މަގުމަތީގެ ގަވާއިދުތަކަށް ހުރުމަތްތެރިކޮށް ހިތާ މީހުންނަށް ހަދިޔާ ލިބޭނެ: ފުލުހުން

މަގުމަތީގެ ގަވާއިދުތަކަށް ހުރުމަތްތެރިކޮށް ހިތާ މީހުންނަށް މި ރަމަޟާން މަހު ހަދިޔާދެމުން ގެންދާ ކަމަށް ފުލުހުން ބުނެފިއެވެ.

ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަފުޅުދައްކަވަމުން ސަބް އިންސްޕެކްޓަރ އޮފް ޕޮލިސް މުހައްމަދު އަސްލަހް ވިދާޅުވީ، ފުލުހުން ހަދިޔާ ދެނީ "ރައްކާ" ޕްރޮގްރާމުގެ ދަށުން މި އަހަރުގެ ރަމަޟާން މަހަށް ހާއްސަކޮށް ހިންގާ "ފަހި ރާސްތާ" ޕްރޮގްރާމުގެ ތެރެއިން ކަމަށެވެ. އޭނާ ވިދާޅުވީ ހަދިޔާ ދޭނީ މަގުމަތީގެ ގަވާއިދުތަކަށް ހުރުމަތްތެރިކޮށް ހިތައި، ގަވާއިދުން ލާޒިމުކުރާ ސްޓިކާތަކާއި ސަލާމަތީގޮތުން އުޅަނދުގައި ފުރިހަމަވާންޖެހޭ ކަންކަން ފުރިހަމަކޮށްފައިވާ މީހުންނަށް ކަމަށެވެ. އަދި ދުއްވާފައި ދަނީ ރަނގަޅު ދުވެއްޔެއްގައިތޯވެސް ބަލާކަމަށް އޭނާ ވިދާޅުވިއެވެ.

އަސްލަހް ވިދާޅުވީ ގިނަ ބަޔަކު ގާނޫނާއި ގަވައިދާ އެއްގޮތަށް، އުޅަނދުގައި ހުރިހާ ސްޓިކާއެއް ހަމަކުރާކަން ފާހަގަކުރެވޭ ކަމަށެވެ.

ފަހި ރާސްތާ ޕްރޮގްރާމުގެ ތެރޭގައި ހެލްމެޓުވެސް ހަދިޔާކުރާ ކަމަށާއި، ހެލްމެޓު ހަދިޔާކުރަނީ ގަވާއިދަށް ނުފެތޭ ހެލްމެޓު އަޅާ މީހުންނަށާއި ހެލްމެޓު ހަލާކުވެފައި ހުންނަ މީހުންނަށް ކަމަށް އޭނާ ވިދާޅުވިއެވެ. އަދި 99 ޕަސެންޓް މީހުން ހެލްމެޓު ބޭނުންކުރަނީ ރަނގަޅަށް ކަމަށް އޭނާ ވިދާޅުވިއެވެ.