"ކޮމްޕްލެކްސް ޕީސީއައި ވިތު އިމޭޖިންގ" ވޯކްޝޮޕް ބާއްވަނީ
މި ވޯކްޝޮޕް އޮންނާނީ އޭޕްރިލް 28 29 އަދި 30 މި ތިން ދުވަހު
އައިޖީއެމްއެޗް
"ކޮމްޕްލެކްސް ޕީސީއައި ވިތު އިމޭޖިންގ"ގެ ނަމުގައި ވޯކްޝޮޕެއް ބާއްވަން އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)އިން ނިންމައިފިއެވެ.
މިއީ އައިޖީއެމްއެޗްގެ ނޭޝަނަލް ކާޑިއެކް ސެންޓަރުން ބާއްވާ މިފަދަ ދެވަނަ މަސައްކަތު ބައްދަލުވުމެވެ. މި ބައްދަލުވުން ބޭއްވުމަށް ހަމަޖެހިފައިވަނީ މި އޭޕްރިލް މަހުގެ 28 29 އަދި 30 މި ތިންދުވަހުއެވެ.
މި މަސައްކަތު ބައްދަލުވުމުގެ މަގްސަދަކީ ފަސޭހައިން ނުހުޅުވޭގޮތަށް ބެދިފައިހުންނަ ހިތުގެ ހޮޅިތައް އެކިވައްތަރުގެ ޒަމާނީ ވަސީލަތްތައް ބޭނުންކޮށްގެން އަދި ހިތުގެ ހޮޅީގެ އެތެރެއަށް ލައްވާ ސްކޭންކުރާ ކެމެރާތަކުގެ އެހީގައި ހުޅުވާނެގޮތްތައް ކިޔަވައިދިނުމެވެ. މި ކިޔަވާދެއްވުމަށް ވަޑައިގަންނަވާ ބޭފުޅުންނަކީ މި ހުނަރާއި ތަޖުރިބާގައި ދުނިޔެއަށް މަޝްހޫރު ބޭފުޅުންނެވެ.
މިގޮތުން ބޭރުގެ 4 ކާޑިއޮލޮޖިސްޓުން ކިޔަވައިދިނުމުގައި ބައިވެރިވެވަޑައިގަންނަވާނެ ކަމަށް އައިޖީއެމްއެޗުން ބުނެއެވެ. އެއީ އިޓަލީގެ ޑރ. އިމާދު ޝައިބާންއާއި، ޖަރުމަނުގެ ޑރ. ޖެރަލްޑް ވާރނަރ އާއި އިންޑިއާގެ ޑރ. ޕަރަތާޕް ކުމާރު އާއި، ބަންގްލަދޭޝްގެ ޑރ. ޤުލާމް އަޒަމްއެވެ. އަދި މި ބައްދަލުވުމުގައި އައިޖީއެމްއެޗްގެ 4 ކާޑިއޮލޮޖިސްޓުންވެސް ކިޔަވައިދިނުމުގައި ބައިވެރިވާނެއެވެ.
މި ބައްދަލުވުމަށް މިފަހަރު ރާއްޖެއިންބޭރުގެ 30 އަށްވުރެ ގިނަ ކާޑިއޮލޮޖިސްޓުން ތަމްރީނު ހޯއްދެވުމަށްޓަކައި ވަޑައިގަތުމަށް ވަނީ ހަމަޖެހިފައެވެ.
