މޯލްޑިވްސް ކަރެކްޝަނަލް ސަރވިސް (އެމްސީއެސް) އިން ރިހެބިލިޓޭޝަން ފްރޭމްވަރކްގައި ބައިވެރިވެފައިވާ ޤައިދީންނަށް، ރަމަޟާން މަހަށް ޚާއްސަކޮށް ފެށި ޤުރުއާން މުބާރާތުގެ ނިމުމުގެ ރަސްމިއްޔާތު މާފުށީ ޖަލުގައި ބާއްވައިފިއެވެ.

މި މުބާރާތް ނިމުމުގެ ރަސްމިއްޔާތު ޝަރަފްވެރިކޮށްދެއްވީ ކޮމިޝަނަރ އޮފް ޕްރިޒަންސް އަޙްމަދު މުޙައްމަދު ފުޅުއެވެ.

30 މާރޗް 2023 ން 3 އޭޕްރިލް 2023 ށް ކުރިއަށްދިޔަ މި މުބާރާތުގައި 14 ފިރިހެން ޤައިދީންނާއި 13 އަންހެން ޤައިދީން ވަނީ ބައިވެރިވެފައެވެ.

މި މުބާރާތުގައި ބަލައިގެން ކިޔުމުން އަންހެން ގޮފިންނާއި އަދި ފިރިހެންނުން ގޮފިން އެންމެ މޮޅު ތިން ވަނަތައް ހޮވުމުގެ އިތުރުން އެންމެ މޮޅު ދިހަ ކިޔުންތެރިން ހޮވާފައިވެއެވެ.

މި މުބާރާތުން އެކި ވަނަތައް ހާސިލު ކުރި ބައިވެރިންނަށް ކޮމިޝަނަރ ވަނީ މަރުހަބާއި ތަހުނިޔާ ވިދާޅުވެފައެވެ.

އަދި މުބާރާތުގެ ބައިވެރިންނާއި ވާހަކަ ދައްކަވަމުން ކޮމިޝަނަރ ވިދާޅުވީ ކީރިތި ޤުރުޢާން ކިއެވުމުގެ މުބާރާތެއް ރަމަޟާން މަހާއި ދިމާކޮށް ބޭއްވޭކަމަކީ ވަރަށް ހިތްހަމަޖެހުން ލިބިގެންދާކަމެއްކަމަށާއި، އެ ސަރވިސްއިން ޤާއިދީން ރިހެބިލިޓޭޝަން އަށް ކުރާ މަސައްކަތުގެ އަސާސްތައް ބިނާވާންވާނީ އިސްލާމްދީނުގެ ސައްޙަ އަޤީދާ އާއި ދިވެހިންގެ އާދަކާދައާއި ސަޤާފަތުގެ މައްޗަށް ކަމުގައެވެ.

ކޮމިޝަނަރ ވިދާޅުވީ މިހާރުވެސް ބައެއް ޤައިދީން ގުރުއާން ހިތުދަސްކުރުމުގެ މަސައްކަތްވެސް ޖަލުގައި ތިބެގެން ކުރާކަމަށާއި، އަދި އެކަން ރަސްމީ ސިފައެއްގައި ވަޒަން ކުރަންޖެހޭ ކަމަށެވެ. އެގޮތުން ޤައިދީންގެ ތެރެއިން ހާފިޒުންނަށް ވެވޭނެ ފުރުޞަތު ފަހިކުރުމާއިއެކު ހާފިޒަކަށްވާ ޤައިދީންނަށް އެމީހުންގެ ހުކުމަށް ލުއިތަކެއް ލިބޭނެ އިންތިޒާމެއް ޤާނޫނުގެ ތެރެއިން ހޯއްދަވަން މަސައްކަތް ކުރައްވާނެކަމުގައި ކޮމިޝަނަރ ވިދާޅުވިއެވެ.

ކޮމިޝަނަރގެ އިތުރުން ޑެޕިއުޓީ ކޮމިޝަނަރ އޮފް ޕްރިޒަންސް އަލް އުސްތާޛް އިބްރާހިމް މުޙައްމަދު ދީދީ، ރިހެބިލިޓޭޝަން އެންޑް ރީއިންޓެގްރޭޝަން ކޮމާންޑް ހެޑް އެސްޕީ އިބްރާހިމް ނާޝިދު، މާފުށީ ޖަލުގެ ޑައިރެކްޓަރ އޭއެސްޕީ އަޙްމަދު ޖާދުﷲ  އާއި މާފުށީ ޖަލުގެ ސީނިއަރ މެނޭޖްމަންޓް އަދި މުބާރާތުގެ ބައިވެރިންގެ އާއިލާތައް މި ރަސްމިއްޔާތުގައި ބައިވެރިވެވަޑައިގެންނެވިއެވެ.