"ފަތުރުވެރިކަން އިތުރަށް ކުރިއެރުވުމަށް ދިމާވާ އެންމެ ބޮޑު ގޮންޖެހުމަކީ ރަނގަޅު ފެންވަރުގެ އެއާޕޯޓުތައް މަދުވުން"
14 އެޕްރީލު 2023 | ހުކުރު 14:16މި މަހުގެ 10 ވަނަ ދުވަހާ ހަމައަށް 582000 މީހުން ރާއްޖެ އައިސްފައިވޭ
ފަތުރުވެރިން
ރާއްޖޭގައި ފަތުރުވެރިކަން އިތުރަށް ކުރިއެރުވުމަށް ދިމާވާ އެންމެ ބޮޑު ގޮންޖެހުމަކީ ރަނގަޅު ފެންވަރުގެ އެއާޕޯޓުތައް މަދުވުން ކަމަށް, ޓޫރިޒަމް މިނިސްޓްރީގެ ސްޓޭޓް މިނިސްޓަރު ޑރ. އަހުމަދު ސާލިހު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ސްޓޭޓް މިނިސްޓަރު ވިދާޅުވީ، އެއާޕޯޓުތައް ރަނގަޅު ފެންވަރަށް ހެދުމަކީ އެކި ސަރަހައްދުތަކުގައި ފަތުރުވެރިކަން ކުރިއެރުވުމަށްޓަކައި މުހިންމު ކަމެއް ކަމަށެވެ. އެ ބަދަލު ގެނައުމަށް އެކި ސަރަހައްދުތަކުގައި އެއާޕޯޓްތައް ތަރައްގީކުރުމަށް ސަރުކާރުން މަސައްކަތް ކުރާކަމަށް ޑރ. ސާލިހު ވިދާޅުވިއެވެ. އޭނާ ވިދާޅުވީ، އެއާޕޯޓުގެ އިތުރުން އެއް ރަށުން އަނެއް ރަށަށް ފަސޭހައިން ދެވުމަކީވެސް ފަތުރުވެރިކަމަށް މުހިންމު ކަމެއް ކަަމަށެވެ. އެހެން ކަމުން އާރްޓީއެލް މެދުވެރިކޮށް ރަށްތައް ގުޅާލުމަކީ އެކަމުގެ ފައިދާ ފަތުރުވެރިކަމަށް އަންނާނެ ކަންކަން ކަމަށް އޭނާ ވިދާޅުވިއެވެ.
2023 ވަނަ އަހަރަކީ ފަތުރުވެރިކަމަށް ރެކޯޑް އަހަރެއް ކަމަށްވެސް އޭނާ ވަނީ ވިދާޅުވެފައެވެ. މަހުން މަހަށް ބަލާއިރު މި އަހަރުގެ ފަތުރުވެރިކަން ރަނގަޅު ކަމަށާއި، މި މަހުގެ 10 ވަނަ ދުވަހާއި ހަމައަށް 582000 މީހުން ރާއްޖެ އައިސްފައިވާ ކަމަށް އޭނާ ވިދާޅުވިއެވެ. އެ އަމާޒަށް ވާސިލްވެވެނީ ކަމާގުޅޭ އިދާރާތަކާއި، ޕްރައިވެޓް ސެކްޓަރގެ މީހުންގެ މަސައްކަތުގެ ނަތީޖާއެއްގެ ގޮތުން ކަމަށް އޭނާ ވިދާޅުވިއެވެ.
