"މަހުގެ ސްޓޯރޭޖް ރަނގަޅުކުރަން މި ސަރުކާރުން 50 މިލިއަން ޑޮލަރު އިންވެސްޓް ކުރަން ފަށައިފި"
މަސްވެރިކަމަށް އިންވެސްމެންޓްތައް ކުރުމަށް މަސައްކަތް ކުރި ސަރުކާރަކީ ހަމައެކަނި މި ސަރުކާރު ކަމަށް އީސަ ފާހަގަކުރެއްވި
މެންބަރު އީސަ
ފެލިވަރު ތަރައްޤީކޮށް، މަހުގެ ސްޓޯރޭޖް ރަނގަޅުކުރަން 50 ވަރަކަށް މިލިއަން ޑޮލަރު އިންވެސްޓް ކުރުމުގެ މަސައްކަތް ސަރުކާރުން ފަށާފައިވާ ކަމަށް ކެނދިކުޅުދޫ ދާއިރާގެ މެންބަރު އަހުމަދު އީސަ ވިދާޅުވެއްޖެއެވެ.
އީސަ ވަނީ ބުދަ ދުވަހު މަޖިލީހުގައި ކުރީގެ ސަރުކާރުތަކަށް ވަރަށް ބޮޑަށް ފާޑު ވިދާޅުވެފައެވެ. އީސަ ވިދާޅުވީ ރާއްޖޭގައި އޮތީ މޫސުމީ މަސްވެރިކަމެއް ކަމަށާއި، މަސްވެރިކަން ރަނގަޅީ ވަކި ދުވަސްވަރެއްގައި ކަމަށެވެ. ރާއްޖޭގައި ޒަމާނީ ވަސީލަތްތަކާއެކު މަސް ޕްރޮސެސްކުރަން ފެށީއްސުރެ މިހާ ހިސާބަށް މަސް ޕްރޮސެސްކުރާ ވަސީލަތްތައް ތަރައްޤީކުރުމަށް އެއްވެސް ސަރުކާރަކުން މަސައްކަތްކޮށްފައި ނުވާ ކަމަށް އީސަ ވިދާޅުވިއެވެ. އެގޮތުން ފެލިވަރު މަސް ފެކްޓްރީގައި ހުރި މެޝިނަރީތަކުގެ ސްޕެއަރ ޕާޓްސް އުފެއްދުން ހުއްޓާލިތާ 10-20 އަހަރު ވެފައިވާ ކަަމަށް އޭނާ ވިދާޅުވިއެވެ. އެހެންނަމަވެސް ވަސީލަތްތައް ތަރައްޤީކުރަން ބައި ރުފިޔާ އެއްވެސް ހޭދަކޮށްފައި ނުވާ ކަމަށް އީސަ ވިދާޅުވިއެވެ.
މީގެ އިތުރުން މަސްވެރިކަން ތަރައްޤީކުރުމުގެ ނަމުގައި ކުރީގެ ސަރުކާރުތަކުންކުރި ކަމަކީ ވެނުމަސް ވެނަށް ކާންދިނުން ކަމަށާއި އެކަން ހުއްޓާލީ މި ސަރުކާރުން ކަމަށް އޭނާ ވިދާޅުވިއެވެ. ކުރީގެ ސަރުކާރުތަކުން ރައްޔިތުންގެ ޓެކްސް ފައިސާ ވަކި ސިނާއަތަކަށް ސަބްސިޑީގެ ގޮތުގައި ދޫކޮށްލާ ކަމަށް ވެސް އީސަ ވިދާޅުވިއެވެ. އޭނާ ވިދާޅުވީ އަސާސީ ޚިދުމަތްތައް ސަބްސިޑައިސްކުރުމަކީ ދުނިޔޭގެ ހުރިހާ ޤައުމެއްގައި ވެސް ކޮށް އުޅޭ ކަމެއް ކަަމަށެވެ. އެހެންނަމަވެސް އިގްތިސާދީ ހަރަކާތްތަކަށް ސަބްސިޑައިސްކުރުމަކީ ދާއިމީ ގޮތުން ކުރަން ހެޔޮވާ ވަރުގެ ކަމެއް ނޫން ކަމަށް އޭނާ ވިދާޅުވިއެވެ.
ފެލިވަރު މަސް ފެކްޓްރީގައި 25 ޓަނުގެ މަސް ވެސް ދުވާލެއްގެ މައްޗަށް ޕްރޮސެސް ނުކުރެވޭ ކަމަށާއި 100 ޓަނުގެ މަސް ވެސް ރައްކާ ނުކުރެވޭ ކަމަށް އޭނާ ވިދާޅުވިއެވެ. ނަމަވެސް ސަރުކާރުގެ މަޝްރޫޢުތައް ނިމުމުން އެތައް ހާސް ޓަނުގެ މަސް ރައްކާކުރެވޭނެ ކަމަށް އޭނާ ވިދާޅުވިއެވެ. މަސް ގަނެ ރައްކާކުރުމަށް ބޯޓުތައް ގަނެ، ކުރަން ޖެހޭ އިންވެސްމެންޓްތައް ކުރުމަށް މަސައްކަތް ކުރި ސަރުކާރަކީ ހަމައެކަނި މި ސަރުކާރު ކަމަށް އީސަ ފާހަގަކުރެއްވިއެވެ.
