އިތުރު 148 މީހުން ކޮވިޑް-19އަށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ވަނީ ފާއިތުވި ހަފުތާގައި ރާއްޖެއިން ފެނުނު ކޮވިޑް ކޭސްތަކުގެ ތަފާސްހިސާބުތައް ހާމަކޮށްފައެވެ. މިގޮތުން 9 އޭޕްރީލުން 15 އޭޕްރީލަށް، މުޅި ރާއްޖެއިން 148 މީހުން ކޮވިޑް-19އަށް ޕޮޒިޓިވްވެފައިވާކަމަށް އެޗްޕީއޭއިން ހާމަކުރެއެވެ.

އެޗްޕީއޭއިން ބުނީ މާލޭ ސަރަހައްދުން 100 މީހުން ޕޮޒިޓިވްވެފައިވާކަމަށާއި، އަދި އަތޮޅުތެރެއިން 11 މީހުން ޕޮޒިޓިވްވެފައިވާކަމަށެވެ. އަދި އެހެނިހެން ހިސާބުތަކުން 37 މީހުން ޕޮޒިޓިވްވެފައިވާކަމަށް އެޗްޕީއޭއިން ހާމަކޮށްފައިވެއެވެ.

އެޗްޕީއޭއިން ބުނީ، މިއާއެކު މިހާތަނަށް ކޮވިޑަށް ޕޮޒިޓިވްވި މީހުންގެ އަދަދު 186،042ށް އަރާފައިވާކަމަށެވެ.

ފާއިތުވި ހަފުތާގައި އިތުރު 28 މީހުން ހޮސްޕިޓަލުގައި އެޑްމިޓުކޮށްފައިވާއިރު، މިހާތަނަށް ކޮވިޑް-19ގައި ނިޔާވެފައިވަނީ 311 މީހުންކަމަށް އެޗްޕީއޭއިން ހާމަކުރެއެވެ.

ފާއިތުވި ދުވަސްތަކުގައި ރާއްޖޭގައި ކޮވިޑް-19ގެ ކޭސްތަކުގެ އަދަދު ވަރަށް ދަށްވިއެވެ. ނަމަވެސް މާޗް މަހުގެ ފަހުކޮޅުން ފެށިގެން މިބައްޔަށް ޕޮޒިޓިވްވާ މީހުންގެ އަދަދު ވަނީ އިތުރުވެގެން ގޮސްފައެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ތަފާސްހިސާބުތަކުން ދައްކާގޮތުގައި؛ އޭޕްރީލް މަހުގެ 2ން 8ށް މާލެ ސަރަހައްދުން 73 މީހުން ބައްޔަށް ޕޮޒިޓިވްވެފައިވެއެވެ. އެ ހަފުތާތެރޭގައި މުޅި ރާއްޖެއިން މި ބައްޔަށް 84 މީހުން ޕޮޒިޓިވްވި ކަމަށްވެސް އެޗްޕީއޭއިން ބުނެއެވެ.