ކުޑަ ހީނާއާއެކު ވެލެންސިއާ އިން ފަރިތަކުރުންތައް ފަށައިފި

އައު ސީޒަނަށް ތައްޔާރުވުމުގެ ގޮތުން ކުލަބް ވެލެންސިއާ އިން ފަރިތަކުރުންތައް ފަށައިފި އެވެ.

އައު ސީޒަނަށް ވެލެންސިއާ އިން ފަރިތަކުންތައް ފެށިއިރޔު، ސީޒަނަށް ކުލަބުތަކުގެ ތައްްޔާރީތައް ފެންނަނީ ފަނޑުކޮށެވެ. ވެލެންސިއާ އިން ފަރިތަކުރުންތައް ފަށާފައި ވަނީ އިސްމާއީލް އާސިފް (ކުޑަ ހީނާ) ގެ އިރުޝާދުގެ ދަށުންނެވެ. މިދިޔަ ސީޒަންގައި ވެލެންސިއާ އަށް ކުޅުނު މުހިންމު ބައެއް ކުޅުންތެރިން ވަނީ ކުލަބު ދޫކޮށްލައިފަ އެވެ. އޭގެ ތެރޭގައި ވެލެންސިއާ އިން ޕްރެޒިޑެންޓްސް ކަޕް ކާމިޔާބު ކުރުމުގައި މުހިންމު ރޯލެއް އަދާ ކުރި އަލީ ފާސިރު (ސެންޓޭ)، އިސްމާއީލް އީސަ (މެސީ) އަދި މުޙައްމަދު ފައިސަލް ހިމެނެ އެވެ. އައު ސީޒަނަށް ތައްޔާރުވުމުގެ ގޮތުން ވެލެންސިއާ އިން ހޯދި އެންމެ ފާހަގަކޮށްލެވޭ ކުޅުންތެރިޔަކީ މިދިޔަ އަހަރުތަކުގައި މާޒިޔާ ސްޕޯޓްސް އެންޑް ރެކްރިއޭޝަނަށް ކުޅުނު އިބްރާހީމް ވަޙީދު ޙަސަން (އިއްބެ) އެވެ.

ވެލެންސިއާ އަކީ އައު ސީޒަނަށް ފަރިތަކުރުންތައް ފެށި ހަތަރު ވަނަ ކުލަބެވެ. މީގެ ކުރިން މާޒިޔާ، ކުލަބް އީގަލްސް އަދި އަލަށް ފުރަތަމަ ޑިވިޝަނަށް ޕްރޮމޯޓުވި ބުރު ސަޕޯޓްސްް ކުލަބުން ވެސް ވަނީ ފަރިތަކުރުންތައް ފަށައިފަ އެވެ. އެހެން ޓީމުތަކާ ޚިލާފަށް ސީޒަންގެ ތައްޔާރީތައް ފެށި މާޒިޔާ އިން ވަނީ ޗެރިޓީ ޝީލްޑް ކާމިޔާބުކޮށްފަ އެވެ. އައު ސީޒަނަށް ފަރިތަކުރުންތައް ނުފަށާ ކުލަބުތަކަކީ، ޓީސީ ސްޕޯޓްސް ކުލަބް، ކުލަބް ގްރީން ސްޓްރީޓްސް، ޔުނައިޓެޑު ވިކްޓަރީ އަދި ސުޕަ ޔުނައިޓެޑު ސްޕޯޓްސް ކުލަބް އެވެ.