މާލޭ ލީގުގައި އިތުރު ވަގުތުގައި އަހުމަދު ނިޔާޒް (ނިޔާ) ކާމިޔާބުކުރި ލަނޑުން ވިކްޓްރީ ސްޕޯޓްސް ކްލަބް މޮޅުވެ، ގަދަ ހަތަރެއްގެ އުންމީދު އެޓީމު އާކޮށްފި އެވެ.

އަންގާރަ ދުވަހުގެ ރޭ ކުޅުނު މި މެޗު ކްލަބް ގްރީން ސްޓްރީޓާ ވާދަކޮށް ވިކްޓްރީން މެޗު ކާމިޔާބުކުރީ 1-2 ގެ ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ ވިކްޓްރީ އެވެ. އެޓީމުން ވަނީ ގްރީންގެ ހާފަށް ބާރުބޮޑުކޮށް ލަނޑު ޖެހުމަށް ފުރުސަތުތަކެއް ތަނަވަސްކޮށްފައެވެ. އެގޮތުން ހަސަން އަދުހަމް އަދި ބިދޭސީ ކުޅުންތެރިޔާ އަންދްރޭ ކެރިޗް ފޮނުވާލި ހަމަލާތައް ފާހަގަކޮށްލެވެއެވެ.

ވިކްޓްރީން ރަނގަޅަށް ކުޅެމުންދަނިކޮށް ގްރީން އިން ވަނީ މެޗުގެ ލީޑު ނަގާފައެވެ. މި ލަނޑު 43 ވަނަ މިނެޓުގައި އެޓީމަށް ކާމިޔާބުކޮށްދިނީ އަހުމަދު ހަސަން އެވެ. އޭނާ މި ލަނޑު ކާމިޔާބުކުރީ މުޅިން ހުހަށްހުރެއެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ވިކްޓްރީގެ މައްޗަށް ގްރީން ކުރީގައި އޮވެގެންނެވެ.

ފުރަތަމަ ހާފެކޭ އެއްގޮތަށް ދެވަނަ ހާފްގައި ވެސް ވިކްޓްރީގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، އެޓީމުން ވަނީ ގްރީންގެ ހާފަށް ބާރުބޮޑުކޮށް ލަނޑު ޖެހުމަށް ގިނަ ފުރުސަތުތައް ތަނަވަސްކޮށްފައެވެ. މެޗުގެ ނަތީޖާ ވިކްޓްރީން ހަމަހަމަކުރީ 60 ވަނަ މިނެޓުގައި ގްރީންގެ ޕެނަލްޓީ އޭރިޔާ ތެރެއިން އެޓީމުގެ ޑިފެންޑަރު މުހައްމަދު ސައިފް އަތުގައި ބޯޅައިން ޖެހުމުން ލިބުނު ޕެނަލްޓީއަކުންނެވެ. މި ޕެނަލްޓީ އެޓީމަށް ކާމިޔާބުކޮށްދިނީ ކެޕްޓަން އިސްމާއިލް އީސާ (މެސީ) އެވެ.

މި ލަނޑަށްފަހު ދެ ޓީމަށް ވެސް ލަނޑު ޖަހަން ފުރުސަތުތަކެއް ލިބިފައިވާއިރު، މެޗުގެ ފަހުވަގުތުގައި ނަތީޖާ ވިކްޓްރީ ކޮޅަށް އަނބުރާލީ ބަދަލު ކުޅުންތެރިޔެއްގެ ގޮތުގައި ކުޅެން އެރި އަހުމަދު ނިޔާޒް (ނިޔާ) ގެ ލަނޑުންނެވެ.

މި ނަތީޖާއާ އެކު ގްރީން ސްޓްރީޓް އަދި ވިކްޓްރީ ޕޮއިންޓްގެ ގޮތުން ހަމަހަމަވެފައިވާއިރު، ލަނޑުގެ ތަފާތުން ލީގުގެ ހަތަރުވަނަ ލިބެނީ ގްރީންއަށެވެ. ވިކްޓްރީ އޮތީ ލަނޑުގެ ތަފާތުން ފަސްވަނައިގަ އެވެ. މި ދެޓީމުންވެސް ވަނީ 11 މެޗުން 18 ޕޮއިންޓް ހަމަކޮށްފައެވެ.