މާޗް މަހުގެ ނިޔަލަށް ރާއްޖޭގެ ރިޒަރވް ދަށަށް

ރާއްޖޭގެ ރަސްމީ ރިޒަރވް ދަަށަށް ގޮސްފިއެވެ.

މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތަފާސްހިސާބުތަކުން އެނގޭ ގޮތުން ފާއިތުވި މާޗް މަހުގެ ނިޔަލަށް ދައުލަތުގެ ރިޒަރވް ވަނީ 764.63 މިލިއަން ޑޮލަރަށް ދަށްވެފައެވެ. އެމްއެމްއޭގެ ތަފާސްހިސާބުތަކުގައިވާ ގޮތުން ފެބްރުއަރީ މަހާއި މާރޗް މަހާއި އަޅައި ކިޔާނަމަ، މާޗް މަހު ރަސްމީ ރިޒާވުން 31.2 މިލިއަން ޑޮލަރު ވަނީ މަދުވެފައެވެ. އަދި ރަސްމީ ރިޒާވްގައި ފާއިތުވި ފެބްރުއަރީ މަހުގެ ނިޔަލަށް ހުރީ 795.83 މިލިއަން ޑޮލަރެވެ.

މީގެ އިތުރުން ޖެނުއަރީ މަހުގެ ނިޔަލަށް ރަސްމީ ރިޒާވްގެ ގޮތުގައި ހުރީ 789.97 މިލިއަން ޑޮލަރެވެ. އެމްއެމްއޭގެ ތަފާސްހިސާބުތަކުން އެނގޭ ގޮތުން މިދިޔަ މާރޗް މަހު ކުރު މުއްދަތުގެ ދަރަނި 564.44 މިލިއަން ޑޮލަރުރަށް އަރައެވެ. އަދި ކުރު މުއްދަތުގެ ދަރަނި ރަސްމީ ރިޒާވުން އުނިކުރުން އެ މަހު ބޭނުންކުރެވޭ ރިޒާވްގެ ގޮތުގައި ހުރީ 200 މިލިއަން ޑޮލަރެވެ. ހަމައެހެންމެ ކުރު މުއްދަތުގެ ދަރަނި އުނިކުރުމުން ފެބްރުއަރީ މަހު ބޭނުން ކުރެވޭ ރިޒާވް ހުރީ 235.48 މިލިއަން ޑޮލަރުގައެވެ.

ދައުލަތުގެ ޚަރަދުތަކުގެ ތަފްސީލަށް ބަލާ ނަމަ މި އަހަރުގެ ފުރަތަމަ 3 މަސް ނިމުނުއިރު ދައުލަތުގެ ޚަރަދު 11 ބިލިއަނަށްވުރެ މައްޗަށް ވަނީ އަރާފައެވެ.

ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތަކުން ދޭހަވާ ގޮތުން، މި އަހަރުގެ މިހާތަނަށް ދައުލަތުން ކުރި ޚަރަދު، ފާއިތުވި އަހަރުގެ މި މުއްދަތާ އަޅާ ބަލާއިރު ވަނީ އިތުރުވެފައެވެ. އަދި މާރޗް 30 ގެ ނިޔަލަށް މިއަހަރު 11.1 ބިލިއަން ރުފިޔާ ޚަރަދުގެ ގޮތުގައި ހިނގާފައިވެއެވެ. އަދި މިދިޔަ އަހަރުގެ މި މުއްދަތުގައި ޚަރަދުގެ ގޮތުގައި ހިނގާފައިވަނީ 9.8 ބިލިއަން ރުފިޔާއެވެ.

މިއަހަރު ހިނގާފައިވާ ޚަރަދުގެ ތެރެއިން އެންމެ ބޮޑު ބައެއް ހިއްސާކުރަނީ ރިކަރަންޓް ޚަރަދުކަން ފާހަގަކޮށްލެވެއެވެ. އެ ތަފާސްހިސާބުތަކުގައި ވާގޮތުން ރިކަރަންޓް ޚަރަދުގެ ގޮތުގައި 7.6 ބިލިއަން ރުފިޔާ ހިނގާފައިވެއެވެ. މިއީވެސް މިދިޔަ އަހަރުގެ މި މުއްދަތާ އަލާ ބަލާއިރު 1 ބިލިއަން އިތުރު އަދަދެކެވެ. މިގޮތުން މުސާރައާއި ޕެންޝަނަށް 2.8 ބިލިއަން ރުފިޔާ ޚަރަދުކޮށްފައިވެއެވެ.

މީގެ އިތުރުން އެޑްމިނިސްޓްރޭޓިވް އަދި އޮޕަރޭޝަނަލް ޚަރަދުގެ ގޮތުގައި 4.7 ބިލިއަން ރުފިޔާ ހިނގާފައިވެއެވެ. އޭގެ ތެރެއިން އެންމެ ބޮޑު ޚަރަދެއް ކޮށްފައިވަނީ ހިލޭ އެހީއާއި ސަބްސިޑީ ދިނުމަށެވެ. މިކަމަށް 2.6 ބިލިއަން ރުފިޔާ ޚަރަދުކޮށްފައިވެއެވެ. މިގޮތުން ސަބްސިޑީއަށް 1.2 ބިލިއަން ރުފިޔާ ވަނީ ހިނގާފައެވެ. ރިކަރަންޓް ޚަރަދުގެ ގޮތުގައި 3.4 ބިލިއަން ރުފިޔާ ވަނީ ހިނގާފައެވެ. މިގޮތުން އިންފްރާސްޓްރަކްޗަރ އެސެޓަށް 2.6 ބިލިއަން ރުފިޔާ ހިނގާފައިވެއެވެ.

މީގެ އިތުރުން ޕަބްލިކް ސެކްޓަރ އިންވެސްޓްމެންޓް ޕްރޮގްރާމް (ޕީއެސްއައިޕީ) އަށް 2.69 ބިލިއަން ރުފިޔާ ޚަރަދުކޮށްފައިވާކަމަށް ތަފާސްހިސާބުން ދައްކައެވެ. އަދި ސޮވެރިން ޑިވެލޮޕްމެންޓް ފަންޑަށް 278.4 މިލިއަން ރުފިޔާ ފޮނުވާފައިވާއިރު، 788.9 މިލިއަން ރުފިޔާ ލޯނު އަނބުރާ ދެއްކުމަށް ހޭދަކޮށްފައިވެއެވެ. ފިނޭންސް މިނިސްޓްރީން ވަނީ މި ހިނގާ 2023 ވަނަ އަހަރު ނިމޭއިރު ރަސްމީ ރިޒާވްގައި 606.3 މިލިއަން ޑޮލަރު ހުންނާނެ ކަމަށް ލަފާކޮށްފައެވެ.