"ވިއަވަތި ރާއްޖެ" މަހާސިންތާ މޭމަހު ބާއްވަނީ
31 މާރިޗު 2023 | ހުކުރު 07:18ލާމަރުކަޒީ ނިޒާމު ފުރިހަމަކުރުމަށް ކައުންސިލުތައް ބާރުވެރިކުރުވުމަށް ކުރާ މަސައްކަތް ހަރުދަނާ ކުރެވޭނެ
މީގެ ކުރިން ބޭއްވި ވިއަވަތި ރާއްޖެ މަހާސިންތާއެއްގެ ތެރެއިން
މިއަހަރުގެ މޭމަހު ތިން ވަނަ "ވިއަވަތި ރާއްޖެ" މަހާސިންތާ ބޭއްވުމަށް ނިންމައިފިއެވެ.
ހދ.ހަނިމާދޫގައި ބޭއްވުމަށް ނިންމާފައިވާ މި މަހާސިންތާ ކުރިއަށްދާނީ މޭމަހުގެ 12ން 14އަށެވެ.
މަހާސިންތާއަށް ތައްޔާރުވުމުގެ މަސައްކަތްތައް ފަށާފައިވާއިރު، މިފަހަރުގެ މަހާސިންތާ ވެސް ވަރަށް ފުރިހަމަވާނެ ކަމަށް ރައީސް އޮފީހުން ބުނެއެވެ.
ވިއަވަތި ރާއްޖެ މަހާސިންތާ މަގުސަދަކީ ރާއްޖޭގެ ލާމަރުކަޒީ ނިޒާމު ފުރިހަމަކުރުމަށް ކައުންސިލުތައް ބާރުވެރިކުރުމަށް ރައީސުލްޖުމްހޫރިއްޔާ ފަށްޓަވާފައިވާ މަސައްކަތް އިތުރަށް ހަރުދަނާކުރުމެވެ. އަދި ރާއްޖޭގެ ލާމަރުކަޒީ ނިޒާމުގެ ހަޤީޤީ މަންފާ ސިޓީތަކާއި އަތޮޅުތަކާއި ރަށްތަކުގެ ރައްޔިތުންނަށް ލިބިގެންދާގޮތަށް އެ ނިޒާމު ބައްޓަންކުރެއްވުމަށް އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ސަރުކާރުން ގެނައި އިސްލާޙްތަކާއެކު ކައުންސިލްތަކަށް ލިބިފައިވާ ބާރުތައް، ތަންފީޒުކުރުމުގެ ކަންކަން ކުރިޔަށްދާގޮތް ގާތުން ބެއްލެވުމާއި އަދި ކައުންސިލްތަކަށް ކުރިމަތިވާ ގޮންޖެހުންތަކަށް ޙައްލުހޯދުމުގެ ގޮތުން ކައުންސިލަރުންނަށް ރައީސުލްޖުމްހޫރިއްޔާއާއި ކަމާބެހޭ ވަޒީރުންނާއި މަޝްވަރާކުރައްވައި ޙައްލުތައް ހޯއްދެވުމުގެ ފުރުޞަތު ފަހިކޮށްދިނުމަކީވެސް މި މަހާސިންތާގެ މުހިންމު ބޭނުމެކެވެ.
ހަމަ އެހެންމެ މީގެ ކުރިން މަރުކަޒީގޮތުން އިދާރާތަކުން ކުރަމުންއައި މަސައްކަތްތަކާއި މަސްއޫލިއްތުތައް ކައުންސިލްތަކަށް ބަދަލުކުރުމުގެ ގޮތުން މިހާތަނަށް ކުރެވިފައިވާ މަސައްކަތްތަކާ ގުޅޭގޮތުން، ކައުންސިލަރުންނާއި ކޮމެޓީތަކުގެ ރައީސުންނާއި ރައީސުލްޖުމްހޫރިއްޔާ ބައްދަލުކުރައްވައި މަޝްވަރާ ކުރެއްވުމަކީ ވެސް މަހާސިންތާގެ މުހިންމު އެއް ބޭނުމެވެ.
ވިއަވަތި ރާއްޖޭގެ ފުރަތަމަ މަހާސިންތާ ބާއްވާފައިވަނީ މެދުރާއްޖޭގެ އަތޮޅުތަކަށް ޚާއްސަކޮށްގެން، 28 މެއި 2022 ވީ ހޮނިހިރު ދުވަހު އއ.އުކުޅަހުގައެވެ. އަދި މީގެ ދެވަނަ މަހާސިންތާ ޚާއްސަކުރީ ދެކުނުގެ އަތޮޅުތަކަށެވެ. އެ މަހާސިންތާ ބާއްވާފައިވަނީ 11 ސެޕްޓެންބަރު 2022 ވީ އާދިއްތަ ދުވަހު ލ.އަތޮޅުގައެވެ.
މި މަހާސިންތާއަކީ ރައީސުލްޖުމްހޫރިއްޔާ އިބްރާޙީމް މުޙައްމަދު ސާލިޙު އާއި ދައުލަތުގެ ވަޒީރުންނާއި ލޯކަލް ގަވަމަންޓް އޮތޯރިޓީ (އެލްޖީއޭ) އިން ކައުންސިލްތަކާ ބައްދަލުކުރައްވައި މަޝްވަރާ ކުރުމަށް ބާއްވާ މަހާސިންތާއެކެވެ.
