އާރުޓީއެލް ދަތުރުތައް ޖުލައި މަހު ހުވަދޫގައި ފަށަނީ

އާރުޓީއެލްގެ ދަތުރުތައް ޖުލައި މަހުގެ ތެރޭގައި ހުވަދުއަތޮޅުގައި ފެށުމަށް މަސައްކަތްކުރަމުންދާ ކަމަށް އެމްޓީސީސީން ބުނެފިއެވެ.

ދިވެހިރާއްޖޭގެ ރަށްތައް ހައި ސްޕީޑް ފެރީ ވިއުގައަކުން ގުޅާލުމަށް ފަރުމާކޮށްފައިވާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވޯރކް" މަޝްރޫޢުގެ ދެވަނަ ފިޔަވަހީގެ ދަށުން، ހުވަދު އަތޮޅަށް ބޭނުންވާ ލޯންޗުތަކުގެ ތެރެއިން ފުރަތަމަ ލޯންޗާ މިއަދު ވަނީ އެމްޓީސީސީން ހަވާލުވެފައެވެ. އެ ލޯންޗު މިއަދު ވަނީ ތިލަފުށީ ބޯޓްޔާޑުން މޫދަށް ބާލައިފައެވެ.

ތިލަފުށީގައި ހުންނަވާ މީޑިއާތަކަށް މައުލޫމާތު ދެއްވަމުން އެމްޓީސީސީގެ ޓްރާންސްޕޯޓް ޑިވިޝަންގެ ޖެނެރަލް މެނޭޖަރު އިސްމާއިލް ފާރިގް ވިދާޅުވީ މި ލޯންޗަކީ ވެސް އާރުޓީއެލްގެ ފުރަތަމަ ފިޔަވަހީގައި ބޭނުންކުރި ލޯންޗުތައް ފަދައިން ކޮންޑިޝަން ރަނގަޅު، ރީތި ލޯންޗުތަކެއް ކަމަށެވެ. އަދި ކުރީގެ ލޯންޗުތަކަށްވުރެ ޖާގަ ތަނަވަސް ވާނެ ކަމަށް ވެސް އޭނާ ވިދާޅުވިއެވެ.

އިތުރަށް ފާރިގް ވިދާޅުވީ ޖުލައި މަހާ ހަމައަށް ހަ ލޯންޗު ހުވަދު އަތޮޅުގައި ބޭނުންކުރުމަށް ޓަކައި ނިންމާލެވޭނެ ކަމަށެވެ. އަދި ފުރަތަމަ ފިޔަވަހީގެ ދަތުރުތައް ހުވަދު އަތޮޅަށް ފަށާނީ ހަ ލޯންޗާ އެކު ކަމަށް އޭނާ ވިދާޅުވިއެވެ. އަދި ހުވަދު އަތޮޅާއެކު އައްޑު އާއި ފުވައްމުލަކު ވެސް އާރުޓީއެލްގެ ދަށުން ގުޅައިލެވޭނެ ކަމަށް ވެސް ފާރިގް ވިދާޅުވިއެވެ

ފާރިގް ވިދާޅުވީ މި ލޯންޗަކީ އާރުޓީއެލްގެ ފުރަތަމަ ފިޔަވަހީގެ ލޯންޗުތައް ފަދައިން 50 ސީޓުގެ ލޯންޗަކަށް ވީ ނަމަވެސް، އެތެރޭގައި ޖާގަ ތަނަވަސް ވާނެ ކަމަށެވެ. އަދި ވީލް ޗެއާރ އާއި ސްޓްރެޗާ ބަހައްޓާ ސަރަހައްދުތައް ޖާގަ ބޮޑުވާނެކަމަށް އޭނާ ވިދާޅުވިއެވެ.

މި މަޝްރޫޢުގެ ފޭސް 1 ގެ ދަށުން، ޒޯން 1 ގެ ހއ. ހދ. އަދި ށ. އަތޮޅަށް މިހާރުވަނީ ރާއްޖެ ޓްރާންސްޕޯޓް ލިންކް ސްޕީޑް ފެރީގެ ޙިދުމަތް ދޭން ފެށިފައެވެ. މީގެ އިތުރުން ޅ އަތޮޅުގައި ވެސް މި ހިދުމަތްވަނީ ދޭން ފަށާފައެވެ.

މުޅި ރާއްޖެ ކަނޑުމަގުން ގުޅާލެވޭ ރާއްޖެ ޓްރާންސްޕޯޓް ލިންކް (އާރް.ޓީ.އެލް) ހައި ސްޕީޑް ފެރީ ޚިދުމަތަކީ ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިހުގެ ވަޢުދުފުޅެކެވެ. މިގޮތުގެ މަތިން، "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވޯރކް" މަޝްރޫޢުގެ ފުރަތަމަ ފިޔަވަހި ސަރުކާރުން އެމްޓީސީސީއާއި ހަވާލުކުރީ 17 ޖެނުއަރީ 2021 ވަނަ ދުވަހުއެވެ.