މިއަންނަ މަހު ރާއްޖޭގައި ބޭއްވުމަށް ހަމަޖެހިފައިވާ އޭޝިއަން ބޮޑީބިލްޑިންގ އެންޑް ފިޒިކް ޗެމްޕިއަންޝިޕްގެ ޑިޖިޓަލް ޕާޓްނަރަކަށް ދިރާގު ހަމަޖައްސައިފިއެވެ.

މި މުބާރާތް ކުރިއަށް ގެންދާނީ މިއަންނަ މަހުގެ 15ން 21ށް ކ. މާފުށީގައެވެ. ތަފާތު 25 ގައުމަކުން މި މުބާރާތުގައި ބައިވެރިވާއިރު، އެތުލީޓުންނާއި އޮފިޝަލުންނާއެކު 500 ފަރާތުން ބައިވެރިވާނެއެވެ.

މިއީ މިހާތަނަށް ރާއްޖޭގައި ބާއްވާ އެންމެ ފުރަތަމަ އޭޝިއަން ބޮޑީބިލްޑިންގ އެންޑް ފިޒިކް ޗެމްޕިއަންޝިޕެވެ. މުބާރާތް އިންތިޒާމުކުރަނީ އޭޝިއާ ބޮޑީބިލްޑިންގ ފެޑެރޭޝަނުންނެވެ.

މި އެއްބަސްވުމާ ގުޅޭގޮތުން ވާހަކަދައްކަމުން ދިރާގުގެ ސީނިއަރ މެނޭޖަރ ބްރޭންޑް އެންޑް މާކެޓިންގ ކޮމިއުނިކޭޝަންސް، މުހައްމަދު މިރްޝަން ހަސަން ވިދާޅުވީ، 54 ވަނަ އޭޝިއަން ބޮޑީބިލްޑިންގ އެންޑް ފިޒިކް ޗެމްޕިއަންޝިޕްގެ ޑިޖިޓަލް ޕާޓްނަރަކަށް ދިރާގު ހަމަޖެއްސުމަކީ އެކުންފުންޏަށް ލިބޭ އިތުރު ކުރިއެރުމެއްކަމަށެވެ. އަދި މި މުބާރާތް ބޭއްވުމަށްޓަކައި ދިރާގުގެ ފަރާތުން ލިބޭ އެހީތެރިކަމަށް މޯލްޑިވްސް ބޮޑީބިލްޑިންގ އެސޯސިއޭޝަންގެ ރައީސް އިބްރާހީމް ހަސަން ވަނީ ޝުކުރުއަދާކުރައްވާފައެވެ.