ކޯޗުކަމުން ހޫލިއަން ނާގެލްސްމަން ވަކިކުރި މައްސަލާގައި ބަޔާން މިއުނިކްގެ ކުޅުންތެރިންގެ މެދުގައި ފެކްޝަން އުފެދި ޓީމު ފަނިވެއްޖެ އެވެ.

ޖަރުމަނުގެ ނޫސްތަކުން ބުނާ ގޮތުގައި މީގެ ދޮޅު އަހަރު ކުރިން ގެނައި ކޯޗު ނާގެލްސްމަން އަށް ނާންގައި، އޭނާ ވަކިކުރުމުގެ ކުރިން އައު ކޯޗަކަށް ވަޒީފާ ދިނުމަކީ ކުޅުންތިންގެ ވަރަށް ބޮޑު ހިތްހަމަނުޖެހުމެކެވެ.

ނާގެލްސްމަންއާމެދު އެންމެ ބޮޑު ހިތްހަމަނުޖެހުމެއް ގެންގުޅެނީ ޖަރުމަނާއި ބަޔާންގެ ވެސް ކީޕަރު އަދި ކެޕްޓަން މެނުއަލް ނޯޔާ އެވެ. މީގެ އެންމެ ބޮޑު ސަބަބަކީ އޭނާ އަށް ކޯޗުކޮށްދުން އައި ގޯލްކީޕަރު ޓްރޭނަރު 12 އަހަރަށް ފަހު ކުލަބުން ވަކުވުމުގައި ނާގެލްސްމަންގެ ދައުރެއް އޮތުމެވެ. މީގެ އިތުރުން ސާގް ގެނެބްރީ އާއި ލެރޯއީ ސާނޭ އަދި ޖަމާލް މުސިއާލާ އާއި ޔާއޯ ކަންސެލޯގެ އިތުރުން ސާދިއޯ މާނޭ އަކީ ނާގެލްސްމަން ކުޅުވާ ސްޓައިލާމެދު ހިތްހަމަނުޖެހޭ ކުޅުންތެރިންނެވެ.

މީގެ އެންމެ ބޮޑު ސަބަބަކީ އަރިމަތިން ދެ ވިންގަށް ބަރޯސާ ވެގެން ބަޔާން ކުޅެމުން އައި ސްޓައިލް ބަދަލުކޮށް ބޯޅަ ހިފަހައްޓައިގެން މެދުތެރެއިން ބޮޑަށް އެޓޭކް ކުރަން ނާގެލްސްމަން މަސައްކަތް ކުރުމެވެ.

ނަމަވެސް މި ސްޓައިލާމެދު ހިތްހަމަޖެހޭ ކުޅުންތެރިން ވެސް މަދެއްނޫނެވެ. އޭގެ ތެރެއިން ނާގެލްސްމަންއަށް އެންމެ ބޮޑަށް ތާއީދު ކުރަނީ ޓީމުގެ އެންމެ މުހިންމު އެއް ކުޅުންތެރިޔާ ހޯޝުއާ ކިމިޗެވެ. އަދި ލިއޯން ގޮރެޓްޒްކާ އަކީ ވެސް ނާގެލްސްމަނަށް ވަރަށް ބޮޑަށް ތާއީދުކުރާ ކުޅުންތެރިއެކެވެ. މީގެ އިތުރުން މަތިއަސް ޑިލިޓާއި ބެންޖަމިން ޕަވާޑް އަދި ޑަޔަޓް އުޕަމެނާކޯ ވެސް އޭނާ އަށް ތާއީދުކުރެ އެވެ.

ވަކިކޮޅަށްނުޖެހި މެދުގައި ހުރީ ތޯމަސް މުލާއެވެ. އޭނާ ދަނީ ނާގެލްސްމަން ވަކިކުރުމާއި ކުރިން ވެސް ކުރީގެ ކޯޗަށް އެއްވެސް އެއްޗެއް ނުބުނެ ޓީމު އިސްކުރަމުންނެވެ.

އުމުރުން 36 އަހަރުގެ ނާގެލްސްމަން ކޯޗުކަމުން ވަކިކުރީ ޓީމަށް ކުރިއެރުން ނާންނަ ކަމަށް ބުނެ އެވެ. ހާއްސަކޮށް ވޯލްޑްކަޕަށްފަހު ލީގު އަލުން ފަށައިގެން، ސްޓައިލް ބަދަލުކުރުމުގެ އޮއިވަރުގައި 12 ޕޮއިންޓް ގެއްލުމަކީ އޭނާ އަށް ކުރިމަތިވި އެންމެ ބޮޑު މައްސަލަ އެވެ.

މިހާރު އޮތް އެންމެ ބޮޑު ސުވާލަކީ އައު ކޯޗު ތޯމަސް ޓުޗެލް އަށް މިހުރިހާ ކުޅުންތެރިން އެކުވެރިކޮށް ގެންގުޅެވިދާނެތޯ އެވެ.