އިސްލާމްދީނުގެ މަގުބޫލުކަން އިތުރުވަމުންދަނީ މި ދީނަކީ ހައްގުގެދީނަށް ވާތީކަމަށް ޑރ. ޢަލީ ޒާހިރު ވިދާޅުވެއްޖެއެވެ.
ޑރ. ޢަލީ ޒާހިރު މިހެން ވިދާޅުވީ އިސްލާމްދީނުގެ މަޤްބޫލުކަން އިތުރުވަނީ ކީއްވެ'' މި މައުޟޫއަށް އިހްޔާ ފޯރަމްގައި ތަޤްރީރުކުރައްވަމުންނެވެ.
އިހްޔާ ފޯރަމްތަކުގެ 11 ވަނަ ފޯރަމްގައި ތަގްރީރުކުރައްވާފައިވަނީ ޑރ. ޢަލީ ޒާހިރާއި އައްޝައިޚް ނަޞްރުﷲ ޢަލީއެވެ.
މި ފޯރަމްގައި ތަޤްރީރުކުރައްވަމުން ޑރ. ޢަލީ ޒާހިރު ވިދާޅުވީ އިންސާނުންގެ ތެރެއިން ކޮންމެ މީހަކުވެސް އެމީހާގެ ފިތުރަތު ނިޔާކުރާގޮތުން ދީނަކަށް ބޭނުންވާކަމަށެވެ. އެނޫން ގޮތަކަށް އުޅޭނަމަ ވަރަށް ބޮޑެތި މައްސަލަތަކެއް ދިމާވާނެކަމަށާއި ދީނެއް ނެތި މީހާ އުޅެންފަށައިފިނަމަ ހެވާއި ނުބައި، ހައްގާއި ބާތިލް ވަކިނުކުރެވޭނެކަމަށް ވިދާޅުވިއެވެ.
މާތްﷲގެ ވަޙީ ބަސްފުޅަށް ބައްލަވަމުން، އިސްލާމްދީން ފިޔަވާ އެހެން ދީނެއް ހޯދައިގެންފި މީހާގެ ކިބައިން ހަމަހިލާ އެކަން ގަބޫލު ނުކުރައްވާނެ ކަމަށާއި މާތްﷲގެ ހަޟްރަތުގައި ދީނަކީ އިސްލާމްދީންކަމަށް ވިދާޅުވިއެވެ.
ބައެއް މީހުން ދީން ގަބޫލު ނުކުރާކަމަށް ދައްކާ ވާހަކަތަކަށް ބައްލަވަމުން ޑރ. ޢަލީ ޒާހިރު ވިދާޅުވީ އެފަދަ މީހުން އެ ހަދަނީ ދޮގުކަމަށެވެ. ސަބަބަކީ ކޮންމެ މީހަކީވެސް ރުހުމުގައިވެސް، އަދި ނުރުހުމުގައިވެސް ކޮންމެވެސް ދީނަކަށް ތަބައަވާ މީހަކަށް ވާތީކަމަށް ވިދާޅުވިއެވެ. އަދި ދެދުނިޔޭގެ ބާއްޖަވެރިކަމަށް މާތްﷲ ލައްވަވާފައިވާ ދީނަކީ އިސްލާމްދީންކަމަށް ވެސް ވިދާޅުވިއެވެ.
ޑރ. ޢަލީ ޒާހިރުވަނީ ދުނިޔޭގެ ކުރިއަރާފައިވާ ގައުމުތަކުގައި ހަދާފައިވާ ދިރާސާތަކަށް ވެސް މި ފޯރަމްގައި ބައްލަވާލައްވާފައެވެ. އެގޮތުން ޣައިރު މުސްލިމުންގެ ބަޔަކު، 2015 އިން 2060 ވަނަ އަހަރަށް ދުނިޔޭގެ އާބާދީއާއި ގުޅޭގޮތުން ހަދާފައިވާ ދިރާސާއަށް ބައްލަވަމުން، އެ ދިރާސާގައި ހުރިހާ ދީންތަކެއްގެ މައްޗަށް ކުރިހޯދާނެ ދީނަކީ އިސްލާމްދީން ކަމަށް ފާހަގަކޮށްފައިވާ ކަމަށް ވިދާޅުވިއެވެ.
އިސްލާމްދީން މިހާ ބާރުމިނެއްގައި ފެތުރެމުންދަނީ، މި ދީން މީހުންނަށް މިހާ މަގުބޫލުދީނަކަށް ވެގެންދަނީ މިއީ ހައްގުގެ ދީންކަމުގައިވާތީއާއި މި ދީނުގައިވާ ލުއިފަސޭހަކަމާއި، ހަމަހަމަކަމާއި، މިއީ އުންމީދު ގެނެސްދޭ ދީނަކަށްވާތީއާއި، އިޖުތިމާއީ، ދީނީ ރޫހުއާލާވާ، ޢަދުލުވެރި ދީނަކަށް ވާތީކަމަށް ވިދާޅުވިއެވެ.
އިސްލާމްދީނުގެ މަގުބޫލުކަން އިތުރުވަމުންދާ ސަބަބުތަކާއި ގުޅޭގޮތުން މި ފޯރަމްގައި ތަޤްރީރުކުރައްވަމުން އައްޝައިޚް ނަޞްރުﷲ ޢަލީ ވިދާޅުވީ މާތްﷲގެ ހަޟްރަތުގައި ގިޔާމަތާހަމައަށްވެސް ރުހިވޮޑިގަންނަވާ ދީނަކީ އިސްލާމްދީންކަމަށެވެ.
އެހެންކަމުން މާތްﷲ އަންގަވާފައިވާ ގޮތަށް އިސްލާމްދީނުގައި ސާބިތުވެ ތިބެންޖެހޭކަމަށާއި މިފަދައިން އަމަލުތައް ބެހެއްޓުމުން ޣައިރު މުސްލިމުންނަށް ފެނިގެންދަނީ ނަމޫނާ ދީނެއްގައި މުސްލިމުން އުޅެމުންދާތަން ކަމަށް ވިދާޅުވިއެވެ. އެކަމުގެ ސަބަބުން އިސްލާމްދީނަކީ މަގުބޫލު ދީނަކަށްވެގެންދާކަންވެސް ފާހަގަކުރެއްވިއެވެ. އިސްލާމްދީނަކީ ހުރިހާ އެންމެންނަށް އޮތް ދީނެއްކަމަށް ވިދާޅުވެ، ރަސޫލާ ﷺގެ ޒަމާނުގައި ހިނގައިދިޔަ އިބްރަތްތެރި ހާދިސާތަކަށް ބައްލަވާލެއްވިއެވެ. މި ދީނަކީ އިންސާނާއަށް ހިތްހަމަޖެހުން ގެނުވާ، ދީނެއްކަން ފާހަގަކުރައްވާ މި ދީނުގައި އިންސާނުންނަށް ލުއި ފަސޭހަކަން ދެއްވާފައިވަނީ ވަކި އުސޫލުތަކަކާއި އިންތަކަކާއިއެކުގައިކަމަށް ވިދާޅުވިއެވެ.
މި ފޯރަމްގައި، ޣައިރު މުސްލިމުންގެ މެދުގައި އިސްލާމްދީން މަޤްބޫލު ދީނަކަށްވާ ސަބަބުތަކާއި، ދީން އެހާބޮޑަށް ފެތުރެނީ ކީއްވެކަންކަމާއި، މި ދީނުގެ ހުރި ފުރިހަމަކަމާއި ރަނގަޅުކަމާ ގުޅޭ ގޮތުން ދެ ބޭފުޅުން ވަނީ ވަރަށް ތަފްސީލުކޮށް ބައްލަވާލައްވާފައެވެ.
