ނުވަ އަހަރުން ރާއްޖޭގެ އާބާދީއަށް 44،000 ދިވެހީން އިތުރުވެ އާބާދީ 382،000އަށް އަރައިފިއެވެ.

ރާއްޖޭގެ ބޯހިމެނުމުގެ ތަފާސްހިސާބު އެންމެ ފަހުން އާންމުކުރީ 2014 ވަނަ އަހަރު އެވެ. އޭގެ ނުވަ އަހަރު ފަހުން 2022ވަނަ އަހަރުގެ ބޯހިމެނުމުގެ ވަގުތީ ނަތީޖާ އާންމުކޮށްފައިވާއިރު އެ ނަތީޖާ ދައްކާ ގޮތުން ރާއްޖޭގައި އުޅޭ ދިވެހީންގެ އާބާދީއަކީ 382،751 އެވެ. އެ އަދަދަކީ 2014ވަނަ އަހަރުގެ އަދަދާ ބަލާއިރު 44،317 މީހުންގެ އިތުރުވުމެކެވެ.

ބިދޭސީންނާއެކު ރާއްޖޭގެ އާބާދީ މިހާރު 515،122 އަށް އަރައެވެ. ރާއްޖޭގެ އާބާދީގެ 26 އިންސައްތައަކީ މިހާރު ބިދޭސީންނެވެ. އެއީ 132،000އަށް ވުރެ ގިނަ ބިދޭސީންނެވެ. މިއީ 2014ވަނަ އަހަރުގެ ބޯހިމެނުމުގެ ނަތީޖާއަށްވުރެ ދެގުނަ ބޮޑު އަދަދެކެެވެ. އޭރު ބިދޭސީންގެ އާބާދީ އޮތީ 63،000ގައެވެ.

ރާއްޖޭގެ އާބާދީގެ 46 އިންސައްތަ މީހުން އުޅެނީ އަތޮޅުތެރޭގައެވެ. 10 ޕަސެންޓު މީހުން ރިސޯޓުތަކުގައި އުޅެއެވެ. މާލެ ނުހިމަނާ އެންމެ ބޮޑު އާބާދީއެއް އޮތީ އައްޑޫގައެވެ. އެ ސިޓީގައި 25،000ށްވުރެ ގިނަ މީހުން އުޅެއެވެ. ރާއްޖޭގައި 500 މީހުން ހަމަ ނުވާ 40ށްވުރެ ގިނަ ރަށް މިހާރު ވެސް އެބައޮތެވެ. އެންމެ މަދު މީހުން އުޅޭ ވ. ރަކީދޫގައި އުޅެނީ ބިދޭސީންނާއެކު 77 މީހުންނެވެ.

ތަފާސްހިސާބުތައް ދައްކާ ގޮތުން ރާއްޖޭގެ އާބާދީގެ 41 އިންސައްތަމީހުން ދިރިއުޅެނީ މާލޭގައެވެ. މިއީ ވެސް 2014 ވަނަ އަހަރާ ބަލާއިރު އިތުރުވުމެކެވެ. އެ ގޮތުން 2014 ވަނަ އަހަަރު މާލޭގައި ދިރިއުޅުނީ އާބާދީގެ 39 އިންސައްތަ މީހުންނެވެ. ބިދޭސީންނާއެކު 212،000އަށް ވުރެ ގިނަ މީހުން މާލޭގައި އުޅޭއިރު އޭގެ ތެރެއިން 31 އިންސައްތަ އަކީ ހުޅުމާލޭގައި ދިރިއުޅޭ މީހުންނެވެ.

ރާއްޖޭގެ އާބާދީ އެންމެ ބޮޑަށް އިތުރުވެފައިވަނީ ވެސް ހުޅުމާލޭގައެވެ. އެއީ 16 އިންސައްތައިގެ އިތުރުވުމެކެވެ.

ތަފާސްހިސާބުތަކުން ދައްކާ ގޮތުގައި ރާއްޖޭގެ ކޮންމެ 100 އަންހެނަކަށް 104 ފިރިހެނުން އެބަތިއްބެވެ.