ޑޮމެއިންއާ ގުޅުންހުރި މައްސަލަތައް އޭސީސީއާއި ފުލުހުންނަށް ހުށަހަޅާފައިވާކަމަށް، ޓްރާންސްޕޯޓް މިނިސްޓްރީން ބުނެފިއެވެ.

ޓްރާންސްޕޯޓް މިނިސްޓަރު އާއިޝަތު ނަހުލާ މިފަދައިން ވިދާޅުވީ ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގައި ވާހަކަފުޅުދައްކަވަމުންނެވެ. މަޖިލީހަށް ވަނީ ޓްރާންސްޕޯޓް މިނިސްޓްރީއާ ގުޅުންހުރި ގިނަ މައްސަލަތަކެއް ހުށަހަޅާފައެވެ. އޭގެތެރޭގައި، ޑޮމެއިންއާ ގުޅުންހުރި މައްސަލަތައްވެސް ހިމެނެއެވެ.

އެކަމާގުޅިގެން މެމްބަރުންގެ ގިނަ ސުވާލުތަކެއް މިނިސްޓަރަށް ކުރިމަތިކުރުވާފައިވެއެެވެ.

ޑޮމެއިންތަކަށް ފައިސާ ދެއްކުމަށްފަހު އެއްވެސް ބަޔަކަށް ޑޮމެއިންގެ ޚިދުމަތް ނުލިބޭކަމަށް ބުނެ ބައެއް އާއްމުން ޝަކުވާކުރާކަން މެމްބަރުންވެސް ފާހަގަކުރެއްވިއެވެ. އަދި ޑޮމެއިން ބަދަލުނުވެ ހިފެހެއްޓިފައި އޮންނަނީ ކީއްވެގެންތޯވެސް މެމްބަރުން ދެންނެވިއެވެ.

އޭގެތެރެއިން ބައެއް ކަންކަމުގެ ތަފްސީލަށް މިނިސްޓަރު ވަނީ ބައްލަވާލައްވާފައެވެ. މިނިސްޓަރު ވިދާޅުވީ، މަޖިލީހަށް ހުށަހަޅާފައިވާ މައްސަލާގައި، ޑޮމެއިންއަށް ފައިސާ ދެއްކިނަމަވެސް ޑޮމެއިން ނުލިބޭކަމަށް އެ މައްސަލާގައި ބުނެފައިވާކަމަށެވެ. ނަމަވެސް އެ މައްސަލާގައި ފާހަގަކުރާ ޑޮމެއިން ނަމްބަރާއެކު އެޓޭޗްކޮށްފައިވާ ވެހިކަލަކީ އެ ޑޮމެއިން ދޫކުރިފަހުން ނަގާފައިވާ ވެހިކަލެއް ކަމަށް މިނިސްޓަރ ވިދާޅުވިއެވެ. މިފަދަ އެތައް މައްސަލައެއް ފާހަގަކުރެވޭތީ، އެކަންކަން ބަލައިދިނުމަށް އެދި، ކަމާ ގުޅުންހުރި އިދާރާތަކަށް ހުށަހަޅާފައިވާކަމަށް މިނިސްޓަރު ވަނީ ވިދާޅުވެފައެވެ. މިނިސްޓްރީގެ ފަރާތުން އެފަދަ މައްސަލަތަކާމެދު ގޮތް ނިންމަނީ ފުލުހުންނާއި އޭސީސީއަށް ހުށަހަޅައި، މައްސަލަތަކުގައި ގޮތް ނިމުމުން ކަމަށް ނަހުލާ ވިދާޅުވިއެވެ. މިނިސްޓްރީގެ ސިސްޓަމްގައި ނަމްބަރެއް ހިމެނުނުނަމަވެސް، މައްސަލައެއް ހުރި ޑޮމެއިންއެއްނަމަ، އެ ޑޮމެއިން ބަލައިގަންނާނީ އެއީ ސައްހަ ޑޮމެއިންއެއްކަން ކަށަވަރުކުރުމަށްފަހު، އުސޫލުގެތެރެއިން ކަމަށް މިނިސްޓަރު ވިދާޅުވިއެވެ.