އަރބަންކޯގެ ކޮމިއުނިޓީ ރޯދަވީއްލުން މިފަހަރު އޯޓިޒަމް ސެންޓަރުގެ ކުދިންނަށް

އަރބަންކޯއިން މިއަހަރުގެ ކޮމިއުނިޓީ ރޯދަވީއްލުން ހުޅުމާލޭގައި ހިންގަމުން އަންނަ މޯލްޑިވްސް އޯޓިޒަމް ސެންޓަރަށް ދީފިއެވެ.

އަރބަންކޯއިން ގެންދަނީ ކޮންމެ އަހަރެއްގެ ވެސް ރަމަޟާންމަހު ކޮމިއުނިޓީ ރޯދަވީއްލުން ބާއްވަމުންނެވެ.

އެގޮތުން މި އަހަރުގެ ރޯދަވީއްލުން ހުޅުމާލޭގައި ހިންގަމުން އަންނަ އޯޓިޒަމް ސެންޓަރަށް ޚާއްސަކޮށްފައިވާއިރު، މި ރޯދަވީއްލުމުގައި އެ ސެންޓަރުގައި ރަޖިސްޓްރީވެފައިވާ 192 ކުދިންނާއި އެކުދިންގެ ބެލެނިވެރިން އަދި 40 މުވައްޒަފުން ވަނީ ބައިވެރިވެފައެވެ.

މި ރޯދަވީއްލުން ބާއްވާފައިވަނީ ސެންޓްރަލް ޕާކުގައެވެ. މި ރޯދަވީއްލުމުގެ ކުރިން ރޯދަވީއްލުމުގައި ބައިވެރިވި ކުދިންނަށް ޚާއްސަކޮށް ރޮބޯމޭންގެ ހަރަކާތްތައް ވެސް ކުރިއަށްގެންގޮސްފައެވެ.

މި ހިނގާ އޭޕްރިލް މަހަކީ އިންޓަނޭޝަނަލް އޯޓިޒަމް އެވެއަރނެސް މަހުގެ ގޮތުގައި ފާހަގަކުރަމުން އަންނަ މަހެވެ. މި ރޯދަވީއްލުން އޯޓިޒަމް ސެންޓަރަށް ޚާއްސަކުރީ މި މަސް ފާހަގަކުރުމަށް ކަމަށް އަރބަންކޯއިން ބުނެފައިވެއެވެ.