ދަގަނޑޭ އަލުން އަނބުރާ ނިއު ރޭޑިއަންޓަށް
28 މާރިޗު 2023 | އަންގާރަ 19:05އެންމެ ފަހުން ދަގަނޑޭ ކުލަބް ފުޓުބޯޅައިގެ މެޗެއް ކުޅެފައި ވަނީ 2021 ވަނަ އަހަރު
ނިއު ރޭޑިއަންޓުގެ ވެރިންނާއެކު ދަގަނޑޭ
ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ނިއު ރޭޑިއަންޓް ސްޕޯޓްސް ކުލަބަށް ބަދަލުވާން ނިންމައިފި ކަމަށް މައުލޫމާތު ލިބިއްޖެ އެވެ.
ދަގަނޑޭ އެންމެ ފަހުން ކުޅުނީ ކުލަބް ވެލެންސިއާ އަށެވެ. އެ ކުލަބަށް އޭނާ ބަދަލުވީ 2020 ވަނަ އަހަރު އެވެ. އެންމެ ފަހުން ދަގަނޑޭ ކުލަބް ފުޓުބޯޅައިގެ މެޗެއް ކުޅެފައި ވަނީ 2021 ވަނަ އަހަރު އެވެ. އޭގެ ފަހުން ދަގަނޑޭ ވަނީ އަނިޔާގެ ސަބަބުން ކުޅުމާ ދުރުގައި ހުރެފަ އެވެ. އަނިޔާ އަށް ފަހު އެނބުރި އައިސް ދަގަނޑޭ ވަނީ މިފަހުން ޤައުމީ ޓީމުގައި ވެސް ކުޅެފަ އެވެ. އެންމެ ފަހުން ޤައުމީ ޓީމުން ލ.ގަމުގައި ޕާކިސްތާނާ ދެކޮޅަށް ކުޅުނު މެޗުގައި ވެސް ދަގަނޑޭ ވަނީ ކުޅެފަ އެވެ.
ދަގަނޑޭ ވަނީ މީގެ ކުރިން ވެސް ނިއު އަށް ކުޅެދީ، އެ ޓީމާއެކު ގިނަ ކާމިޔާބީތަކެއް ހޯދައިފަ އެވެ. ވެލެންސިއާގައި ހުރުމަށް ފަހު ދަގަނޑޭ ނިއު އަށް ބަދަލުވީ 2006 ވަނަ އަހަރު އެވެ. ނިއު އަށް ބަދަލުވި ސީޒަންގައި ދަގަނޑޭ ވަނީ އެ ޓީމާއެކު ދިވެހި ލީގު އަދި އެފްއޭ ކަޕް ކާމިޔާބުކޮށްފަ އެވެ. އެއަށްފަހު ދަގަނޑޭ ވަނީ ބުރުނާއީގެ ކުލަބަކަށް ވެސް ކުޅެފަ އެވެ. އަލުން ދިވެހި ކުލަބުން ދެން ދަގަނޑޭ ފެނުނީ ވީބީ އިންނެވެ. ހަތަރު އަހަރު އެ ޓީމަށް ކުޅެދިނުމަށް ފަހު، 2012 ވަނަ އަހަރު އަނެއްކާ ވެސް ދަގަނޑޭ ގުޅުނީ ނިއުއާ އެެވެ. ދަގަނޑޭ ވަނީ ނިއު އަށް ޖުމުލަ 123 ލަނޑު ޖަހައިދީފަ އެވެ. ނިއުގެ އިތުރުން ދަގަނޑޭ ވަނީ ރާއްޖޭގެ ފުރަތަމަ ޑިވިޝަންގެ ގިނަ ކުލަބުތަކަށް ކުޅެދީފަ އެވެ. އޭގެ ތެރޭގައި މާޒިޔާ ސްޕޯޓްސް އެންޑް ރެކްރިއޭޝަން، ޓީސީ ސްޕޯޓްސް ކުލަބް އަދި ގްރީން ސްޓްރީޓްސް ހިމެނެ އެވެ. ދަގަނޑޭ އަކީ ޤައުމީ ފެންވަރުގައި ވެސް އަދި ބައިނަލްއަޤުވާމީ ފެންވަރުގައި ވެސް ފާހަގަކޮށްލެވޭ ކާމިޔާބީތަކެއް ހޯދާފައިވާ ކުޅުންތެރިޔެކެވެ.
ނިއު އިން އެ ކުލަބަށް ދަގަނޑޭ ގެންގޮސްފައިވަނީ، އަލުން އަނބުރާ އެއް ވަނަ ޑިވިޝަނަށް ޕްރޮމޯޓުވުމަށް ކުރަމުން އަންނަ މަސައްކަތުގެ ތެރެއިންނެވެ. ކުޅުންތެރިންނަށް ދޭން ޖެހޭ މުސާރަ ނުދެވުމުގެ ސަބަބުން ގިނަ ދުވަސްތަކެއް ވަންދެން ސަސްޕެންޝަންގައި އޮތުމަށް ފަހު، ނިއު އަށް އަލުން އަނބުރާ ފުޓުބޯޅަ އަށް އާދެވުނީ މިދިޔަ އަހަރު އެވެ. ނަމަވެސް އެ އަހަރުގެ ދެ ވަނަ ޑިވިޝަންގެ ފުޓުބޯޅަ މުބާރާތުގައި ވާދަކޮށް ނިއު އަށް ވަނީ ނާކާމިޔާބާ ކުރިމަތިލާން ޖެހިފަ އެވެ. އެހެންކަމުން އަލުން އެއް ވަނަ ޑިވިޝަނަށް ދެވެން އޮތީ މިއަހަރުގެ ދެ ވަނަ ޑިވިޝަންގައި ވާދަކޮށްގެންނެވެ.
