ޑްރަގާއި މަނާ ބޭހާއި ބަނގުރަލާއެކު ހައްޔަރުކުރި މީހުންގެ ޚުލާސާ ބަޔާން އިއްވުމަށް ދިފާއަށް ވަގުތު ބޭނުންވޭ
10 އެޕްރީލު 2023 | ހޯމަ 05:50އެ މީހުންގެ މައްޗަށް އުފުލާފައިވަނީ ކެނެބިސް ޓްރެފިކް ކުރުމުގެ ކުށުގެ ދައުވާ
މި މައްސަލައިގައި ކެނެބިސް ޓްރެފިކް ކުރުމުގެ ދައުވާ އުފުލާފައިވަނީ 4 މީހެއްގެ މައްޗަށް
މާލޭގައި ފުލުހުން ކުރިއަށްގެންދިޔަ ޑްރަގް އޮޕަރޭޝަނެއްގެ ތެރެއިން ހައްޔަރުކޮށް، ކެނެބިސް ޓްރެފިކް ކުރުމުގެ ދައުވާ އުފުލާފައިވާ ފަރާތްތަކުގެ އަޑުއެހުން ކެންސަލްވެއްޖެއެވެ.
މި މައްސަލަ ކްރިމިނަލް ކޯޓުގައި ކުރިއަށް ގެންދަވަނީ ގާޒީ މުޙައްމަދު މިސްބާޙެވެ.
މި މައްސަލައިގެ އަޑުއެހުން ތާވަލު ކޮށްފައި އޮތީ ހޯމަ ދުވަހުގެ ހެނދުނު 10:30 އަށެވެ. މި އަޑުއެހުމުގައި އޮތީ ޚުލާސާ ބަޔާން އިއްވުމަށް ތާވަލުކޮށްފައެވެ.
އެހެންނަމަވެސް، ދިފާއީ ވަކީލު އިތުރު ވަގުތު ބޭނުންވާކަން ބަޔާން ކުރައްވާފައިވާތީ މި އަޑުއެހުން ކުރިއަށް ގެންދެވިފައެއް ނުވެއެވެ.
މި މައްސަލައިގައި ކެނެބިސް ޓްރެފިކް ކުރުމުގެ ދައުވާ އުފުލާފައިވަނީ 4 މީހެއްގެ މައްޗަށެވެ. އެއީ ގއ.ވިލިނގިލި ޒޫމް، މުޙައްމަދު ތަޤިއްޔު، ކ.މާފުށީ ވާރޭވިލާ އަހުމަދު އަހުނަފް އަސްފާޤް، ގދ.ވާދޫ ޗިޗަންޑާގޭ ވިޝާމް މުޙައްމަދުގެ އިތުރުން ގއ.ވިލިނގިލީ ނައިންފްލާވަރ އީމާން މުޙައްމަދެވެ.
އެ މީހުންގެ މައްޗަށް އުފުލާފައިވަނީ ކެނެބިސް ޓްރެފިކް ކުރުމުގެ ކުށުގެ ދައުވާއެވެ.
މި މައްސަލައިގައި ދައުވާ ލިބުނު އިތުރު ފަރާތެއްކަމަށްވާ އަމްޖަދު އަބްދުއްސައްތާރު ދައުވާއަށް އިއުތިރާފުވެ، އެތަކެއްޗަކީ އޭނާގެ ތަކެތިކަމަށް ވަނީ ބުނެފައެވެ. އެއާއެކު އޭނާގެ މައްޗަށް އަވަސް ނިޔާގެ ޝަރީއަތް ހިންގައި، އޭނާ އުމުރަށް ޖަލަށް ލުމާއެކު، އެއްލައްކަ ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން 2020 ވަނަ އަހަރު ވަނީ ޙުކުމް ކޮށްފައެވެ.
މި މައްސަލައާއި ގުޅޭގޮތުން ފުލުހުން ބުނެފައިވަނީ ކޯޓް އަމުރެއްގެ ދަށުން ހ. ވައިފިނި ހަވަނަ ފްލޯ ފާސްކުރިއިރު ގިނަ އަދަދެއްގެ މަސްތުވާތަކެތި ފެނިފައިވާ ކަމަށެވެ. އަދި މަނާ ބޭހާއި ބަނގުރާ ކަމަށް ޝައްކު ކުރެވޭ ދިޔާ އެއްޗެއްސާއި ގިނަ އަދަދެއްގެ ފައިސާވެސް ވަނީ ފެނިފައެވެ.
