އިސްލާމްދީނުގެ ހަގީގަތް ދެނެގަތުމަށް ސުވާލު ކުރަންޖެހޭ: ރައީސް މައުމޫން

އިސްލާމްދީނުގެ ހަގީގަތް ދެނެގަތުމަށް ސުވާލުކުރަންޖެހޭކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެއެއެވެ.

މައުމޫން ފައުންޑޭޝަނުން ބޭއްވި ރަމަޟާން މަސް އިހްޔާ ކުރުމުގެ ޕްރޮގްރާމުގައި ވާޙަކަ ދައްކަވަމުންރައީސް މައުމޫން ވިދާޅުވީ އިސްލާމްދީނުގެ ހަގީގަތް އެނގޭނީ ސުވާލު ކޮށްގެން ކަމަށާއި ކުރާ ސުވާލަކުން މީހަކު ކާފަރު ނުވާނެ ކަމަށެވެ.

މިރޭގެ އިހްޔާ ޕްރޮގްރާމުގައި މައުޟޫއަކީ "ރަމަޟާން މަސް ޚާއްސަ މައްސަރަކަށްވި މާނައަކީ ކޮބާ" އެވެ.

ރަމަޟާންމަހުގެ ނަން ފިޔަވައި އެހެން މައްސަރެއްގެ ނަން ގުރުއާނުގައި އައިސްފައި ނުވާކަމަށް މައުމޫން ވިދާޅުވިއެވެ. އެ ސަބަބުތައް ރައީސް މައުމޫން ވިދާޅުވެދެއްވި އެވެ.

އެ މަނިކުފާނު ވިދާޅުވި ގޮތުގައި ރަމަޟާން މަހުގެޚާއްސާ އެތައް ސަބަބެއް އެބަ ހުރި ކަމަށާއި، ކީރިތި ގުރުއާނުގައި އަހަރުގެ މަހެއްގެ ނަމަކަށް އޮތީ ހަމައެކަނި ރަމަޟާން މަހުގެ ނަން ކަމަށާއި ރަމަޟާން މަހަށް ހާއްސަ ނަމާދެއްގެ ގޮތުގައި ތަރާވީސް ނަމާދު ބާވާލައްވާފައިވާ ކަމަށެވެ. އެމަހުގައި ކުރާ ހެޔޮކަންތައްތަކުގެ ސަވާބު އެހެން މައްސަރެއްގައި ނުވާވަރަށް އެކުލެވިގެން ވާކަމަށާއި މީގެ އިތުރުން އެއްހާސް މައްސަރަށްވުރުރެ ހެޔޮކަން ބޮޑު ރެއެއް ކަމުގައިވާ ލައިލަތުލްގަދުރި ވިލޭރޭ އަންނަނީ ވެސް ރަމަޟާން މަހުގައި ކަމަށް ރައީސް މައުމޫން ވިދާޅުވި އެވެ. މި މިކަންތައްތަކުން ރަމަޟާން މަހުގެ ހެޔޮކަން އެނގިލައްވާކަމަށްރައީސް މައުމޫން ވިދާޅުވިއެވެ.

ރަމަޟާން މަހުގެ ފަހު ދިހައިގެ ހާއްސަކަން ފާހަގަ ކުރައްވައި ރައީސް މައުމޫން ވިދާޅުވީ މާތް ރަސޫލާ(ސ) ރަމަޟާން މަހުގެ ފަހު ދިހައިގައި ރޭ އަޅުކަން ކުރެއްވުމަށް އަހަމިއްޔަތުކަމެއް ދެއްވި ކަމަށެވެ. އަދި އެކަލޭގެފާނުގެ އަނބިއަނބިކަނބަލުން ނިދިން ހޭލުއްވަވައި، ރޭއަޅުކަން ކުރައްވާ ކަމަށް ވެސް ރައީސް މައުމޫން ވިދާޅުވި އެވެ.

ރައީސް މައުމޫން ވިދާޅުވީ ރަމަޟާން މަހުގެ ފަހުދިހައިގެ އޮނަހިރި ރޭތަކުގެ ތެރެއިން އެއް ރެއަކީ ލައިލަތުލް ގަދުރިވިލޭރޭ ކަމަށާއި އެއީ ކޮން ރެއެއްކަން ކަނޑައެޅިގެން ގުރުއާނުންވެސް ރަސޫލާ(ސ) ހަދީސުންވެސް އެގިފައިނުވާކަމަށެވެ. އެހެންނަމަވެސް ގިނަ އިލްމުވެރިން އިއްތިފާގު ވެވަޑައިގެންފައިވަނީ ލައިލަތުލް ގަދުރި ވިލޭރޭއަކީ 27 ވިލޭރޭ ކަމަށް މައުމޫން ވިދާޅުވިއެވެ.

ރަމަޟާން މަސް ނިމުނުކަމުގައި ވިއަސް ހެޔޮއަމަލު ކުރުން ހުއްޓިގެން ނުވާނެކަމަށް ރައީސް މައުމޫން ވިދާޅުވިއެވެ. މީގެ އިތުރުން ރަމަޟާން މަސް އެންމެހާ މުސްލިމުންނަށް ދަސްކޮށްދެނީ ތަގުވާވެރިކަންކަމަށް މައުމޫން ވިދާޅުވިއެވެ.

މައުމޫން ފައުންޑޭޝަން އުފެއްދީ 2010 ވަނަ އަހަރު ގައެވެ. މިއީ އިހްޔާ ކުރުމުގެ ޕްރޮގްރާމް އެ ފައުންޑޭޝަނުން ބާއްވާ 8 ވަނަ އަހަރެވެ. ރައީސް މައުމޫން އިހްޔާ ޕްރޮގްރާމް ފެއްޓެވީ އެ މަނިކުފާނުގެ ވެރިކަމުގައި 1980 ވަނަ އަހަރު އެވެ.