މިއީ އެންމެފަހު ރަމަޟާން މަސް ކަމަށް ދެކި ނަފްސު އިސްލާހު ކުރަންޖެހޭ: ޚުތުބާ
31 މާރިޗު 2023 | ހުކުރު 08:10ރަމަޟާން މަހު މަތިވެރި ނިދާއަށް އިޖާބަދީ ފާފަތަކުން ތައުބާވާން ޖެހޭ
ހުކުރު ނަމާދު ކުރުމަށް ޖަމާއަތް ހަދައިގެން
މިރަމަޟާން މަހަކީ ހަޔާތުގައި ބައްދަލުވާނެ އެންމެފަހު ރަމަޟާން މަސް ކަމަށް ދެކި ނަފްސު އިސްލާހު ކުރުމަށް ހުކުރު ޚުތުބާގައި ގޮވާލައިފިއެވެ.
''މިއީ ހަޔާތުގެ އެންމެފަހު ރަމަޟާން މަހަށް ވެދާނެ'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ މިރަމަޟާން މަހަކީ ހަޔާތުގައި ބައްދަލުވާނެ އެންމެފަހު ރަމަޟާން މަސް ކަމަށް ދެކި ނަފްސު އިސްލާހު ކުރުމުގެ އިހްލާސްތެރި ނިޔަތުގައި މިމަހާ ކުރިމަތިލާން ޖެހޭ ކަމަށާއި، މިއީ މާތްﷲ ތިބާއަށް ދެއްވި މަތިވެރި މަތިވެރި ނިއުމަތެއް ކަމުގައި ދެކި ފިސާރި ހެޔޮގޮތުގައި މިމަހުގެ ބޭނުން ހިފަންޖެހޭ ކަމަށެވެ. ރަމަޟާން މަހު މަތިވެރި ނިދާއަށް އިޖާބަދީ ފާފަތަކުން ތައުބާވެ، ތެދުވެރިކަމާއި އިހްލާސްތެރިކަމާއެކު ހެޔޮކަމާގެން އެމަހުގައި ކުރިއަރައި ދިއުމަށް ޚުތުބާގައި ގޮވާލާފައިވެއެވެ.
ޚުތުބާގައި ބުނީ ހެޔޮކަމުގެ މޫސުންތަކުގައި ހެޔޮކަމުގައި އުޅުމަށް ލިބޭ ފުރުސަތަކީ ފިސާރިކުޑަ އެހާމެ އަގުބޮޑު ހިނދުކޮޅެއް ކަމަށެވެ. ޚުތުބާގައި ބުނީ އޭގެ އަގު ވަޒަން ކުރެވޭނީ އެފުރުސަތުން މަހްރޫމްވާނެ ވަގުތުކަމުގައިވާ މަރު އަހަރެމެންނާ ބައްދަލު ކުރުމުން ކަމަށާއި، ހެޔޮކަމުގެ ފުރުސަތުތަކަށް އެދި އިންސާނާ އާދޭސް ކުރާނެ ކަމަށެވެ. އަދި އެދުވަހުން ތައުބާވެ ނަމާދުކޮށް ސަދަގާތްކޮށް، މީސްތަކުންނަށް ހެޔޮފޯރުވާން އޭނާ ކިތަންމެހައި ވެސް ބޭނުންވާނެ ކަމަށާއި، ހެޔޮގޮތުގައި ރަމަޟާން މަހު ރޯދަ ހިފައި ކީރިތި ޤުރުއާން ކިޔަވައި ރޭއަޅުކަން ކޮށް ލައިލަތުލްޤަދްރީގެ މަތިވެރި ސަވާބު ހޯދަން އޭނާ ދަހިވެތިވާނެ ކަމަށެވެ.
މީގެ އިތުރުން ޚުތުބާގައި ބުނީ އެއްހާސް މައްސަރަށްވުރެ ހެޔޮކަން ބޮޑު ލައިލަތުލްގަދްރި ހޯދުމުގެ މަތިވެރި ނިއުމަތުން އެތައް ބަޔަކު މަހްރޫމްވެފައިވާ ކަމަށެވެ. ނަމަވެސް މާތްﷲގެ އޯގާވަންތަކަމުން ތިބާވަނީ އަދި މިދުނިޔޭގައި ކަމަށާއި، މިއީ ތިބާ ތައުބާވުމަށް އޮތް އެންމެ ފަހުގެ ފުރުސަތު ކަމުގައި ވެދާނެ ކަމަށެވެ. އަދި ލައިލަތުލްޤަދްރީގެ މަތިވެރި ސަވާބު ހޯދުމަށް ގަދައަޅައި މަސައްކަތް ކުރުމަށް ޚުތާބާގައި ގޮވާލާފައިވެއެވެ.
ސަލަފުއް ސާލިހުން ރަމަޟާންމަހާ ކުރިމަތި ލައްވާފައިވަނީ ހަމައެންމެ ހިނދުކޮޅެއް ވެސް ހެޔޮކަމުން މަހްރޫމު ނުވާނެ ގޮތައްކަންކަން ފާހަގަކޮށް ޚުތުބާގައި ބުނީ ހެޔޮ އެއްވެސް ކަމެއް އެބޭކަލުން ދޫކޮށެއް ނުލައްވާ ކަމަށެވެ. މާތްﷲ ރުއްސުން ލެއްވި އަބްދުﷲ ބުން މަސްއޫދު ރަމަޟާން މަސް ނޫން މަސްތަކުގައި އެއް ހުކުރުން އަނެއް ހުކުރަށް ޤުރުއާން ހަތިމުކުރައްވާއިރު، ރަމަޟާން މަހުގައި ތިން ދުވަހުން ޤުރުއާން ހަތިމުކުރައްވައެވެ. އަދި ސަލަފުއް ސާލިހުންގެ ހަޔާތްފުޅުން އިބްރަތް ލިބިގަނެ ހެޔޮކަމުގައި ހީވާގިވުމަށް ޚުތުބާގައި ވަނީ ގޮވާލާފައެވެ.
ޚުތުބާގައި ބުނީ ފަރުޟު ފަސް ނަމާދަށް ރައްކާތެރިވެ މައިންބަފައިންނަށް ހެޔޮކޮށް ހިތައި އަނބިދަރީންގެ ހައްގުތައް އަދާކޮށް ރަމަޟާން މަހުގެ ތަރުބަވީ މަދަރުސާއިން ފިލާވަޅު ލިބިގަންނަންޖެހޭ ކަމަށެވެ.
