އެއް ޖިންސުން ކައިވެނިކޮށްދިން މައްސަލަ ބަލައި ފިޔަވަޅު އަޅަން ޖެހޭ: މިނިސްޓަރު ޝަހީމް
7 ނޮވެމްބަރު 2026 | ހޮނިހިރު 03:34ރާއްޖޭގެ ރިސޯޓެއްގައި އެއްޖިންސުން ކައިވެނިކޮށްދިން މައްސަލަ ތަހުގީގުކޮށް ފިޔަވަޅު އެޅުމަށް އިސްލާމީ ކަންތައްތަކާ ބެހޭ ވުޒާރާއިން ފުލުހުންގެ ކިބައިން އެދިއްޖެ. މިކަމާ ގުޅިގެން މިނިސްޓަރު ޝަހީމް ވިދާޅުވީ ރާއްޖޭގެ ގާނޫނުތަކާ ހިލާފަށް ހިންގާ މިފަދަ ޖަރީމާތަކުން ގައުމުގެ އިސްލާމީ ޝަހުސިއްޔަތު ސަލާމަތްކުރަން ޖެހޭ ކަމަށާއި، ފުލުހުން މިހާރު ދަނީ އެ މައްސަލަ ސީރިއަސްކޮށް ބަލަމުން
ރައްޔިތުންގެ މަޖިލީހުގެ ޖަލްސާއެއްގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވާހަކަ ދައްކަވަނީ | ޕީޕަލްސް މަޖްލިސް
އެއް ޖިންސުން ކައިވެނިކޮށްދިން މައްސަލަ ބަލައި ފިޔަވަޅު އަޅަން ޖެހޭ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މިނިސްޓަރު ޝަހީމް މިފަދައިން ވިދާޅުވެފައި ވަނީ ދިވެހިރާއްޖޭގެ ރިސޯޓެއްގައި އެއް ޖިންސުން ކައިވެނިކޮށްދޭ މަންޒަރު ފެންނަ ވީޑިއޯއެއް ސޯޝަލް މީޑިއާގައި އާންމުވުމާއި ގުޅިގެންނެވެ. އެގޮތުން މިނިސްޓަރު ޝަހީމް ވިދާޅުވީ މި މައްސަލަ ތަހުޤީޤުކޮށް ފިޔަވަޅު އަޅައިދިނުމަށް އެދި 4 ނޮވެމްބަރ 2026 ގައި އިސްލާމީ ކަންތައްތަކާ ބެހޭ ވުޒާރާއިން ފުލުންގެ ޚިދުމަތުގައި އެދިފައިވާ ކަމަށެވެ.
މިނިސްޓަރު ޝަހީމް ވިދާޅުވީ، ރާއްޖޭގެ ޤާނޫނު އަސާސީއާއި ކަމާ ގުޅުން ހުރި އެހެނިހެން ޤާނޫނުތަކާ ޚިލާފަށް މިފަދަ ކަންކަން ހިންގާ ފަރާތްތަކާ މެދު ފިޔަވަޅު އަޅަންޖެހޭނެ ކަމަށެވެ.
އަދި ދިވެހިރާއްޖެ މާއްދިއްޔަތުގެ ތެރެއަށް ވައްޓާލައި ރާއްޖޭގެ އިސްލާމީ ޝަޚްސިއްޔަތު ކިލަނބުކޮށްލަން ހިންގާ މިފަދަ ޖަރީމާތާކުން ރާއްޖެ ސަލާމަތްކުރުމުގައި ދެމިތިބެންޖެހޭނެ ކަމަށެވެ.
ހުކުރު ދުވަހު ފުލުުހުން ވަނީ ރާއްޖޭގެ ރިސޯޓެއްގައި އެއް ޖިންސުން ކައިވެނިކޮށްދޭ މަންޒަރު ދައްކުވައިދޭ ވީޑިއޯއެއް ދާދި ފަހުން ސޯޝަލް މީޑިއާގައި ދައުރުވަމުންދާކަން ފުލުހުންގެ ސަމާލުކަމަށް އައިސްފައިވާ ކަމަށް ބުނެފަ އެވެ. އަދި އެއީ ގާނޫނީ ގޮތުން ހުއްދަ ނޫން އަމަލަކަށް ވާތީ، އެ މައްސަލަ ފުލުހުން މިހާރު ތަހުގީގު ކުރަމުން އަންނަ ކަމަށް ވެސް ބުނެފައިވެ އެވެ.
މީގެ އިތުރުން، މި ފަދަ ކަންކަން ހިންގާ ފަރާތްތަކާމެދު ގާނޫނީ ފިޔަވަޅު އަޅާނެ ކަމުގެ އިންޒާރު ވެސް ފުލުހުން ވަނީ ދީފަ އެވެ.
