އޮފީސް މުބާރާތުގެ ސެމީގެ ޖާގަތައް ޔަގީންވެއްޖެ
8 އެޕްރީލު 2023 | ހޮނިހިރު 15:51ސެމީފައިނަލް ދެ މެޗު އާދިއްތަ ދުވަހު
ރަމަޟާން ކްރިކެޓް ކާނިވަލުގެ އޮފީސް މުބާރާތުގެ ތެރެއިން
ރަމަޟާން ކްރިކެޓް ކާނިވަލުގައި ހިމެނޭ އޮފީސް މުބާރާތުގެ ސެމީފައިނަލްގައި ވާދަކުރާނެ ޓީމްތައް ޔަގީންވެއްޖެއެވެ.
ގްރޫޕް އޭގެ އެއްވަނަ ޓީމްގެ ގޮތުގައި ސެމީފައިނަލުން ޖާގަ ހޯދީ ރައީސުލްޖުމްހޫރިއްޔާގެ އޮފީހުގެ ޓީމެވެ. ގްރޫޕް ބީގެ އެއްވަނަ ޓީމްގެ ގޮތުގައި ސެމީގެ ޖާގަ ހޯދީ މީރާއެވެ. ގްރޫޕް ސީގެ އެއްވަނަ ހޯދައިގެން ސެމީފައިނަލަށް ދަތުރުކުރީ ޕޮލިސް ކްލަބެވެ. ތިން ގްރޫޕުން ދެވަނަ ހޯދި ތިން ޓީމްގެ ތެރެއިން އެންމެ ރަނގަޅު ނަތީޖާ ހޯދައިގެން ސެމީފައިނަލްގެ ފަހު ޖާގަ ހޯދީ ކަސްޓަމްސް ރެކްރިއޭޝަން ކްލަބެވެ. ކަސްޓަމްސްއަކީ މީރާ ހިމެނުނު ގްރޫޕް ބީގެ ދެވަނަ ޓީމެވެ.
ސެމީފައިނަލްގައި ރައީސުލްޖުމްހޫރިއްޔާގެ އޮފީހުގެ ޓީމް ވާދަކުރާނީ ކަސްޓަމްސް ރެކްރިއޭޝަން ކްލަބާއެވެ. މީރާ ވާދަކުރާނީ ޕޮލިސް ކްލަބާއެވެ. ޕޮލިސް ކްލަބް ވަނީ ގްރޫޕް ސްޓޭޖް ފަހު މެޗުގައި 46 ލަނޑުން އިމިގްރޭޝަން ބަލިކޮށްފައެވެ. ކަސްޓަމްސް ވަނީ ފަހު މެޗުގައި ހަ ވިކެޓުން ޓީމް ޚާރިޖީ ކްލަބް ބަލިކޮށްފައެވެ. ސެމީފައިނަލް ދެ މެޗު ކުޅޭނީ އާދިއްތަ ދުވަހުއެވެ.
