ޔުނައިޓެޑުން ލޫކް ޝޯގެ އެއްބަސްވުން އައުކޮށްފި

މެންޗެސްޓަރ ޔުނައިޓެޑަށް ކުޅެމުން އަންނަ އިންގްލެންޑުގެ ޑިފެންޑަރު ލޫކް ޝޯގެ އެއްބަސްވުން އެ ކުލަބުން އައުކޮށްފި އެވެ.

ސައުތުހެމްޓަން ދޫކޮށް ޝޯ ޔުނައިޓެޑަށް ބަދަލުވީ 2014 ވަނަ އަހަރު އެވެ. އެއަހަރު އެ ކުލަބަށް އޭނާ ގުޅުނީ ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ. އޭގެ ފަހުން 2018 ވަނަ އަހަރު ޔުނައިޓެޑުން ވަނީ އޭނާގެ އެއްބަސްވުން އައުކޮށްފަ އެވެ. އެފަހަރު އޭނާ ވަނީ އިތުރު ފަސް އަހަރަށް އެކުލަބުގައި މަޑުކުރުމަށް އެއްބަސްވުމުގައި ސޮއިކޮށްފަ އެވެ. އެ އެއްބަސްވުމުގެ މުއްދަތު އޮތީ މިއަހަރުގެ ޖޫން މަހަށް ހަމަވާ ގޮތަށެވެ. އެހެން ނަމަވެސް ޝޯ އާއި ޔުނައިޓެޑާ ދެމެދު ކުރިއަށް ދިޔަ މަޝްވަރާތަކަށް ފަހު މިހާރު ވަނީ އައު އެއްބަސްވުމުގައި ސޮއި ވެސް ކޮށްފަ އެވެ. ޔުނައިޓެޑާއެކު ޝޯ ހަދާފައިވާ އައު އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ.

އެއްބަސްވުމުގައި ސޮއި ކުރުމަށްފަހު ވާހަކަ ދައްކަމުން ޝޯ ބުނީ، ޔުނައިޓެޑު މިހާރު އޮތީ ކޯޗާއި އޭނާގެ އެހެނިހެން ސްޓާފުންނާއެކު ދާން ބޭނުންވާ އަމާޒަށް މިސްރާބު ހިފާފައި ކަމަށެވެ. އޭނާ ބުނީ މިހާރު ލިބިފައިވާ ފުރުސަތަކީ ވަރަށް ޚާއްސަ ކަންތައްތަކެއް ހާސިލްކުރުމަށް ލިބިފައިވާ ރަނުގެ ފުރުސަތެއް ކަމަށެވެ. އެކަމާ ގުޅިގެން ވާހަކަ ދައްކަމުން ޔުނައިޓެޑުގެ ކޯޗު އެރިކް ޓެން ހާގް ބުނީ، ޝޯގެ އެއްބަސްވުން އައު ކުރުމަކީ ލިބުނު ރަނގަޅު މެސެޖެއް ކަމަށެވެ. އަދި އިންގްލެންޑުގެ ޤައުމީ ޓީމަށް ވެސް ކުޅެމުން އަންނަ ޝޯ ވަނީ މި ސީޒަންގައި ވެސް މޮޅު ކުޅުމެއް ދައްކައިފަ އެވެ. މީގެ އިތުރުން ޓެން ހާގް ބުނީ ޝޯ އަކީ މިޒަމާނަށް ފިޓުވާ ޑިފެންޑަރެެއް ކަމަށާއި، އެހެން މަގާމުތަކަށް ކުޅުމުގެ ޤާބިލުކަން ވެސް އޭނާގެ ހުރި ކަމަށެވެ.

އުމުރުން 27 އަހަރުގެ އެ ކުޅުންތެރިޔާ ވަނީ މިހާތަނަށް ޔުނައިޓެޑަށް ކުޅެދިން 249 މެޗުގައި ހަތަރު ލަނޑު ޖަހައިފަ އެވެ. ޔުނައިޓެޑަށް ބަދަލުވި ފަހުން ޝޯ އަންނަނީ އެ ޓީމުގެ ޑިފެންސްގައި މުހިންމު ދަައުރެއް އަދާކުރަމުންނެވެ. އޭނާ ވަނީ ޔުނައިޓެޑާއެކު ތިން ތައްޓެއް ކާމިޔާބުކޮށްފަ އެވެ. އެއީ 2016 ވަނަ އަހަރުގެ އެފްއޭ ކޮމިއުނިޓީ ޝީލްޑާއި، ޔުއެފާ ޔޫރޮޕާ ލީގު އަދި ސީޒަންގައި ކާމިޔާބު ކުރި ކަރަބޯ ކަޕެވެ. މީގެ އިތުރުން 21-2020 ވަނަ ސީޒަންގެ ޔޫރޮޕާ ލީގުގެ ފައިނަލްގައި ވެސް އޭނާ ވަނީ ޔުނައިޓެޑާއެކު ކުޅެފަ އެވެ.

ޝޯ އަންނަނީ 2014 ވަނަ އަހަރުން ފެށިގެން އިންގްލެންޑުގެ ޤައުމީ ޓީމަށް ވެސް ކުޅެމުންނެވެ. މިހާތަނަށް ޤައުމީ ޓީމަށް 29 މެޗު ކުޅެދީފައިވާއިރު، އޭނާ ވަނީ ތިން ލަނޑު ޖަހައިފަ އެވެ. ޤައުމީ ޓީމާއެކު ޝޯ އަށް ހޯދުނު އެންމެ ބޮޑު ކާމިޔާބަކީ 2020 ވަނަ އަހަރުގެ ޔޫރޯ މުބާރާތުގެ ފައިނަލްގައި ކުޅެ، ދެ ވަނަ ހޯދުމެވެ. ފައިނަލްގައި އިންގްލެންޑު ބަލިވީ އިޓަލީ އަތުންނެވެ.