"އަހަރެންގެ ކެރިއަރުގައި ފެނުނު އެންމެ މޮޅު ތިން ކުޅުންތެރިންނަކީ މެސީ، މަރަޑޯނާ އަދި ރޮނާލްޑޯ"

ކެރިއަރުގައި ފެނުނު އެންމެ މޮޅު ތިން ކުޅުންތެރިންނަކީ އާޖެންޓީނާގެ ކެޕްޓަން ލިއޮނަލް މެސީ، ޑިއޭގޯ މަރަޑޯނާ އަދި ބްރެޒިލްގެ ރޮނާލްޑޯ ކަމަށް އިޓަލީގެ ލެޖެންޑްރީ ޑިފެންޑަރު ޕައޮލޯ މަލްޑިނީ ބުނެފި އެވެ.

މަލްޑިނީ މިހެން ބުނީ އޭނާ ފިން އިންޓަވިޔުއެއްގަ އެވެ. އޭނާ ބުނީ ކެރިއަރުގައި ފެނުނު އެންމެ މޮޅު ތިން ކުޅުންތެރިންނަކީ އެއީ ކަމަށާއި އެ ކުޅުންތެރިންނަކީ އެކި ހުނަރުތައް ދައްކާފައިވާ ކުޅުންތެރިން ކަމަށް އަދި އަބަދު ވެސް އޭނާ އަށް އެންމެ ފާހަގަ ވަނީ އެ ތިން ކުޅުންތެރިން ކަމަށެވެ. މަލްޑިނީ ބުނީ ފުޓުބޯޅަ ކުޅޭ މޮޅެތި އެހެން ކުޅުންތެރިން ވެސް ތިބޭނެ ކަމަށެވެ. ނަމަވެސް އެ ތިން ކުޅުންތެރިންނާ އެއް ފެންވަރެއްގެ ކުޅުންތެރިޔަކު އޭނާ ނުދެކޭ ކަމަށެވެ. މީގެ އިތުރުން، ފުޓުބޯޅަ އަކީ އަމިއްލަ ކުޅިވަރަކަށް ވުރެ ބޮޑަށް، ޓީމު ކުޅިވަރެއް ކަމަށެވެ.

އުމުރުން 53 އަހަރުގެ މަލްޑިނީ ފުޓުބޯޅަ ކުޅުން ހުއްޓާލީ 2009 ވަނަ އަހަރު އެވެ. އޭގެ ފަހުން މިހާރު އޭނާ އަދާކުރަމުން އަންނަނީ އިޓާލިއަން ލީގުގެ އޭސީ މިލާންގެ ޓެކްނިކަލް ޑިރެކްޓަރުގެ މަގާމެވެ. އޭސީ މިލާނަކީ މަލްޑިނީ އޭނާގެ ކެރިއަރު ފެށި އަދި ނިންމާލި ވެސް ކުލަބެވެ. އެ މަގާމަށް މަލްޑިނީ ހަމަޖެއްސީ 2019 ވަނަ އަހަރު އެވެ. ތިން އަހަރުގެ އެއްބަސްވުން ހަމަވީ މިދިޔަ އަހަރު އެވެ. އެއާއެކު މަލްޑިނީ ވަނީ ކުލަބާއެކު ހަދާފައިވާ އެއްބަސްވުން ދެ އަހަރަށް އިތުރުކޮށްފަ އެވެ.

މަލްޑިނީ އޭސީ މިލާނުގެ ސީނިއާ ޓީމަށް ގުޅުނީ 1984 ވަނަ އަހަރު އެވެ. އޭގެ ފަހުން އެ ކުލަބުގައި ހޭދަކުރި 25 އަހަރުގެ ތެރޭގައި މަލްޑިނީ ވަނީ 902 މެޗު ކުޅެދީ، 33 ލަނޑު ޖަހައިފަ އެވެ. މީގެ އިތުރުން އޭނާ ވަނީ އޭސީ މިލާނާއެކު 23 ތައްޓެއް ކާމިޔާބުކޮށްފަ އެވެ. އޭގެ ތެރޭގައި އިޓާލިއަން ލީގު ހަތް ފަހަރު، އިޓާލިއަން ކަޕް އެއް ފަހަރު، އިޓާލިއަން ސުޕަ ކަޕް ތިން ފަހަރު، ޔުއެފާ ޗެމްޕިއަންސް ލީގު ފަސް ފަހަރު، ޔުއެފާ ސުޕަ ކަޕް ހަތަރު ފަހަރު، އިންޓަކޮންޓިނެންޓަލް ކަޕް ދެ ފަހަރު އަދި ފީފާ ކުލަބު ވޯލްޑް ކަޕް އެއް ފަަހަރު ހިމެނެ އެވެ. މަލްޑިނީ ވަނީ 1988 ވަނަ އަހަރުން ފެށިގެން 2002 ވަނަ އަހަރާ ހަމައަށް އިޓަލީގެ ޤައުމީ ޓީމަށް 126 މެޗު ކުޅެދީ ހަތް ލަނޑު ޖަހައިފަ އެވެ. ޤައުމީ ޓީމާއެކު އޭނާ ވަނީ ފީފާ ވޯލްޑް ކަޕްގެ ދެ ވަނަ އަދި ތިން ވަނަ ހޯދައިފަ އެވެ. މީގެ އިތުރުން ޔޫރޯ މުބާރާތެއްގެ ފައިނަލްގައި ވެސް ވަނީ ކުޅެފަ އެވެ.