ސަރުކާރު ހިއްސާވާ ކުންފުނިތައް ރެގިއުލޭޓްކުރުން ކުޑަކަމަށް ބުނެ މެންބަރުންގެ ކަންބޮޑުވުން
3 އެޕްރީލު 2023 | ހޯމަ 08:16ސަރުކާރު ހިއްސާވާ ކުންފުނިތަކުގެ ހިންގުމަށް ބަދަލުގެންނަން ޖެހޭ ކަމަށް ވެސް ނަޝީދު ވަނީ ވިދާޅުވެފަ
ރައްޔިތުންގެ މަޖިލީހުގެ ޖަލްސާގެ ތެރެއިން
ސަރުކާރު ހިއްސާވާ ކުންފުނިތައް ރެގިއުލޭޓްކުރުން ކުޑަކަމަށް ފާހަގަކޮށް މަޖިލީހުގެ މެންބަރުންގެ ކަންބޮޑުވުން ފާޅުކޮށްފިއެވެ.
މެމްބަރުން މި މޭރުމުން ވާހަކަދައްކާފައި ވަނީ ހުޅުދޫ ދާއިރާގެ މެންބަރު އިލްޔާސް ލަބީބު ހުށަހަޅުއްވާފައިވާ، ސަރުކާރު ހިއްސާވާ ކުންފުނިތައް އުފެއްދުމާއި، އުވާލުމާއި އަދި ރެގިއުލޭޓްކޮށް މޮނިޓަރކުރެވޭނެ ޤާނޫނެއް އެކުލަވާލުމަށް އެދި ގޮވާލާ ޤަރާރުގެ ބަހުސް މަރުހަލާގައެވެ. ހޯމަ ދުވަހު އެ ޤަރާރުގެ ބަހުސް ވަނީ ނިންމާލާފައެވެ. މެމްބަރުން ވަނީ ޤަރާރަށް ބަހުސް ކުރަން ކަނޑައެޅިފައިވާ ވަގުތު ހަމަވަންދެން ބަހުސްކުރައްވާފައެވެ.
ބިލަށް ބަހުސްކުރެއްވި ސަރުކާރަށް ތާއީދުކުރާ މެންބަރުން ވަނީ ކުންފުނިތައް މެނޭޖްކުރުމުގައި ހުރި ދަތިތަކަކީ މި ސަރުކާރަށް އެކަނި ދިމާވާ ގޮންޖެހުމެއް ނޫން ކަމަށް ވިދާޅުވެފައެވެ. އަދި ކުންފުނިތަކުގެ މެނޭޖްކުރުން ހަރުދަނާކުރުމަށް ގެންނަން ޖެހޭ ބަދަލުތައް ގެނައުމަށް ސަރުކާރުން މިހާރުވެސް މަސައްކަތް ކުރަމުންދާ ކަމަށް އެ މެމްބަރުން ވަނީ ވިދާޅުވެފައެވެ. އަދި މަޖިލީހުގައި މިހާރު ހުރި ޤާނޫނުތަކުގެ ތެރޭގައި ކުންފުނިތަކުގެ ހިންގުން ހަރުދަނާކުރުމަށް ހުށަހަޅާފައިވާ ބިލުތައް ހުރި ކަމަށް ވެސް މެންބަރުން ވިދާޅުވެފައިވެއެވެ.
ހޯމަ ދުވަހުގެ ޖަލްސާގައި އެ ގަރާރު ހުށަހެޅުއްވި މެންބަރު އިލްޔާސް ވަނީ ސަރުކާރު ހިއްސާވާ ބައެއް ކުންފުނިތަކުގައި އެކަށީގެންވާ ޕްލޭނެއް ނެތް ކަމަށާއި ކޮރަޕްޝަން ބޮޑު ކަމަށް ވިދާޅުވެފައެވެ. އަދި ކުންފުނީގެ މަގްސަދުތައް ހާސިލްކުރުމަށް ރަނގަޅަށް މަސައްކަތް ނުކުރެވޭ ކަމަށް އިލްޔާސް ވަނީ ވިދާޅުވެފައެވެ. އިލްޔާސް ވަނީ ކުންފުނިތަކުގެ ޕްރޮކިއުމެންޓް، ފައިނޭންޝަލް ޕޮލިސީ، ބަޖެޓަރީ ޕޮލިސީ ފަދަ ކަންކަން ރަނގަޅަށް ބެލެހެއްޓެމުން ނުދާ ކަމަށް ފާހަގަކުރައްވާ އެކަމާމެދު ކަންބޮޑުވުން ފާޅުކުރައްވާފައެވެ.
އެ ގަރާރުގެ ބަހުސް އަށް ފަހު މަޖިލީހުގެ ރައީސް މުހައްމަދު ނަޝީދު ވިދާޅުވީ ސަރުކާރު ހިއްސާވާ ކުންފުނިތަކުގެ ޕޭރޯލްގައި ސިވިލް ސަރވިސްގެ މުސާރަ އަށް ވުރެ ގިނައިން ފައިސާ ހުންނަން ޖެހޭ ކަމަށެވެ. ބަޖެޓަށް ވުރެ އިތުރަށް އެ ކުންފުނިތަކަށް ޚަރަދު ކުރަން ޖެހުމާއި، ލޯނުތައް ދައްކަން، ދަރަނި ފޫބައްދަން ސަރުކާރުން ބޮޑުވުމަކީ ކަންބޮޑުވެވަޑައިގަންނަވާ ކަމެއް ކަމަށް ވެސް ނަޝީދު ވިދާޅުވިއެވެ. ސަރުކާރު ހިއްސާވާ ކުންފުނިތަކުގެ ހިންގުމަށް ބަދަލުގެންނަން ޖެހޭ ކަމަށް ވެސް ނަޝީދު ވަނީ ވިދާޅުވެފައެވެ.
