ލިބުނީ ރަނގަޅު މެސެޖެއް، ކުރިއަށް އޮތް ތަނުގައި ޓީމު ރަނގަޅު ވާނެ: ސާންތީ

މާޒިޔާ ސްޕޯޓްސް އެންޑް ރެކްރިއޭޝަން ކުލަބާ ދެކޮޅަށް ކުޅުނު ޗެރިޓީ ޝީލްޑު މެޗުގައި ކުލަބް އީގަލްސްގެ ކުޅުންތެރިން ދިނީ ރަނގަޅު މެސެޖެއް ކަމަށާއި، ކުރިއަށް އޮތް ތަނުގައި ޓީމު ވަރުގަދަވާނެ ކަމަށް އެ ޓީމުގެ ކޯޗު އިޙުސާން ޢަބްދުލް ޣަނީ (ސާންތީ) ބުނެފި އެވެ.

މިއަހަރުގެ ފުޓުބޯޅަ ސީޒަން ފެށުމުގެ ގޮތުން ކުޅުނު ޗެރިޓީ ޝީލްޑު މެޗުގައި އީގަލްސް ވަނީ 2-1 އިން މާޒިޔާ އަތުން ބަލިވެފަ އެވެ. އެ މެޗަށްފަހު ވާހަކަ ދައްކަމުން ސާންތީ ބުނީ، މެޗުގެ ނަތީޖާއާ މެދު ހިތްހަމަ ޖެހޭ ކަމަށެވެ. އޭނާ ބުނީ ސީޒަނަށް ތައްޔާރުވުމުގެ ގޮތުން ކުރިން ފަރިތަކުރުންތައް ފެށީ ވެސް މާޒިޔާ އިން ކަމަށާއި، އެ ކުލަބުން ސައުދީ އަރަބިޔާގައި ކޭމްޕެއްކޮށް، ވާދަވެރި މެޗުތަކެއް ވެސް ކުޅެފައިވާ ކަމަށެވެ. ސާންތީ ބުނީ މެޗުގެ ކުރިން އޮތް ޕްރެސް ކޮންފަރެންސްގައި ވެސް ބުނި ފަދައިން، އީގަލްސް އަށް އޮންނާނެ ހަމައެކަނި އުނދަގުލަކީ ވަރުގަދަ މެޗެއް ކުއްލިއަކަށް ކުޅެން ޖެހުން ކަމަށެވެ. މެޗުގެ ފުރަތަމަ 15 މިނެޓުގައި އެކަން ފެނުނު ކަަމަށް ވެސް ސާންތީ ބުންޏެވެ. ނަމަވެސް އޭނާ ބުނީ މެޗުގައި އީގަލްސްގެ ކުޅުންތެރިން ކުރި މަސައްކަތާމެދު ކޯޗުގެ ހައިސިއްޔަތުން ވަރަށް ހިތްހަމަ ޖެހޭ ކަމަށެވެ. ސާންތީ ބުނީ ކުޅުންތެރިން އޭނާ އަށް ދިނީ ވަރަށް ރަނގަޅު މެސެޖެއް ކަމަށާއި، ސީޒަން އަދި ކުރިއަށް އޮތީ ކަމަށެވެ. އޭނާ ބުނީ އީގަލްސް އިން ކުރިއަށް އޮތްތަނުގައި ފެންނާނީ މިއަށްވުރެ ރަނގަޅަށް ކަމަށެވެ.

އިތުރަށް ވާހަކަ ދައްކަމުން ސާންތީ ބުނީ މާޒިޔާާގައި ތިބި ކުޅުންތެރިންނަކީ ވަރަށް ހުނަރުވެރި ބައެއް ކަމަށެވެ. އެ ޓީމުގައި ތިބި ބިދޭސީ ކުޅުންތެރިންނަށް ބެލި ނަމަވެސް، ތަފާތުތަކެއް ފެންނާނެ ކަމަށެވެ. ސާންތީ ބުނީ އެ ފެންވަރުގެ ކުޅުންތެރިންތަކެއް ތިބޭއިރު ކޮންމެވެސް ގޮތަކަށް ނަތީޖާ ނިކުންނާނެ ކަމަށެވެ. ނަމަވެސް އެ މެޗުގައި މާޒިޔާ އިން އީގަލްސް ކޮޅަށް ޖެހި ދެ ލަނޑަކީ ވެސް މާ ރޭވުންތެރިކަމާއެކު ޖެހި ލަނޑުތަކެއް ނޫން ކަމަށާއި، އެއީ އީގަލްސް އަށް ހެދުނު ކުދިކުދި ގޯސްތަކެއްގެ ސަބަބުން ޖެހުނު ދެ ލަނޑު ކަމަށެވެ. އެކަން ފާހަގަ ކުރަމުން ސާންތީ ބުނީ ކުރިއަށް އޮތް ތަނުގައި އީގަލްސް އިން ޑިފެންސް ވެސް ވަރަށް ރަނގަޅު ކުރަން ޖެހޭ ކަމަށެވެ. އޭނާ ބުނީ އެ މެޗުގައި ފެނުނު ކުޅުމާއެކު އީގަލްސްގެ ކުޅުންތެރިންނާމެދު އޭނާގެ އިތުބާރު ބޮޑުވެއްޖެ ކަމަށެވެ.

މީގެ އިތުރުން ސާންތީ ބުނީ މިހާރު ކަލަންޑަރުގައި އޮތް ގޮތުން އަށް ވަނަ ދުވަހު ޕްރެޒިޑެންޓްސް ކަޕް ފަށާނެ އެވެ. އޭނާ ބުނީ އުންމީދު ކުރަނީ ކަލަންޑަރުގައި އޮތް ގޮތަށް އެ ތާރީޚުގައި މުބާރާތް ފަށާނެ ކަމަށެވެ. މުބާރާތް ތާރީޚަށް ނުފަށައިފި ނަމަ އެއީ އީގަލްސްގެ އިތުރުން މާޒިޔާ އަށް ވެސް ލިބޭނެ ގެއްލުމެއް ކަމަށް ވެސް ސާންތީ ބުންޏެވެ.

އީގަލްސް އަކީ މާޒިޔާ އަށް ފަހު ސީޒަނަށް ފަރިތަކުރުންތައް ފަށައިގެން ކުރިއަށް ގެންދިޔަ ދެ ވަނަ ޓީމެވެ. ސީޒަންގެ ކުރިން އީގަލްސް އަށް ވާދަވެރި މެޗުތަކެއް ކުޅެން ލިބިފައި ނެތުމުގެ ކަންބޮޑުވުން މީގެ ކުރިން ވެސް ސާންތީ ވަނީ ފާޅުކޮށްފަ އެވެ.