1444 ވަނަ އަހަރުގެ ރަމަޟާން މަހުގެ ފުރަތަމަ 10 ދުވަހު ފިތުރު ޒަކާތުގެ ގޮތުގައި 1.3 މިލިއަން ރުފިޔާ ލިބިއްޖެއެވެ.

އިސްލާމިކް މިނިސްޓްރީން ވަނީ ފާއިތުވި 4 އަހަރު ރަމަޟާން މަހުގެ ފުރަތަމަ 10 ދުވަހު ފިތުރު ޒަކާތުގެ ގޮތުގައި ލިބިފައިވާ ފައިސާގެ އަދަދު ހާމަކޮށްފައެވެ. އެގޮތުން މިހިނގާ 1444 ވަނަ އަހަރު ފިތުރު ޒަކާތުގެ ގޮތުގައި 1،310،160 ރުފިޔާ ވަނީ ލިބިފައެވެ.

ފާއިތުވި 4 އަހަރަށް ބަލާއިރު، ރޯދަ މަހުގެ ފުރަތަމަ 10 ދުވަހު ފިތުރު ޒަކާތުގެ ގޮތުގައި އެންމެ ގިނަ ފައިސާ ލިބިފައިވަނީ 1441 ވަނަ އަހަރުއެވެ. އެގޮތުން އެ އަހަރު 1.5 މިލިއަން ރުފިޔާ ލިބިފައިވާއިރު، 1442 ވަނަ އަހަރު 9 ލައްކައަށްވުރެ ގިނަ ރުފިޔާ ލިބިފައިވެއެވެ.

އޭގެ އިތުރުން، 1443 ވަނަ އަހަރު ލިބިފައިވަނީ 1 މިލިއަން ރުފިޔާއެވެ.

މިނިސްޓްރީން ފިތުރު ޒަކާތް ބަލައިގަންނަން ފަށާފައިވާއިރު އޭޕްރީލް މަހުގެ 18 ވަނަ ދުވަހާ ހަމައަށް ޒަކާތް ބަލައިގަންނަމުން ގެންދާނެކަމަށް އެ މިނިސްޓްރީން ބުނެއެވެ.

އުމުރުން ދުވަސްވީ ފަރާތްތަކާއި އޮންލައިންކޮށް ޒަކާތްދެއްކުމަށް އަހުލުވެރި ނޫން ފަރާތްތަކަށް ހާއްސަކޮށް މިނިސްޓްރީގެ ހޯލުގައި ޒަކާތް ބަލައިގަންނާނެ ކަމަށްވެސް އެ މިނިސްޓްރީން ބުނެއެވެ.

އިސްލާމިކް މިިނިސްޓްރީން ބުނާގޮތުގައި ޒަކާތް ބަލައިގަންނާނީ ރަސްމީ ކޮންމެ ދުވަހެއްގެ ހެނދުނު 10:00ން 13:00ށެވެ. އަދި ކައުންސިލްތަކުން ފިތުރު ޒަކާތް ބަލައިގަންނަން ފަށާނީ ރަމަޟާން މަހުގެ ހަތަރުވަނަ ދުވަހުން ފަަށައިގެން ކަމަށްވެސް ބުނެފައިވެއެވެ.

އިސްލާމިކް މިނިސްޓްރީން ބުނާގޮތުގައި ދިރާގު، އުރީދޫ، މޯލްޑިވްސް އިސްލާމިކް ބޭންކް، ބޭންކް އޮފް މޯލްޑިވްސް، މިނިސްޓްރީ އޮފް ފިނޭންސް އިތުރުން، ފަހިޕޭ މެދުވެރިކޮށް ޒަކާތް ބަލައިގަތުމަށް ހަމަޖެހިފައިވެއެވެ.

ފިތުރު ޒަކާތުގެ ގޮތުގައި ރާއްޖެއިން ބަލައިގަންނަ ބާވަތްތަކާއި އަގުތައްވެސް އެ މިނިސްޓްރީން ވަނީ އާންމުކޮށްފައެވެ. އާދައިގެ ހަނޑުލުން ޒަކާތް ނެރޭނަމަ، ދައްކަންޖެހެނީ 12 ރުފިޔާގެ ރޭޓުންނެވެ.

އަދި ތައިލެންޑް ހުދުހަނޑުލުން 84 ރުފިޔާ، ރަތް ހަނޑުލުން 99 ރުފިޔާ ދައްކަންޖެހޭއިރު، އާދައިގެ ބާސްމަތީ ހަނޑުލުން ދައްކަން ޖެހެނީ 84 ރުފިޔާއެވެ. ހަމައެހެންމެ މޮޅު ބާސްމަތީ ހަނޑުލުން 100 ރުފިޔާގެ މަގުން، އަދި އެންމެ މޮޅު ބާސްމަތީ ހަނޑުލުން ދައްކަންޖެހެނީ 125 ރުފިޔާއެވެ.

މީގެ އިތުރުން ފުށުން ޒަކާތް ނެރެންޖެހޭ ފައިސާގެ އަދަދަށް ބަލާއިރު، އާދައިގެ ފުށުން ނަމަ ދައްކަންޖެހެނީ 12 ރުފިޔާއެވެ. އަދި އާޓާ ފުށުން ދައްކަންޖެހެނީ 75 ރުފިޔާއެވެ.