ކުޅުދުއްފުށީގައި ބާއްވާ އުރީދޫ "ފަން ރަން"އަށް ރަޖިސްޓްރީވުމަށް ހުޅުވާލައިފި
3 އެޕްރީލު 2023 | ހޯމަ 15:58އޭޕްރީލް 13ގެ ނިޔަލަށް ރަޖިސްޓްރީވެވޭނެ
އުރީދޫ ފަން ރަން
އަންނަ މެއި މަހު ހދ. ކުޅުދުއްފުށީގައި ބޭއްވުމަށް ހަމަޖެހިފައިވާ އުރީދޫ "ފަން ރަން"ގައި ރަޖިސްޓްރީވުމުގެ ފުރުސަތު ހުޅުވާލައިފިއެވެ.
މި ރަންގައި ބައިވެރިވުމަށް ޚާއްސަކޮށް ހުޅުވާލާފައިވާ ޕޯޓަލް މެދުވެރިކޮށް ރަންގައި ރަޖިސްޓްރީވެވޭނެއެވެ.
އޭޕްރިލް 13ގެ ނިޔަލަށް މި ފުރުސަތު ހުޅުވާލާފައިވާއިރު، 6 އަހަރުން މަތީގެ ހުރިހާ ފަރާތްތަކަށް މި ދުވުމުގައި ބައިވެރިވުމުގެ ފުރުސަތު ވަނީ ހުޅުވާލާފައެވެ. މިއީ ތަފާތު ހަރަކާތްތަކެއް ހިމެނޭ, 5 ކިލޯމީޓަރުގެ ދުވުމެކެވެ.
އުރީދޫ ފަން ރަންގެ އަމާޒަކީ ދުޅަހެޔޮ ދިރިއުޅުމަކަށް، ދުވުމަކީ މަޖާ އަދި އުފާވެރިކަން ގެނުވައިދޭނެ ހަރަކާތެއްކަން އަންގައިދިނުން ކަމަށް އެކުންފުނިން ބުނެއެވެ.
އުރީދޫ ފަން ރަންއަކީ ކޮންމެ އަހަރަކު ބާއްވަމުން އައި އުރީދޫ ކަލަރ ރަން އަޕްގްރޭޑްކޮށް، ކުލައިގެ އިތުރުން މަޖާ ހަރަކާތްތަކާއެކު ބާއްވާ ދުވުމެކެވެ. މިދިޔަ އަހަރު އުރީދޫ ކަލަރ ރަން ފަން ރަންއަށް އަޕްގްރޭޑްކޮށް، ހުޅުމާލޭގައި ކުރިއަށް ގެންދިޔަ މަޖާ މި ހަރަކާތްތަކުގައި 5000 އަށްވުރެ ގިނަ ބައިވެރިން ވަނީ ބައިވެރިވެފައެވެ. "ފަން ރަން ކުޅުދުފުށި" 5 މެއި 2023ގައި ބޭއްވުމަށް ހަމަޖެހިފައިވާއިރު، މިއީ މިއަހަރު ހދ އަތޮޅުގައި ބާއްވާ އެންމެ ބޮޑު، އަދި އެންމެ މަޖާ ހަރަކާތަށް ވެގެންދާނެކަމަށް އުރީދޫއިން ބުނެއެވެ.
ކުޅުދުއްފުށީގައި ބާއްވާ ފަން ރަންގެ ކިޓްތައް 2 ކެޓެގަރީއަކުން ލިބެން ހުންނާނެ ކަމަށް އުރީދޫއިން ބުނެއެވެ. އެއީ ސްޓޭންޑަޑް ކިޓްސް އަދި ފަން ކިޓްސް ކެޓަގަރީއެވެ. ސްޓޭންޑަޑް ކިޓްގައި ފަން ރަން ޓީޝާޓް އަދި ރިސްޓްބޭންޑް ހިމެނޭއިރު، އަގަކީ 100 ރުފިޔާއެވެ. 200 ރުފިޔާއަށް ލިބޭ ފަން ކިޓްގައި އުރީދޫ ފަން ރަން ޓީޝާޓްގެ އިތުރުން ރިސްޓްބޭންޑަކާއި، ފޮތި ދަބަސް، އައިނު އަދި ބަންޑާނާ ހިމެނެއެވެ.
