މޮރާޓާ ހޯދުމަށް ޔުނައިޓެޑުން ކުރި ބިޑް ރެއާލް އިން ރިޖެކްޓް ކޮށްލައިފި

ރެއާލް މެޑްރިޑަށް ކުޅެމުން އަންނަ ސްޕެއިންގެ ފޯވާޑް އަލްވަރާ މޮރާޓާ ހޯދުމަށް މެންޗެސްޓާ ޔުނައިޓެޑުން ހުށަހެޅި ބިޑް އެ ކްލަބުން ރިޖެކްޓްކޮށްލައިފި ކަމަށް ރިޕޯޓްތައް ބުނެފި އެވެ.

ގޯލްޑޮޓްކޮމް އިން ބުނީ މޮރާޓާ ހޯދުމަށް ޔުނައިޓެޑުން ހުށަހަޅާފައިވަނީ 80 މިލިއަން ޕައުންޑު ކަމަށާއި، އެހެންނަމަވެސް ރެއާލް އިން ވަނީ އެ ހުށަހެޅުން ރިޖެކްޓްކޮށްލާފައި ކަމަށެވެ.

ރިޕޯޓްތައް ބުނާގޮތުން މިވަގުތު ޗުއްޓީގައި ހުރި މޮރާޓާ އެނބުރި ރެއާލްގެ ޕްރީސީޒަންގައި ބައިވެރިވުމަށް ބޭނުންނުވެއެވެ. އެގޮތުން އޭނާ ބޭނުންވަނީ އެނބުރި އައިސް ޔުނައިޓެޑަށް ބަދަލުވާން ކަމަށްވެސް ރިޕޯޓްތައް ބުނެއެވެ. އެހެންނަމަވެސް މޮރާޓާގެ ޓްރާންސްފާއާ ގުޅިގެން ޔުނައިޓެޑް، މޮރާޓާ އަދި ރެއާލް އެއްބަސްވުމަކަށް ނާދެއެވެ.

ޔުނައިޓެޑުން މޮރާޓާ ހޯދުމަށް ފުރަތަމަ 70 މިލިއަން ޕައުންޑު ހުށަހެޅުމުންވެސް ރެއާލް އިން ވަނީ އެ ހުށަހެޅުން ރިޖެކްޓްކޮށްފައެވެ. އެގޮތުން މިފަހަރު ޔުނައިޓެޑުން ބިޑެއް ހުށަހެޅީ 10 މިލިއަން ޕައުންޑު އިތުރުކޮށް، ޖުމްލަ 80 މިލިއަން ޕައުންޑެވެ.

ސްޕެއިންގެ ނޫހަކަށް ދާދި ފަހުން ދެއްވި އިންޓަވިއުއެއްގައި ރެއާލްގެ ރައީސް ފްލޮރެންޓީނޯ ޕެރޭޒް ވިދާޅުވީ، މޮރާޓާ އަވަސް މުސްތަގުބަލެއްގައި ރެއާލް ދޫކޮށްލާނެކަމަށް އޭނާ ނުދެކޭ ކަމަށާއި، ކްލަބުންވެސް މޮރާޓާ ދޫކޮށްލަން ބޭނުންނުވާ ކަމަށެވެ.

ރެއާލް ދޫކޮށްލުމަށްފަހު މޮރާޓާ ޔުވެންޓަސްއަށް 2014 ވަނަ އަހަރު ބަދަލުވެފައިވާއިރު، އެ ކްލަބުގައި އޭނާ ވަނީ ދެ ސީޒަން ހޭދަކޮށްފައެވެ. އެމުއްދަތުގައި އެޓީމަށް ކުޅުނު 93 މެޗުގައި 31 ލަނޑު ކާމިޔާބުކޮށް، އެޓީމާއެކު އިޓާލިއަން ލީގު ދެފަހަރު، އިޓާލިއަން ކަޕް ދެފަހަރު ކާމިޔާބުކޮށްފައެވެ. މީގެއިތުރުން އޭނާ ވަނީ އިޓާލިއަން ސުޕާކަޕްގެ ދެވަނަ އަދި ޔުއެފާ ޗެމްޕިއަންސް ލިގުގެ ދެވަނަ ވެސް ޔުވަންޓަސްއާއެކު ކާމިޔާބުކޮށްފައެވެ.

ޔުވަންޓަސް ދޫކޮށްލުމަށްފަހު މޮރާޓާ ރެއާލަށް ބަދަލުވީ މި ސީޒަނުގައެވެ. އެގޮތުން އޭނާ ވަނީ މިވީތަނަށް މި ސީޒަނުގައި އެޓީމަށް ކުޅުނު 43 މެޗުގައި 20 ލަނޑު ކާމިޔާބުކޮށްފައެވެ.

ކުރިއަށް އޮތް ސީޒަނަށް ރެއާލް ދޫކޮށް ގިނަ ކުޅުންތެރިން ދާނެ ކަމަށް ރިޕޯޓްތައް ބުނެއެވެ. އޭގެ ތެރޭގައި ހަމޭސް ރޮޑްރިގޭޒް އަދި ކްރިސްޓިއާނޯ ރޮނާލްޑޯ ހިމެނެއެވެ.