ހޯރަފުށީ ޖުވެނައިލް ޖަސްޓިސް ޔުނިޓްގެ މަސައްކަތް ހަލުއިކަމާއެކު ކުރިއަށް

ހއ. ހޯރަފުށީ ޖުވެނައިލް ޖަސްޓިސް ޔުނިޓްގެ މަސައްކަތް ހަލުއިކަމާއެކު ކުރިއަށްދާކަމަށް، އެ މަސައްކަތް ކުރަމުން އަންނަ އެމްޓީސީސީން ބުނެފިއެވެ.

މަސައްކަތް ގޮސްފައިވާ ހިސާބު ހާމަކުރަމުން އެމްޓީސީސީން ބުނީ، ހޯރަފުށީ ޖުވެނައިލް ޖަސްޓިސް ޔުނިޓް (ހާފްވޭ ހައުސް) އިމާރާތްކުރުމުގެ މަޝްރޫއުގެ ދަށުން، ރޫފް ސްޓްރަކްޗަރ ހެދުމުގެ މަސައްކަތް މިހާރު ވަނީ އެއްކޮށް ނިމިފައި ކަމަށެވެ. އަދި، ސައިޓުގައި މިހާރު ކުރިއަށްދަނީ ރޫފިންގ ޝީޓް ހަރުކުރުމާއި، ޕްލާސްޓަރިންގ މަސައްކަތް ކަމަށް އެ ކުންފުނިން ބުންޏެވެ.

ޖުވެނައިލް ޖަސްޓިސް ޔުނިޓްގެ ބިންގާ އަޅާފައިވަނީ މިދިޔަ އަހަރުގެ ޖުލައި މަހުގެ 29 ވަނަ ދުވަހުއެވެ. ހާފްވޭހައުސް އެޅުމަށް 10،000 އަކަފޫޓުގެ ބިމެއް، ހޯރަފުށީ ކައުންސިލުން ވަނީ ދޫކޮށްފައެވެ.

މި މަޝްރޫއުގެ އަގަކީ 5.99 މިލިއަން ރުފިޔާއެވެ.

ހާފްވޭ ހައުސްގެ އެންމެ ބޮޑު ބޭނުމަކީ، ކުށްތަކުގައި ގެންނަ ކުދިންނަށް ފަރުވާއާއި އެހީތެރިކަން ފޯރުކޮށްދީ، އެ ކުދިން އަނބުރާ މުޖުތަމައަށް ނެރުމުގައި ބޭނުންވާ އެހީތެރިކަމާއި ރިހެބިލިޓޭޝަން ފަރުވާ ފޯރުކޮށްދިނުމެވެ.