މާފުށީގެ ރައްޔިތުންނަށް ފުރުސަތު ބޮޑުވާގޮތަށް ގޯތި ދޫކުރުމުގެ އުސޫލު އިސްލާހު ކޮށްފި

ކ. މާފުށީގައި އަލަށް ހިއްކި ބިމުން ދޫކުރާ ގޯތިތައް އެ ރަށުގެ ރައްޔިތުންނަށް ފުރުސަތު ބޮޑުވާ ގޮތަށް، ގޯތި ދޫކުރުމުގެ އުސޫލު އިސްލާހުކޮށްފިއެވެ.

މާފުށިން ދޫކުރަން ނިންމާފައިވަނީ 2000 އަކަފޫޓުގެ 308 ބަންޑާރަ ގޯއްޗެވެ.

Advertisement

މާފުށި ހިއްކި ބިމުން ގޯއްޗަށް އެދުމުގެ ފުރުސަތު އެންމެ ފުރަތަމަ ހުޅުވާލީ މިދިޔަ މާޗު މަހުގެ 30 ވަނަ ދުވަހުއެވެ. އޭރު އާންމު ކުރި އުސޫލަށް ބަދަލުތަކެއް ގެނައުމާ ގުޅިގެން އެ އިއުލާން ކައުންސިލުން މިހާރު ވަނީ ބާތިލު ކޮށްފައެވެ. އެގޮތުން އުސޫލަށް ގެނެސްފައިވާ އިސްލާހުގައި ބުނެފައިވަނީ އުމުރުން 40 އަހަރު ފުރިފައިވާ ނުވަތަ އެއަށްވުރެ ދޮށީ މީހުންނަށް 20 ޕޮއިންޓު ދޭނެ ކަމަށާއި އަދި މާފުށީ ރަށްވެއްސަކަށް ނުވާނަމަ 30 ޕޮއިންޓު އުނިކުރާނެ ކަމަށެވެ.

އުސޫލަށް ގެނައި ބަދަލުތަކާއެކު މިހާރު މާފުށިން ބިމަށް އެދި ހުށަހެޅުމުގެ ފުރުސަތު އަލުން ވަނީ ހުޅުވާލައިފައެވެ.

މާފުށީ ހިއްކި ބިމުން ގޯތި ބޭނުންވާ މީހުންގެ ކިބައިގައި ހުންނަންޖެހޭ ޝަރުތުތަކުގެ ތެރޭގައި ރާއްޖޭގެ އެއްވެސް ރަށަކުން ބަންޑާރަ ގޯއްޗެއް ނުވަތަ އަމިއްލަ ގޯއްޗެއް ނުވަތަ އެފަދަ ގޯއްޗަކުން 600 އަކަ ފޫޓަށްވުރެ ބޮޑު ބައެއް ލިބިފައިވާ މީހަކަށް ނުވުމާއި ސަރުކާރުން ހަދާފައިވާ އިމާރާތެއް ނުވަތަ ފުލެޓެއް އެމީހެއްގެ ނަމުގައި ރަޖިސްޓަރީވެފައިވާ ފަރާތަކަށް ނުވުމާއި، އެފަދަ ތަނެއް އަމިއްލަ ނަމުގައި އޮތްނަމަ އެތަން ދޫކޮށްލާ ނުވަތަ ވިއްކާލާފައިވާތާ 2 އަހަރު ދުވަހަށްވުރެ ގިނަ ދުވަސް ވެފައިވާ ފަރާތަކަށްވުން ހިމެނެއެވެ.

މާފުށިން ގޯއްޗަށް އެދި ހުށަހެޅުމަށް ބޭނުންވާ ފޯމް ސަރުކާރުގެ ގެޒެޓުން މިހާރު ޑައުންލޯޑް ކުރެވޭނެއެވެ. އަދި މާފުށި ކައުންސިލްގެ އިދާރާއިން، 15 ޖޫން 2023 ވާ ބުރާސްފަތި ދުވަހުގެ ނިޔަލަށް ރަސްމީ ބަންދު ނޫން ކޮންމެ ދުވަހެއްގެ 9:30 އިން 12:30 އަށް އެ ފޯމް ލިބެން ހުންނާނެ ކަމަށް އެ ރަށު ކައުންސިލުން ބުންޏެވެ. ފޯމު ބަލައިގަންނާނީ އޭޕްރީލް 9 ވަނަ ދުވަހުން ފެށިގެން ޖޫން 15 ވަނަ ދުވަހާ ހަމައަށް ރަސްމީ ބަންދު ނޫން ކޮންމެ ދުވަހެއްގެ 9:30 އިން 13:00 އާ ހަމައަށެވެ.

މާފުށީގައި އަލަށް ހިއްކާފައިވަނީ 25 ހެކްޓަރުގެ ބިމެވެ. އެއީ މާފުއްޓާ ކައިރިން އެ ރަށު ފަޅުން ހިއްކި ބިމެކެވެ. މި ބިމާ މާފުއްޓާ ގުޅުވާލާނީ ކޯޒްވޭއަކުންނެވެ.