ބާޔާނާ ދެކޮޅަށް ސިޓީ، ގާޑިއޯލާ ބުނީ ކޮންމެހެން ވެސް މުބާރާތް ކާމިޔާބު ކުރަން ބޭނުންވާ ކަމަށް

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގައި ޖަރުމަނުގެ ބަޔާން މިއުނިކާ ދެކޮޅަށް ނުކުންނައިރު، ކޮންމެހެން ވެސް އެ މުބާރާތް ކާމިޔާބު ކުރަން ބޭނުންވާ ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފި އެވެ.

ކުއާޓާ ފައިނަލްގެ ފުރަތަމަ ލެގުގެ ކުޅުން އޮތީ ސިޓީގެ އިއްތިހާދު ސްޓޭޑިއަމްގަ އެވެ. އެ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން ގާޑިއޯލާ ބުނީ، ހަ ވަނަ ފަހަރަށް ޗެމްޕިއަންސް ލީގުގެ ކުއާޓާ ފައިނަލަށް ނުކުންނައިރު، ސިޓީއާއެކު ޗެމްޕިއަންސް ލީގު ކާމިޔާބު ކުރެވިފައި ނުވުމަކީ އޭނާގެ ފެއިލްވުމެކޭ ވެސް ބުނެވިދާނެ ކަމަށެވެ. ނަމަވެސް ކޮންމެހެން ވެސް އެ މުބާރާތް ސިޓީއާއެކު ކާމިޔާބު ކުރަން ބޭނުންވާ ކަމަށެވެ. އޭނާ ބުނީ ސިޓީން ކުރާނީ މަސައްކަތް ކަމަށާއި، ބަޔާން ކަހަލަ ވަރުގަދަ ލީގެއްގެ ޓީމަކާ ދެކޮޅަށް ކުޅުމަކީ ވެސް ލިބޭ ޝަރަފެއް ކަމަށާއި، ސިޓީން އޮތީ އެ މެޗަށް އުފަލާއެކު ތައްޔާރަށް ކަމަށެވެ. މީގެ އިތުރުން އޭނާ ބުނީ ޔަގީންކަމާއެކު މުބާރާތް ހައްގޭ ބުނެވޭނެ ޖާގައެއް ނެތް ކަމަށާއި، ނަމަވެސް ރަނގަޅު ދެ މެޗު ކުޅެގެން ކުރިއަށް ދެވޭނެ ކަމަށެވެ. އެހެންކަމުން އަންގާރަ ދުވަހުގެ ރޭ ކުޅޭ މެޗަކީ އެކަމުގެ ފުރަތަމަ ފިޔަވަޅު ކަމަށެވެ.

އޭނާ ބުނީ މިދިޔަ ސީޒަންގައި ވެސް، އޭގެ ކުރިން ދެ ސީޒަންގައި ވެސް ތިން ސީޒަން ކުރިން ވެސް ސިޓީން މަސައްކަތް ކުރީ ޗެމްޕިއަންސް ލީގު ކާމިޔާބު ކުރުމަށް ކަމަށެވެ. ނަމަވެސް މުބާރާތް ކާމިޔާބު ކުރަން ބޭނުންވާ އެހެން ޓީމުތަކެއް ވެސް އޮތް ކަމަށާއި، އެ ޓީމުތަކުން ވެސް ކުޅެނީ ވަރަށް މޮޅު ކުޅުމެއް ކަމަށެވެ. ގާޑިއޯލާ ބުނީ އެހެން މީހުންގެ އަމިއްލަ ދިރިއުޅުމުގައި ހުރި އުންމީދުތަކެއް ނޭންގޭނެ ކަމަށެވެ. ނަމަވެސް ކޮންމެ މީހަކު ވެސް ހުރިހާ ގޮތަކުން ކާމިޔާބު އަދި ފުރިހަމަ މީހަކަށްވުމަށް އުންމީދު ކުރާނެ ކަމަށެވެ. ގާޑިއޯލާ ބުނީ ސިޓީއާއެކު ޕްރިމިއާ ލީގުގައި ވާދަކުރަމުން އަންނަ ކަމަށާއި، ޗެމްޕިއަންސް ލީގު މެޗަށްފަހު ކުރިމަތީ އޮތީ އެފްއޭ ކަޕްގެ ސެމީ ފައިނަލް މެޗު ކަމަށެވެ. އެހެންކަމުން ކުރިން ވެސް މަސައްކަތް ކުރި ފަދައިން މިފަހަރު ވެސް މަސައްކަތް ކުރާނެކަން ފާހަގަކޮށް ގާޑިއޯލާ ބުނީ، އެއީ އަދި ސިޓީ އަށް ކާމިޔާބުވާނެ ސަބަބެއް ނޫން ކަމަށެވެ.

މީގެ އިތުރުން އޭނާ ބުނީ މެޗުގައި ކުޅޭ ދެ ޓީމަކީ ވެސް ވަރަށް ވާދަވެރި ދެ ޓީމު ކަމަށެވެ. އަދި އައު ކޯޗު ތޯމަސް ޓުޗެލްގެ އިރުޝާދުގެ ދަށުން ބަޔާނުން ކުޅުނު ދެ ތިން މެޗެއް ފެނިފައިވާ ކަމަށެވެ. ނަމަވެސް ކުއާޓާ މެޗުގައި ޓުޗެލް އައު ގޮތްތަކެއް ރާވާފާނެ ކަމަށާއި ބާޔާންގެ ކޯޗުކަމުގައި ކުރިން ހުރި ހޫލިއަން ނާގަލްސްމަން އާއި މިހާރުގެ ކޯޗު ޓުޗެލް އަކީ ވެސް ވަރަށް ކްރިއޭޓިވް ދެ މީހުން ކަމަށެވެ. އޭނާ ބުނީ ނާގަލްސްމަންއާ މެދު ކަންތައްވީ ގޮތުން ކަންތައް ބޮޑުވި ކަމަށާއި، ނަމަވެސް އެކަމަށް މާ ބޮޑު ސަމާލުކަމެއް ނުދޭ ކަމަށެވެ. ސަބަބަކީ އޭނާގެ ފޯކަސް ސިޓީއާއެކު އޮތުން ކަމަށް ގާޑިއޯލާ ބުންޏެވެ.

ކުއާޓާ ފައިނަލްގައި ސިޓީން ބަޔާނާ ދެކޮޅަށް ނުކުންނާނީ އަންގާރަ ދުވަހުގެ ރޭ ދަންވަރު ރާއްޖެ ގަޑިން 12 ޖަހާއިރު އެވެ.