަތާއެއްކޮޅަށެވެ.

އަންގާރަ ދުވަހުގެ އަޑުއެހުމަކީ މި މައްސަލައިގެ ޝަރީއަތުގެ ކުރީގެ މަރުޙަލާއާ ގުޅޭ އަޑުއެހުމެކެވެ. އެގޮތުން ދައުލަތުން ހުށައެޅި 7 ލިޔުމާއި 2 ސީޑީ ދައުވާ ލިބޭ ފަރާތްތަކަށް ލިބިފައިވޭތޯ ގާޒީ ވަނީ ސާފު ކުރައްވާފައެވެ.

އޭގެ އިތުރުން، ޔާމީނުގެ ފަރާތުން ހެއްކާ ބެހޭ ޤާނޫނުގެ ދަށުން ހުށައެޅި ހުށައެޅުމަކާއި، ދިފާއީ ބައެއް އިތުރު ލިއުންތައް ދައުލަތަށް ލިިބިފައިވޭތޯވެސް ގާޒީ ވަނީ ސާފު ކުރައްވާފައެވެ.

ގާޒީ ވިދާޅުވީ، ޔާމީނުގެ ފަރާތުން ހެއްކާ ބެހޭ ޤާނޫނުގެ ދަށުން ހުށައެޅި ހުށައެޅުމާއި ގުޅޭގޮތުން ޝަރީއަތުގެ މަރުޙަލާގައި ވާހަކަ ދެއްކުމަށް ފުރުސަތު ދެއްވާނެ ކަމަށެވެ.

އެއީ އަދީބާއި ޒިޔަތުގެ ހެކިބަސް ބަލައިނުގަތުމަށް ދަށު ކޯޓުގައި ކުރިން ނިންމި ނިންމުން ބާތިލުކޮށް، ހެއްކާ ބެހޭ ޤާނޫނުގެ ދަށުން އަލުން ހުށައެޅުންތައް ހުށައެޅުމަށް ޔާމީނަށް ފުރުސަތު ލިބިދޭން ޖެހޭކަމަށް ހައިކޯޓުން ނިންމުމާއި ގުޅިގެން ޔާމީނުގެ ފަރާތުން ހުށައެޅި ހުށައެޅުމެކެވެ.

އޭގެ އިތުރުން ރައީސް ޔާމީނުގެ ފަރާތުން ވަނީ މަދަނީ މިންގަނޑުން މައްސަލަ ކުރިއަށް ގެންދިއުމާމެދު ދިފާއަށް ވާހަކަ ދެއްކުމަށް އަލުން ފުރުސަތެއް ދެއްވުމަށް އެެދިލައްވާފައެވެ. ނަމަވެސް ގާޒީ ވިދާޅުވީ، މި މައްސަލަ މަދަނީ މިންގަނޑުން ކުރިއަށް ގެންދިއުމަށް އެ ކޯޓުގެ ކުރީގެ އިސްގާޒީ އަހުމަދު ޝަކީލު ނިންމެވި ނިންމެވުމަށް ބަދަލެއް ގެންނަންޖެހޭކަމަށް ދެކިނުލައްވާ ކަމަށެވެ.

ޔާމީނާއި ކްރިކް ރިޒާގެ ވަކީލުން އިތުރަށް ވިދާޅުވީ، ޝަރީއަތުގެ ކުރީގެ ހުށައެޅުންތަކާ ގުޅޭގޮތުން ހައިކޯޓުން ނިންމި ނިންމުން ދިވެހިރާއްޖޭގެ ސުޕްރީމް ކޯޓުގައި އިސްތިއުނާފު ކުރައްވާނެކަމަށެވެ.

ސުޕްރީމް ކޯޓަށް މައްސަލަ ހުށައަޅުއްވާއިރު، ދަށު ކޯޓުގައި ހިނގަމުންދާ ޝަރީއަތް މަޑުޖައްސާލުމަށް ވަގުތީ އަމުރަކަށް އެދެން ގަސްދުކުރާކަމަށްވެސް ދިފާއީ ވަކީލުން ފާހަގަ ކުރެއްވިއެވެ.

ގާޒީ އަލީ ނަދީމް ވަނީ މި މައްސަލައިގެ ޝަރީއަތުގެ ކުރީގެ މަރުޙަލާ ނިމުނުކަން އިއުލާނު ކުރައްވައި، ދެން އޮންނާނީ ޝަރީއަތް ފެށުންކަން ފާހަގަ ކުރައްވާފައެވެ. އެގޮތުން ދައުވާލިބޭ ފަރާތްތައް ބޭނުންނަމަ، އޮންލައިންކޮށް ބައިވެރިވެވިދާނެކަމަށް ގާޒީ ވިދާޅުވިއެވެ.

މި އަޑުއެހުމުގައި ޔާމީނު ވިދާޅުވީ، ހެކިބަސް ނެގުމުގެ ބައެއް އަޑުއެހުންތަކަށް ކޯޓަށް ހާޒިރުވާން ބޭނުންފުޅު ނުވާ ކަމަށާއި، އެ އަޑުއެހުންތަކުގައި ބައިވެރިވާން ބޭނުންވަނީ އޮންލައިންކޮށް ކަމަށެވެ. އެގޮތުން ހާޒިރުވާން ބޭނުންވާ އަޑުއެހުންތަކަކީ ކޮބައިކަން ވަކީލުންނާ ވާހަކަ ދެއްކެވުމަށްފަހު ކޯޓަށް އަންގަވާނެކަމަށް ގާޒީ ވިދާޅުވިއެވެ.